جەتىسۋ وبلىسىنا جۇمىس ساپارى بارىسىندا قورعانىس ءمينيسترى, گەنەرال-پولكوۆنيك رۋسلان جاقسىلىقوۆ جاركەنت قالاسىندا ورنالاسقان بولىمشەلەردىڭ جاي-كۇيىن تەكسەردى.
گارنيزون باسشىسى, پودپولكوۆنيك نۇرلان اباەۆ مينيسترگە بولىمشەلەردىڭ ماقساتى, جاۋىنگەرلىك مۇمكىندىكتەرى, جاساقتالۋى مەن جاراقتاندىرىلۋى تۋرالى باياندادى.
گەنەرال-پولكوۆنيك رۋسلان جاقسىلىقوۆ شتاب, پوليگون, اسكەري اتىس ورىندارى, وقۋ ورتالىعى كورپۋستارى سەكىلدى ينفراقۇرىلىم نىساندارىنىڭ جاي-كۇيىن قاراپ شىعىپ, اسكەري قالاشىقتىڭ تۇرعىن ءۇي قورىمەن تانىستى.سونداي-اق مەملەكەت باسشىسى قاسىم-جومارت توقاەۆ بەكىتكەن «قاۋىپسىز ەل» ۇلتتىق جوباسىن ىسكە اسىرۋ جونىندەگى ءىس-شارالاردىڭ ورىندالۋىنا نازار اۋدارا وتىرىپ, اسكەري تەحنيكانى, قارۋ-جاراق پەن وق-دارىلەردى ساقتاۋ جاعدايىن تەكسەردى.
ينسپەكتسيا ناتيجەلەرى بويىنشا گەنەرال-پولكوۆنيك رۋسلان جاقسىلىقوۆ ينفراقۇرىلىمدى ۇستاۋ, وق-دارىلەردى قاۋىپسىز ساقتاۋدى قامتاماسىز ەتۋ, جاۋىنگەرلىك دايارلىقتى جانە جالپى قىزمەتتىك ءىستى ۇيىمداستىرۋ بويىنشا بىرقاتار مىندەت قويدى.