قازاقستاندا ءينسۋلتتىڭ الدىن الۋ جانە ەمدەۋ جۇيەسىن جەتىلدىرۋ باعىتىنداعى جۇمىستار ناتيجەسىن بەرىپ وتىر. 2026 جىلدىڭ العاشقى ەكى ايىندا قاناينالىم جۇيەسى اۋرۋلارىنان بولاتىن جالپى ءولىم-ءجىتىم 16,3%-عا تومەندەدى, دەپ جازادى Egemen.kz.
ۇلتتىق شۇعىل مەديتسينانى ۇيلەستىرۋ ورتالىعىنىڭ بازاسىندا Angels Initiative باستاماسى مەن قازاق ينسۋلتولوگتار ليگاسىنىڭ ۇيىمداستىرۋىمەن «Train the Trainer Workshop» حالىقارالىق ءبىلىم بەرۋ ۆوركشوپى ءوتتى.
ءىس-شارا تۇركى مەملەكەتتەرى ۇيىمىنا مۇشە ەلدەر اراسىنداعى مەموراندۋم اياسىندا ۇيىمداستىرىلىپ, ورتالىق ازياداعى مەديتسينالىق ىنتىماقتاستىقتى كەڭەيتۋگە باعىتتالدى. ۆوركشوپ جەدەل ينسۋلت كەزىندە مەديتسينالىق كومەك كورسەتۋ تاجىريبەسىن جەتىلدىرۋ جانە وزىق ادىستەردى ەنگىزۋ ءۇشىن ماڭىزدى الاڭعا اينالدى.
قازىرگى تاڭدا ينسۋلت ءولىم-ءجىتىم مەن مۇگەدەكتىكتىڭ نەگىزگى سەبەپتەرىنىڭ ءبىرى بولىپ وتىر. وسىعان بايلانىستى مەديتسينالىق كومەكتى ءتيىمدى ۇيىمداستىرۋ – ناۋقاستى دەر كەزىندە باعىتتاۋدان باستاپ, جوعارى تەحنولوگيالىق دياگنوستيكا مەن ەم جۇرگىزۋگە دەيىنگى بارلىق كەزەڭدى قامتۋ اسا ماڭىزدى.
ينسۋلت دەرتى «جاسارىپ» بارادى
قازاقستان ينسۋلت قىزمەتىن دامىتۋدا ەلەۋلى ىلگەرىلەۋگە قول جەتكىزدى. بۇگىندە رەسپۋبليكا بويىنشا 85 ينسۋلت ورتالىعى جۇمىس ىستەيدى, بۇل ءار 250 مىڭ ادامعا 1 ورتالىقتان كەلەدى جانە نورماتيۆتىك قاجەتتىلىكتى تولىق قامتيدى.
مي قان اينالىمى بۇزىلىستارىن ەرتە انىقتاۋ ماقساتىندا سكرينينگ جۇيەسى ەنگىزىلدى, ال ينسۋلت الەۋمەتتىك ءمانى بار اۋرۋلار تىزبەسىنە ەنگىزىلدى. سونىمەن قاتار ينسۋلتتان كەيىن پاتسيەنتتەردى ديسپانسەرلىك ەسەپكە الۋ مەرزىمى 30 كۇننەن 15 كۇنگە دەيىن قىسقارتىلدى.
2025 جىلدىڭ قورىتىندىسىندا ەم قابىلداعان پاتسيەنتتەر سانى 8,3%-عا ءوسىپ, 49 مىڭنان 53 مىڭ ادامعا دەيىن جەتتى. ترومبوليزيس جۇرگىزۋ ۇلەسى 11%-عا ارتتى, ال ينسۋلتتەن بولاتىن ءولىم-ءجىتىم 4%-عا تومەندەدى.
قازىرگى ۋاقىتتا ينسۋلت قاناينالىم جۇيەسى اۋرۋلارىنان بولاتىن جالپى ءولىم-ءجىتىمنىڭ 32%-ىن قۇرايدى.
دارىگەرلەر جي كومەگىمەن ينسۋلت پەن ونكولوگيالىق اۋرۋلاردى ەرتە انىقتاپ جاتىر
قابىلدانعان شارالاردىڭ ناتيجەسىندە 2026 جىلدىڭ العاشقى ەكى ايىندا جالپى ءولىم-ءجىتىم 16,3%-عا ازايدى, بۇل سالاداعى جۇيەلى جۇمىستىڭ تيىمدىلىگىن كورسەتەدى.
ۆوركشوپ باعدارلاماسىنا ينتەراكتيۆتى ماستەر-كلاستار, كلينيكالىق جاعدايلاردى مودەلدەۋ جانە شەشىم قابىلداۋ بويىنشا پراكتيكالىق سەسسيالار ەنگىزىلدى. مۇنداي ءتاسىل دارىگەرلەردىڭ كاسىبي بىلىكتىلىگىن ارتتىرىپ قانا قويماي, جەدەل كومەك كورسەتۋ كەزىندە كوماندالىق جۇمىستى جەتىلدىرۋگە مۇمكىندىك بەرەدى.
ءىس-شاراعا ازەربايجان, قازاقستان, قىرعىزستان, موڭعوليا, تاجىكستان, تۇرىكمەنستان جانە وزبەكستان ەلدەرىنەن مەديتسينا ماماندارى قاتىستى. ءار ەلدەن ينسۋلتولوگ دارىگەرلەر, دەنساۋلىق ساقتاۋ ۇيىمداستىرۋشىلارى جانە جەدەل مەديتسينالىق كومەك قىزمەتىنىڭ وكىلدەرى, بارلىعى 8 قاتىسۋشىدان كەلدى.
جالپى, حالىقارالىق ىنتىماقتاستىق پەن تاجىريبە الماسۋ ءينسۋلتتىڭ الدىن الۋ جانە ەمدەۋ ساپاسىن ارتتىرۋعا, ءولىم-ءجىتىمدى ازايتۋعا ىقپال ەتىپ وتىر.
جاس عالىم مي ءينسۋلتىنىڭ الدىن الاتىن ءادىس ويلاپ تاپتى