اقتوبە وبلىسىندا مەملەكەت مەنشىگىنە 20 مىڭ گەكتاردان استام جايىلىمدىق جەر قايتارىلدى. بۇل تۋرالى قوبدا اۋدانىندا وتكەن Amanat پارتياسى جانىنداعى «جەر اماناتى» كوميسسياسىنىڭ كوشپەلى وتىرىسىندا ايتىلدى.
جيىندا Amanat پارتياسىنىڭ حاتشىسى داۋلەت كارىبەك: «مەملەكەت باسشىسى جەردى ءوزى دە پايدالانبايتىن, وزگەگە دە بەرمەيتىن جەر يەلەنۋشىلەر بار ەكەنىن بىرنەشە رەت ايتقان بولاتىن. وسى ماسەلەدە ادىلدىكتى قالپىنا كەلتىرۋ – كوميسسيانىڭ باستى مىندەتى. بۇل باعىتتا اتقارىلعان جۇمىس ناتيجەسى بويىنشا اقتوبە وبلىسىندا مەملەكەت مەنشىگىنە 20 مىڭ گەكتار جەر قايتارىلدى. جۇمىس جالعاسىن تابادى», دەدى.
اتاپ ايتقاندا, بايعانين اۋدانىندا – 15 مىڭ گا, حرومتاۋ اۋدانىندا – 1,9 مىڭ گا, قوبدا اۋدانىندا – 2,1 مىڭ گا, ايتەكە بي اۋدانىندا – 149 گا, قارعالى اۋدانىندا – 876 گا, اقتوبە قالاسىندا 370 گا جايىلىم مەملەكەت مەنشىگىنە قايتارىلدى.
وبلىستىق اۋىل شارۋاشىلىعى باسقارماسىنىڭ مالىمەتىنە سايكەس, وڭىردەگى بارلىق جايىلىمنىڭ جالپى كولەمى 25 ملن گەكتارعا جەتەدى. ولاردىڭ كوپشىلىگى شالعاي اۋدانداردا ورنالاسقان, ال جەر ۋچاسكەلەرى نەگىزىنەن ەلدى مەكەندەردىڭ اينالاسىندا تاپشى.
«وبلىستىڭ جەكە قوسالقى شارۋاشىلىقتاردا 314,8 مىڭ باس مال تىركەلگەن. ولاردى جايۋ ءۇشىن شامامەن 105 مىڭ گەكتار جەتىسپەيدى. بۇل ماسەلە, اسىرەسە, العا, مارتوك, تەمىر اۋداندارىندا جانە اقتوبە قالاسىندا وزەكتى. قازىردىڭ وزىندە جەردى ءجون-جوسىقسىز پايدالانعانداردىڭ ءتىزىمى 244-كە جەتتى. ماتەريالدار قۇزىرەتتى ورگاندارعا جولداندى», دەپ مالىمدەدى باسقارما باسشىسى يساتاي ەسپاعانبەتوۆ.
ەسكە سالا كەتەيىك, پارتيا جانىنان قۇرىلعان «جەر اماناتى» كوميسسياسىنىڭ مۇرىندىق بولۋىمەن سوڭعى بىرنەشە اي ىشىندە قاراعاندى, جامبىل جانە تۇركىستان وبلىستارىنداعى 140 مىڭ گەكتاردان استام جايىلىمدىق جەر مەملەكەت مەنشىگىنە قايتارىلدى.