قوستاناي وبلىسىندا ەلەكتر ەنەرگياسىن جەتكىزۋ قىزمەتىنىڭ ديففەرەنتسيالى ءتاريفىنىڭ ورنىنا تۇتىنۋشىلاردىڭ بارىنە بىردەي جاڭا تولەم جۇيەسى قولدانىسقا ەنەدى. قاناتقاقتى جوبانىڭ ءجون-جوسىعىن وبلىس جۇرتشىلىعىنا وڭىرگە ارنايى جۇمىس ساپارىمەن كەلگەن باسەكەلەستىكتى قورعاۋ جانە دامىتۋ اگەنتتىگىنىڭ تورعاسى سەرىك جۇمانعارين تانىستىردى.
وسىعان وراي اگەنتتىك توراعاسى مەن وبلىس اكىمىنىڭ ورىنباسارى ۆيكتور يونەنكو جانە يدم قۇرىلىس جانە تۇرعىن-ءۇي كوممۋنالدىق شارۋاشىلىعى ىستەرى كوميتەتى تۇرمىستىق قاتىناستار باسقارماسىنىڭ باسشىسى سۇلتانعالي جالقۇل, ۇلتتىق ەكونوميكا مينيسترلىگى تابيعي مونوپوليالاردى رەتتەۋ كوميتەتى وبلىستىق دەپارتامەنتىنىڭ باسشىسى اقان تاشپاەۆ, تاعى دا باسقا ءتيىستى مەكەمەلەردىڭ باسشىلارىنان قۇرالعان جۇمىس توبى قوستاناي قالاسى مەن بىرقاتار اۋدان-قالالاردا جەرگىلىكتى جۇرتپەن كەزدەسىپ, الداعى ۋاقىتتا ەنگىزىلمەك قاناتقاقتى جوبانىڭ اياسىندا بولاتىن وزگەرىستەردىڭ جاي-جاپسارىن ءتۇسىندىردى. بۇل كەزدەسۋلەرگە جەرگىلىكتى قوعامدىق كەڭەستەردىڭ مۇشەلەرى, وبلىستىق جانە قالالىق ءماسليحات دەپۋتاتتارى, «اتامەكەن» كاسىپكەرلەر پالاتاسىنىڭ وڭىردەگى وكىلدەرى, مونوپولياعا قارسى دەپارتامەنت جانىنداعى كەدەرگىلەر جونىندەگى كەڭەس مۇشەلەرى, كوممۋنالدىق جانە ەنەرگيا تاسىمالدايتىن كاسىپورىنداردىڭ باسشىلارى دا قاتىستى.
بۇگىندە ەنەرگيامەن قامتاماسىز ەتەتىن مەكەمەلەردىڭ تاريفتەرى تۇرمىستىق تۇتىنۋشىلار, زاڭدى تۇلعالار جانە بيۋدجەتتىك مەكەمەلەر بولىپ ءۇش توپقا جىكتەلەدى. سەرىك جۇمانعاريننىڭ ايتۋىنشا, بۇعان دەيىن زاڭدى جانە بيۋدجەتتىك تۇتىنۋشىلاردىڭ ءتاريفى جاساندى ۇلعايتىلىپ, سونىڭ ەسەبىنەن تۇرمىستىق تۇتىنۋشىلاردىڭ ءتاريفى تومەندەتىلىپ كەلگەن. ەلەكتر قۋاتىن تاراتۋداعى ءادىل ءبولىنىستىڭ جوقتىعى كاسىپكەرلەرگە اۋىرتپالىق ارتىپ وتىر. ماسەلەن, ديففەرەنتسيالى ءتاريفتىڭ سالدارىنان ەلىمىزدەگى شاعىن جانە ورتا بيزنەس جىل سايىن 31 ملرد تەڭگە كولەمىندە ارتىق تولەم جاساۋعا ءماجبۇر بولىپ كەلەدى. ەلەكتر قۋاتىن ءىرى كولەمدە تۇتىنۋشى بولىپ ەسەپتەلەتىن شاعىن جانە ورتا بيزنەس قۋاتتى ەلەكتر ستانسالارىنان تىكەلەي ساتىپ الاتىندىقتان, ولار ديففەرەنتسيالى تاريفكە ەنبەيدى.
– قاناتقاقتى جوبا كاسىپكەرلىكتى دامىتۋ جونىندەگى ۇلتتىق جوبانىڭ اياسىندا ىسكە اسىرىلىپ جاتىر. ديففەرەنتسيالى تاريف الداعى بىرنەشە جىلدىڭ ىشىندە تۇبەگەيلى جويىلادى. 2022 جىلدىڭ 2 ناۋرىزىندا مەملەكەت باسشىسى ەنەرگەتيكا جانە ينجەنەرلىك ينفراقۇرىلىمدى دامىتۋ جونىندە كەڭەس وتكىزگەن بولاتىن. وسى كەڭەس بارىسىندا بۇل مىندەتتى قاناتقاقتى جوبا رەجىمىندە الماتى, باتىس قازاقستان جانە قوستاناي وبلىستارىندا قولعا الۋ تۋرالى تاپسىرما بەرىلدى. بۇرىن تۇتىنۋشىلاردى ەلەكتر ەنەرگياسىمەن ءبىر عانا مونوپوليالىق كومپانيا قامتاماسىز ەتىپ كەلسە, بۇگىنگى تاڭدا ەلىمىز بويىنشا ەلەكتر ەنەرگياسىن جەتكىزەتىن جانە رەتتەپ وتىراتىن 36 مەكەمە جۇمىس ىستەيدى. ولاردىڭ ارقايسىسى جەكە-جەكە وڭىرلەرگە قىزمەت كورسەتەدى. وسىدان كەلىپ تۇتىنۋشىنىڭ كۇنى ءبىر عانا قىزمەت كورسەتۋشىگە قاراپ قالىپ وتىر. ال قولدانىستاعى زاڭ بويىنشا ەلەكترمەن قامتاماسىز ەتۋ قىزمەتى اشىق باسەكەلەستىك ورتادا جۇزەگە اسىرىلۋعا ءتيىس. قازاقستاندا, جوعارىدا اتالعان 36 مەكەمەنىڭ سىرتىندا, ەلەكتر ەنەرگياسىن جەتكىزۋمەن اينالىساتىن شامامەن 180 مەكەمە جۇمىس ىستەيدى. مۇنداي مەكەمەلەردىڭ سانى ءار وڭىردە بەسەۋدەن كەم ەمەس. بۇگىندە ديففەرەنتسياتسيا ەلەكتر قۋاتىن تاراتاتىن ەسكى كومپانيالار مەن جاڭا كومپانيالاردىڭ اراسىنداعى اشىق باسەكەلەستىككە كەدەرگى كەلتىرىپ وتىرعانىنا كوز جەتكىزىپ وتىرمىز. دەمەك تۇتىنۋشىلار دا وزدەرى قالاعان مەكەمەنى تاڭداۋ قۇقىعىنان ايىرىلىپ, باسقا مەكەمەگە اۋىسۋ مۇمكىندىگى شەكتەلىپ وتىر. مۇنىڭ سىرتىندا, ديففەرەنتسياتسيا ارقىلى جاسىرىن سۋبسيدياعا دا جول بەرىلىپ جاتىر. قازىرگى جاعدايدا كىمدە-كىم قۋات كوزىن كوپ جۇمساسا, سۋبسيديا تۇرىندەگى قولداۋعا دا سول كوبىرەك يە بولىپ وتىر. وسىنىڭ سالدارىنان, الەۋمەتتىك قولداۋدىڭ ەڭ باستى قاعيداتى ىسكە اسىرىلماي كەلەدى, ياعني مەملەكەتتىڭ قولداۋى ناعىز مۇقتاج مەكەمەگە جەتپەي وتىر. ناتيجەسىندە, كاسىپكەرلەر ەلەكتر قۋاتىن جەتكىزۋگە كەتكەن شىعىنداردى تاۋاردىڭ, وزدەرى اتقارعان جۇمىس پەن كورسەتكەن قىزمەتىنىڭ قۇنىنا قوساتىندىقتان, جاسىرىن سۋبسيديانىڭ وتەۋى تۇپتەپ كەلگەندە ءبارىبىر تۇتىنۋشىلاردىڭ قالتاسىنان تولەنىپ جاتىر, – دەدى سەرىك جۇمانعارين.
قاناتقاقتى جوبا اياسىندا قوستاناي وبلىسىنىڭ تۇرعىندارى بۇدان بىلاي, تۇتىنىلاتىن قۋات كولەمىنە قاراي, ەلەكتر قۋاتى ءۇشىن اي سايىن ورتا ەسەپپەن 200 تەڭگەدەي ارتىق تولەيتىن بولادى. الەۋمەتتىك وسال توپتاعىلار ءۇشىن تاريف قۇنى بۇرىنعىشا قالادى. مۇنداي تۇرعىنداردىڭ تولەم ايىرماشىلىعى مەملەكەتتىڭ اتاۋلى الەۋمەتتىك كومەگىنىڭ ەسەبىنەن سۋبسيديالانادى.
يندۋستريا جانە ينفراقۇرىلىمدىق دامۋ مينيسترلىگىنىڭ وكىلى سۇلتانعالي جالقۇلدىڭ ايتۋىنا قاراعاندا, الداعى ۋاقىتتا تۇرمىستىق كومەك كورسەتۋ قىزمەتى وتباسىنىڭ تسيفرلى كارتاسى اۆتوماتتاندىرىلىپ, ءارى قاراي «ە-شاڭىراق» اقپاراتتىق جۇيەسىنە ەنگىزىلەتىن بولادى.
– تۇرمىستىق قور مەن حالىقتىڭ كوممۋنالدىق شىعىندارىن باقىلايتىن ۇدەرىستەردىڭ اشىقتىعىن قامتاماسىز ەتۋ ءۇشىن ءبىز تكش-نىڭ تابيعي مونوپوليالار, باسقارۋشى جانە سەرۆيستىك كومپانيالار سياقتى بارلىق سۋبەكتىلەرىن «ە-شاڭىراق» دەپ اتالاتىن بىرىڭعاي تسيفرلى ەكوجۇيەگە قوسامىز, – دەدى س.جالقۇل.
ەلىمىزدىڭ وزگە ايماقتارىنداعى ەلەكتر قۋاتىن تۇتىنۋشىلار جاڭا تاريفكە 2023 جىلدان كوشە باستايدى.
كەزدەسۋ بارىسىندا جۇمىس توبىنىڭ مۇشەلەرى كوپشىلىك تاراپىنان قويىلعان ساۋالدارعا جاۋاپ بەردى. جيىن سوڭىندا جاڭا تاريف ەنگىزىلمەس بۇرىن وڭىردەگى شاعىن جانە ورتا بيزنەس نىساندارىنا وزدەرى وندىرەتىن تاۋارلار مەن كورسەتەتىن قىزمەتتەرىنىڭ قۇنىن تومەندەتۋ جونىندە ءتۇسىندىرۋ جۇمىستارىن جۇرگىزۋ قاجەت ەكەنى ايتىلدى.
قوستاناي وبلىسى