قر قارجى مونيتورينگى اگەنتتىگىنىڭ پاۆلودار وبلىسى بويىنشا دەپارتامەنتىنىڭ قىزمەتكەرلەرى شوت-فاكتۋرالاردى زاڭسىز جازىپ بەرۋ فاكتىلەرىن انىقتادى, دەپ حابارلايدى Egemen.kz.
تەرگەۋ بارىسىندا ۆ.ر. لەگين مەن س. ا. رىجاكوۆ جالعان تۇلعالارعا راسىمدەلگەن 13 كومپانيا قۇرعاندىعى انىقتالدى. ولار 2019 جىلدان باستاپ 2021 جىلعا دەيىنگى كەزەڭدە وسى كومپانيالاردىڭ اتىنان بىرقاتار زاڭدى تۇلعالارعا جالپى سوماسى 6,5 ملرد تەڭگەگە جالعان شوت-فاكتۋرالار جازىپ بەرگەن.
اگەنتتىكتىڭ مالىمەتىنشە, لەگين مەن رىجاكوۆتىڭ قىلمىستىق ارەكەتتەرىنىڭ ناتيجەسىندە مەملەكەتكە تولەنبەگەن سالىق تۇرىندە 2 ملرد تەڭگەدەن استام سوماعا زالال كەلتىرىلگەن.
«سوت ەكەۋىن دە كىنالى دەپ تانىپ, لەگين ۆيلگەلم روبەرتوۆيچ پەن رىجاكوۆ سەرگەي الەكساندروۆيچتى 2 جىل 9 ايعا باس بوستاندىعىنان ايىردى. سونداي-اق لەگيننەن 13 ملن تەڭگەدەن استام اقشا تاركىلەندى», دەلىنگەن حابارلامادا.