فۋتبولدان قازاقستان پرەمەر-ليگاسىنداعى كەيىنگە قالدىرىلعان ءبىر ويىنى ءوتتى. اتاپ ايتساق, شىمكەنتتە جەرگىلىكتى «ورداباسى» پاۆلودار وبلىسىنان كەلگەن «اقسۋ» كلۋبىمەن كەزدەستى.
ەستەرىڭىزگە سالا كەتەيىك, ەكى كوماندا 21 مامىردا كەزدەسكەن ەدى. ءبىرىنشى تايمنىڭ 10-مينۋتىندا «ورداباسى» 1:0 ەسەبىمەن جەڭىپ جاتقان كەزدە قاجىمۇقان مۇڭايتپاسوۆ اتىنداعى ستاديوننىڭ شاتىرى قۇلاپ, ماتچ كەيىنگە شەگەرىلگەن ەدى. مىنە, ەندى ارادا ءبىراز ۋاقىت وتكەننەن سوڭ اتالعان كوماندالار قايتا جاسىل الاڭعا شىقتى. بۇل باسەكەنىڭ 38-مينۋتىندا ۆسەۆولود سادوۆسكي ەكىنشى گولدى سوقتى. سودان كەيىن «اقسۋ» بىرنەشە رەت قاۋىپتى شابۋىل ۇيىمداستىردى. بىراق قوناقتاردىڭ بۇل ارەكەتى ەش ناتيجە بەرمەدى. قارىمتا شابۋىلعا جۇگىنگەن الاڭ يەلەرى 86 مينۋتتا ءۇشىنشى رەت مەرگەندىك تانىتتى. بۇل گولدىڭ اۆتورى – ەلحان استانوۆ. ەسەپ – 3:0.
وسى جەڭىستەن كەيىن 23 ۇپاي جيعان «ورداباسى», «اقتوبە», «كاسپي» جانە «تارازدى» باسىپ وزىپ, جارىس كەستەسىندە ءۇشىنشى ورىنعا كوتەرىلدى. شىمكەنتتىكتەر «استانا» مەن «توبىلدان» قالىپ كەلەدى. كوش باسىنداعى ەكى كوماندا 24 ۇپايدان ەنشىلەۋدە.