پرەزيدەنتتىڭ كومەكشىسى – قازاقستان رەسپۋبليكاسى قاۋىپسىزدىك كەڭەسىنىڭ حاتشىسى قايرات قوجامجاروۆ ۇقشۇ-عا مۇشە ەلدەر قاۋىپسىزدىك كەڭەستەرى حاتشىلارى كوميتەتىنىڭ (قكحك) كەزەكتى ماجىلىسىنە قاتىستى.
رەسەي تاراپىنىڭ ۇسىنىسى بويىنشا ءماجىلىس چەشەنستان رەسپۋبليكاسىنىڭ استاناسى – گروزنىي قالاسىندا ءوتتى.
ۇقشۇ-نىڭ باس حاتشىسى نيكولاي بورديۋجا قكحك ءماجىلىسىنە قاتىسۋشىلاردى ۇقشۇ-نىڭ جاۋاپكەرشىلىگى ايماعىنداعى جانە سوعان جاقىن جاتقان اۋماقتارداعى جاعداي تۋرالى حاباردار ەتتى. سونداي-اق, ۇقشۇ-نىڭ ۇجىمدىق قاۋىپسىزدىك كەڭەسى تاراپىنان 2013 جىلدىڭ 23 قىركۇيەگىندە سوچي قالاسىندا بەرىلگەن تاپسىرمالاردىڭ جۇزەگە اسىرىلۋ بارىسى تۋرالى اقپارات بەردى.
قكحك جۇمىسىنىڭ بارىسىندا دەلەگاتسيا باسشىلارى ۇقشۇ-نىڭ جارعىلىق قۇجاتتارىندا قاراستىرىلعان بىرلەسكەن ءىس-قيمىل قىزمەتىنە قاتىستى بىرقاتار ماسەلەلەردى تالقىلادى. اتاپ ايتقاندا, تابيعي جانە تەحنوگەندىك سيپاتتاعى توتەنشە جاعدايلارعا ۇجىمدىق قارسى تۇرۋ سالاسىنداعى ءىس-قيمىل جوسپارىنىڭ جوبالارى مەن ۇيىم اياسىندا جەدەل ءىس-قيمىل تانىتۋ جانە اسكەري-ەكونوميكالىق ىنتىماقتاستىقتى ۇجىمدىق كۇشتەر شەڭبەرىندە ودان ءارى دامىتۋ ماسەلەلەرى قارالدى.
قكحك ءماجىلىسىنىڭ قورىتىندىسى بويىنشا قاۋىپسىزدىك كەڭەسىنىڭ حاتشىلارى ۇقشۇ-عا مۇشە ەلدەر ىنتىماقتاستىعىن ودان ءارى جەتىلدىرۋگە باعىتتالعان بىرقاتار بىرلەسكەن قۇجاتتارعا قول قويدى.
قكحك ماجىلىسىنە قاتىسۋشىلاردى چەشەنستان رەسپۋبليكاسىنىڭ باسشىسى رامزان قادىروۆ قابىلدادى.
گروزنىيدا بولۋى بارىسىندا ق.قوجامجاروۆتىڭ رەسەي قاۋىپسىزدىك كەڭەسىنىڭ حاتشىسى ن.پاترۋشەۆپەن ەكى جاقتى كەزدەسۋى ءوتتى.
«ەگەمەن-اقپارات».