جاستاردىڭ پروبلەماسى جەتەرلىك. بيىك مىنبەرلەردە ايتىلىپ-اق ءجۇر. شەشۋ جولدارى دا ۇعىنىقتى. ەندى سوزدەن ىسكە كوشەتىن كەز كەلدى. قاڭتار وقيعاسىنىڭ ورتاسىنان كوبىنە جۇمىسسىز جاستار تابىلعاندىعىن ەسكەرسەك, پايدالى جوبالاردى جۇزەگە اسىراتىن ۋاقىت جەتتى. «جاڭا قازاقستان» يدەياسىنىڭ ماقساتى دا سول ەمەس پە؟!
جاقىندا پاۆلودار قالاسىندا اقپارات جانە قوعامدىق دامۋ مينيسترلىگى جانە ازاماتتىق باستامالاردى قولداۋ ورتالىعىنىڭ قولداۋىمەن «جاستارعا مۇمكىندىك!» تاقىرىبىندا كەزدەسۋ ۇيىمداستىرىلدى. شارا «ادىرنا» ۇلتتىق-ەتنوگرافيالىق بىرلەستىگى قوعامدىق قورىنىڭ «جاستاردى الەۋمەتتەندىرۋ جانە وڭالتۋ» جوباسى اياسىندا ءوتتى.
قوعامدىق قوردىڭ پرەزيدەنتى ارمان اۋباكىردىڭ ايتۋىنشا, جوبا العاش رەت 2018 جىلى باتىس قازاقستاندا ىسكە قوسىلعان. بۇگىندە جاستار تاراپىنان زور قولداۋ تاۋىپ, رەسپۋبليكا كولەمىندە ۇيىمداستىرىلۋدا.
– ءار وڭىردەگى جاستاردى جۇمىسقا ورنالاستىرۋعا تىرىسۋدامىز. اسىرەسە جاستاردىڭ كاسىپكەرلەرمەن بايلانىسىن جولعا قويىپ وتىرمىز. سەبەبى جاستاردىڭ كوبى جەكە بيزنەسپەن اينالىسقاندى ءتاۋىر كورەدى. جاستار ءۇشىن شەبەرلىك ساباقتارى تەگىن, – دەيدى ا.اۋباكىر.
ءىس-شارا بارىسىندا «ادىرنا» ۇلتتىق-ەتنوگرافيالىق بىرلەستىگىنىڭ وكىلدەرى جەرگىلىكتى جۇمىسپەن قامتۋ ورتالىعى جانە جاستار باستامالارىن دامىتۋ ورتالىعى ماماندارىمەن بىرلەسىپ, adyrna.kz سايتىنا تىركەلۋ ءۇشىن ارنايى فورمالار ازىرلەدى. ەكى قولعا ءبىر كۇرەك ىزدەگەندەر وزدەرى جايلى دەرەكتەردى ونلاين-پلاتفورماعا ەنگىزدى. ەندىگى جەردە جاستاردىڭ ارقايسىسىمەن بايلانىس ورناتىلىپ, كۋرستار مەن شەبەرلىك ساباقتارى وتكىزىلەدى. جوبا ەل جاستارىنىڭ ءوزىن-ءوزى دامىتۋىنا سەپتىگىن تيگىزەدى دەگەن سەنىم مول.
جوبانى جانداندىرۋ ءۇشىن بارلىق وڭىردە كاسىپكەرلەردىڭ حالىقپەن كەزدەسۋلەرى وتكىزىلمەك. بۇل رەتتە ءىس-شارا بارىسىندا ستۋدەنتتەر ءوڭىر كاسىپكەرلەرىنە ساۋالدارىن جولداۋعا مۇمكىندىك الدى. بيزنەسمەندەر وزدەرىنىڭ جەتىستىكتەرى تۋرالى ايتىپ بەردى. ال جۇمىسپەن قامتۋ ورتالىعىنىڭ قىزمەتكەرلەرى مەملەكەتتىك باعدارلامالار مەن جۇمىسقا ورنالاستىرۋ جونىندەگى مەملەكەتتىك ساياساتتىڭ باعىتتارىن ءتۇسىندىردى. گرانتتىق جوبالاردىڭ جاي-جاپسارى ايتىلدى.
پاۆلودار وبلىسى