بيىل جول-قۇرىلىس ماۋسىمى اياسىندا رەسپۋبليكالىق ماڭىزى بار اۆتوموبيل جولدارىنىڭ ۇلتتىق وپەراتورى «قازاۆتوجول ينۆەستورلارمەن بىرلەسىپ, تاسجولداردىڭ بويىندا قىزمەت كورسەتۋ نىساندارىن ورناتادى, دەپ حابارلايدى Egemen.kz.
بۇل شامامەن 500 جاڭا جۇمىس ورنىن قۇرىپ, تۇرعىنداردى جۇمىسپەن قامتۋعا مۇمكىندىك بەرەدى. جول بويىنداعى سەرۆيس نىساندارىنىڭ كوبى رەسپۋبليكالىق تراسسالاردا ورناتىلادى. ماسەلەن, «ەكاتەرينبۋرگ-الماتى» تاسجولىنىڭ 1333 شاقىرىمىندا, اتاپ ايتقاندا «نۇر-Cۇلتان – تەمىرتاۋ» اقىلى ۋچاسكەسىندە مودۋلدىك ۇلگىدەگى جاڭا پاۆيلون ورناتىلادى.
جول بويىنداعى قىزمەت كورسەتۋ نىسانىندا ەرەكشە قاجەتتىلىگى بار تۇرعىندار ءۇشىن بارلىق جاعداي جاسالىپ, ارنايى سانيتارلىق-گيگيەنالىق توراپ ورناتىلدى. مودۋلدىك پاۆيلوندا ساۋدا الاڭى دا بار. سونىمەن قاتار جاقىن جەردە جۇرگىزۋشىلەر ءۇشىن ارنايى دەمالىس الاڭى دا قاراستىرىلعان.
«قازاۆتوجول» ۇلتتىق كومپانياسى جول بويىندا ورنالاسقان قىزمەت كورسەتۋ نىساندارىن ودان ءارى دامىتۋعا شاعىن جانە ورتا بيزنەس وكىلدەرىن تارتۋ بويىنشا بەلسەندى جۇمىستار جۇرگىزىپ جاتىر.
«نىسان پايدالانۋعا بەرىلگەنگە دەيىن, قۇجاتتاردى راسىمدەۋگە كومەكتەسىپ, زاڭ اياسىندا كەڭەس بەرەمىز. قىزىعۋشىلىق تانىتقان ازاماتتار 1403 قىسقا ءنومىرى بويىنشا ءبىزدىڭ بىرىڭعاي تاۋلىك بويى جۇمىس ىستەيتىن كولل-ورتالىققا حابارلاسا الادى. بارلىق ۇسىنىستاردى قاراستىرۋعا دايىنبىز. الەۋەتتى ينۆەستورلار ءۇشىن ءبىر عانا تالاپ بار - بۇل ەرەكشە قاجەتتىلىگى بار ازاماتتار ءۇشىن قولايلى جاعداي جاساۋ, ياعني پاندۋستار, تىرەكتەر, تۇتقالار جانە ارنايى اجەتحانالار ورناتۋ», دەدى «قازاۆتوجول» جول بويىنداعى سەرۆيستى دامىتۋ ءبولىمىنىڭ باسشىسى دياس ارىنوۆ.
ەسكە سالا كەتەيىك, قازىر رەسپۋبليكالىق تراسسالاردىڭ بويىندا 1600-دەن استام سەرۆيس وبەكتىلەرى جانە 620-عا جۋىق بوس تۇرعان دەمالىس الاڭدارى بار.