وزبەكستان پرەزيدەنتى شاۆكات ميرزيوەۆ كونستيتۋتسياعا تۇزەتۋلەر ەنگىزۋدى رەفەرەندۋم ارقىلى جۇزەگە اسىرۋدى ۇسىندى. بۇل تۋرالى مەملەكەت باسشىسىنىڭ ءباسپاسوز حاتشىسى شەرزود اسادوۆ مالىمدەدى, دەپ حابارلايدى Egemen.kz.
«كوميسسيانىڭ ۇسىنىسى بويىنشا پارلامەنت ازىرلەگەن جوبانى بۇكىلحالىقتىق تالقىلاۋدا قاراۋدى جانە ونى رەفەرەندۋم ارقىلى قابىلداۋدى ۇسىنامىن», دەدى پرەزيدەنت.
جالپى, ميرزيوەۆتىڭ ايتۋىنشا, قازىرگى زاڭناما بويىنشا پارلامەنت نەگىزگى زاڭعا تۇزەتۋلەر ەنگىزۋگە قۇقىلى.
2022 جىلعا جوسپارلانعان كونستيتۋتسيانى رەفورمالاۋدىڭ ارقاسىندا قازىرگى پرەزيدەنت قايتادان سايلاۋعا تۇسە الادى. بۇنى سەناتتىڭ ۆيتسە-سپيكەرى سادىق سافاەۆ ايتقان بولاتىن.
2016 جىلدان بەرى ميرزيوەۆ ەكى مارتە پرەزيدەنت بولىپ سايلاندى. وزبەكستاننىڭ قازىرگى كونستيتۋتسياسى بويىنشا, ءبىر ادامعا قاتارىنان ەكى مارتە پرەزيدەنت بولۋعا تىيىم سالىنعان. كونستيتۋتسيانى رەفورمالاۋدى ارنايى كوميسسيا قوعامدىق تالقىلاۋدىڭ كومەگىمەن وتكىزەدى.