استانا. 24 ءساۋىر. وتكەن سەنبى شىمكەنتتە بولعان ۋشۋ-ساندادان جارىس كەزىندە 17 جاسقا ەندى تولاتىن ءجاسوسپىرىم قازا تاپتى. بۇل تۋرالى total.kz حابارلادى.
جەكپە-جەك كەزىندە اتالمىش بوزبالا موينىنان قاتتى سوققى الىپ, جاراقاتتانىپ قالادى. «جەدەل جاردەم» كولىگى ونى شۇعىل اۋرۋحاناعا جەتكىزەدى. جاس سپورتشى وسى العان جاراقاتىنان وڭالماعان كۇيى 22 ءساۋىر كۇنى تۇندە ۇزىلەدى.
وبلىستىق سپورت جانە دەنەشىنىقتىرۋ باسقارماسىنىڭ ءباسپاسوز حاتشىسى ساربيناز الدابەرگەنوۆانىڭ ايتۋىنشا, جارىستى «ءتورجان» دەگەن مەكتەپ ۇيىمداستىرعان, وعان «وبلىستىق ۋشۋ فەدەراتسياسىنىڭ دا, قالالىق سپورت مەكتەبىنىڭ دە ەشقانداي قاتىستارى بولماعان».
ال وبلىستىق ىشكى ىستەر دەپارتامەنتىنىڭ ءباسپاسوز قىزمەتىندەگىلەر سپورتشىنىڭ قازا تابۋ وقيعاسى بويىنشا قىلمىستىق ءىس قوزعالمايتىنىن جەتكىزدى.
«بۇل باقىتسىز جاعداي, سپورتشىنىڭ جارىس كەزىندە جاراقات الىپ قالعانىن مىڭداعان جانكۇيەرلەر ءوز كوزدەرىمەن كوردى», - دەدى دەپارتامەنت ءباسپاسوز قىزمەتىنىڭ جەتەكشىسى سالتانات قاراكوزوۆا.
قۇرىش نۇرىمبەت.
دەرەككوز: total.kz.
فوتو: sports.kz.