ەنەرگەتيكا ءمينيسترى بولات اقشولاقوۆ ءماجىلىس الاڭىندا كاسپي قۇبىر كونسورتسيۋمىنداعى مۇناي تاسىمالداۋ كولەمىنىڭ تومەندەۋىنە قاتىستى پىكىر ءبىلدىردى, دەپ حابارلايدى Egemen.kz.
مينيستر مۇناي تاسىمالىنىڭ ازايۋىنا ەكىنشى دۇنيەجۇزىلىك سوعىس كەزىندە جارىلماي قالعان مينالاردى زالالسىزداندىرۋ جۇمىستارى سەبەپ بولعانىن اتاپ ءوتتى. ەنەرگەتيكا مينيسترلىگىنىڭ باسشىسى اتالعان جۇمىستار 15-25 ماۋسىم ارالىعىندا جۇرگىزىلەتىنىن ايتتى.
«مەن وتكەن اپتادا ايتىپ وتكەنىمدەي, تەڭىز تۇبىندە ءتيىستى جۇمىستاردى اتقارار الدىندا تازارتۋ ءىس-شارالارى جۇرگىزىلەدى. ويتكەنى ول جەردە ەكىنشى دۇنيەجۇزىلىك سوعىستان قالعان ءبىرشاما وق-ءدارى ءالى دە بار», دەدى بولات اقشولاقوۆ.
ول سونداي-اق قاشاعاندا 1 ماۋسىمنان 15 شىلدەگە دەيىن جوندەۋ جۇمىستارى جۇرگىزىلەتىنىن, دەگەنمەن, قازىر مۇنايدى ايلاقتان تاسىمالدايتىن ءبىر قۇرىلعى جۇمىس ىستەپ تۇرعانىن اتاپ ءوتتى.
«ال قالعان ەكەۋى تەڭىز ءتۇبىن تازارتۋ جۇمىستارىنا بايلانىستى توقتاپ تۇر. كاسپي قۇبىرى كونسورتسيۋمىنا جەتكىزىلەتىن مۇنايعا ايلاقتان تاسىمالدايتىن ءبىر قۇرىلعىنىڭ قۋاتى جەتەدى», دەپ ءتۇسىندىردى ب. اقشولاقوۆ.
مينيستر جوندەۋ جۇمىستارى مۇناي ءوندىرۋ كولەمىنە اسەر ەتپەيدى دەپ سەندىردى.
ايتا كەتسەك, كاسپي قۇبىر كونسورتسيۋمىنىڭ مۇناي تاسىمالدايتىن 2 قۇرىلعىسى جۇمىسىن ۋاقىتشا توقتاتتى.