استانا. 24 ءساۋىر. مەملەكەت باسشىسى نۇرسۇلتان نازارباەۆ بۇگىن اشىلعان ءحىى ەۋرازيالىق مەديافورۋمنىڭ (ەامف) اشىلۋ سالتاناتىنا وراي قاتىسۋشىلارعا ساتتىلىك تىلەگەن حات جولدادى. ونى جۇرتشىلىققا مەملەكەتتىك حاتشى ادىلبەك جاقسىبەكوۆ وقىپ بەردى. بۇل تۋرالى Total.kz حابارلادى.
پرەزيدەنت حاتىندا: «قازىرگى كەزدە ەۋرازيالىق مەديافورۋم حالىقارالىق ارەنادا كەڭىنەن تانىمال. بۇل فورۋم الەمدەگى ەڭ ماڭىزدى دەگەن ماسەلەلەردى تالقىلايتىن, سونداي-اق, ءتۇرلى تۇيتكىلدەردىڭ كۇرمەۋىن شەشۋ جولىن ىزدەيتىن الاڭعا اينالدى», – دەپ اتاپ كورسەتتى.
ءوزىنىڭ ەۋرازيالىق ەكونوميكالىق وداق تۋرالى يدەياسىن جاريالاعانىنا بيىل 20 جىل تولىپ وتىرعانىنا توقتالعان مەملەكەت باسشىسى جولداۋ حاتى ارقىلى: «بۇل مەديافورۋمنىڭ استانادا وتكىزىلۋىندە تەرەڭ ءمان بار. ويتكەنى, استانا ەۋرازيا حالىقتارىنىڭ ءبىر-بىرىنە جاقىنداۋىنا, ورتاق ءتىل تابىسۋىنا, جان-جاقتى بايلانىس ورناتۋىنا قاتىستى بەلسەندى قىزمەت اتقارۋدا. ءبىزدى تاريحي, ۇلتتىق-مادەني جانە كەڭ اۋقىمدى ىسكەرلىك بايلانىستار بىرىكتىرەدى», – دەگەن ويىن جەتكىزدى.
سونداي-اق, ن.ءا.نازارباەۆ: «بۇگىندە ەۋرازيالىق ينتەگراتسيا ۇدەرىسى دامۋدىڭ جاڭا بەلەسىنە كوتەرىلدى. ءدال وسى استانادا 2014 جىلدىڭ مامىرىندا ەۋرازيالىق ەكونوميكالىق وداق قۇرۋ تۋرالى اسا ماڭىزدى قۇجاتقا قول قويىلادى», – دەدى.
بۇعان قوسا, مەملەكەت باسشىسى ەۋرازيالىق مەديافورۋمنىڭ مەملەكەتتەردىڭ ءبىر-بىرىنە دەگەن سەنىمىن كۇشەيتۋدەگى جانە ۇلتارالىق كەلىسىم مەن بەيبىتشىلىكتىڭ ساقتالۋى باعىتىنداعى ماڭىزدى ءرولىن ءسوز ەتتى.
«فورۋم حالىقارالىق كۇردەلى ساياسي احۋال قالىپتاسىپ وتىرعان قارساڭدا ۇيىمداستىرىلىپ وتىر. سوڭعى ايلاردا ورىن العان كوپتەگەن وقيعالار ەتنوسارالىق ىنتىماقتاستىق تاقىرىبىن قايتا قاراۋعا مەڭزەۋدە. وسى فورۋم اياسىندا ءوربيتىن اڭگىمەلەر ءوزارا كەلىسىم مەن تاتۋلىقتىڭ ىرگەسىن بەكىتە تۇسەدى دەپ ۇمىتتەنەمىن», – دەدى پرەزيدەنت.
ن.ءا.نازارباەۆ 12 جىلدىق تاريحى بار فورۋمنىڭ جۇمىسىنا وسىعان دەيىن 60 ەلدەن 5 مىڭداي ادام قاتىسقانىن, ولاردىڭ اراسىندا بىلىكتى ساراپشىلار, تانىمال ساياساتكەرلەر, بەلدى جۋرناليستەر جانە بەلسەندى قوعام قايراتكەرلەرى بار ەكەنىن ەسكە ءتۇسىردى. سونىمەن قاتار, فورۋمنىڭ قىزمەتى تۋرالى ماتەريالدار قازاقستاندىق جانە شەتەلدىك 500-دەن اسا بۇقارالىق قۇرالدارىنا جاريالانعانىن ايتتى.
ءسوز سوڭىندا مەملەكەت باسشىسى مارتەبەلى جيىنعا قاتىسۋشىلارعا ساتتىلىك تىلەدى.
ەستەرىڭىزگە سالا كەتەيىك, ەۋرازيالىق مەديافورۋم رەسمي تۇردە 2001 جىلى تىركەلگەن بولاتىن. ونىڭ العاشقى جيىنى 2002 جىلى وتكەن.
XII ەۋرازيالىق مەديافورۋم 25 ءساۋىر كۇنى اياقتالادى. القالى جيىندا سيريا مەن ۋكرايناداعا كەلەڭسىز جاعدايلار كەڭىنەن اڭگىمە ارقاۋىنا اينالماق.
جولدىباي بازار.
دەرەككوز: Total.kz.
فوتو: Qazmedia.kz.