مەملەكەت باسشىسى قاسىم-جومارت توقاەۆتىڭ يرانعا رەسمي ساپارى شەڭبەرىندە قازاقستان ءوز تاۋارلارىن وسى ەل ارقىلى ترانزيتتەۋ تۋرالى مەموراندۋمعا قول قويدى, دەپ حابارلايدى Egemen.kz يدم-گە سىلتەمە جاساپ.
ەكى ەل پرەزيدەنتتەرى قاسىم-جومارت توقاەۆ پەن يبراحيم ءرايسيدىڭ كەڭەيتىلگەن قۇرامداعى كەلىسسوزىنىڭ ماڭىزدى ناتيجەسىنىڭ ءبىرى — اۋىل شارۋاشىلىعى ونىمدەرىنىڭ ساۋداسى مەن ترانزيتىندە قازاقستان-يران ىنتىماقتاستىعى تۋرالى مەموراندۋمعا قول قويۋى بولدى.
قۇجاتقا قازاقستان تاراپىنان قر يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ پەن اشم باسشىسى ەربول قاراشوكەەۆ قول قويدى. مەموراندۋمعا سايكەس يران قازاقستان بيدايى مەن باسقا دا اۋىل شارۋاشىلىعى تاۋارلارىنىڭ ەركىن ءترانزيتىن ءوز اۋماعى ارقىلى قوسىمشا باجدار مەن الىمدارسىز قامتاماسىز ەتەدى.
تاراپتار سۆوپ وپەراتسيالارى بويىنشا قازاقستاندا وندىرىلگەن بيدايدى يرانعا اكەلۋدى جانە وسىنداي مولشەردەگى بيدايدى يراننىڭ شىعۋ شەكارالارىنان اكەتۋدى ىنتالاندىرادى. اۋىل شارۋاشىلىعى ونىمدەرىن جەتكىزۋگە بايلانىستى ماسەلەلەردى شەشۋ ءۇشىن بىرلەسكەن جۇمىس توبىن قۇرۋ جوسپارلانعان.
قر يدم مەن يران يسلام رەسپۋبليكاسىنىڭ جول جانە قالالىق دامۋ مينيسترلىگى وڭتايلى جىلدامدىق پەن باعانى ساقتاي وتىرىپ, تاۋارلاردىڭ ءترانزيتىن قامتاماسىز ەتۋ ءۇشىن ءۇشىنشى ەلدەردىڭ ءتيىستى ورگاندارىمەن بايلانىس ورناتۋعا كەلىستى.
مەموراندۋم قول قويىلعان كۇنى كۇشىنە ەندى.