كەزدەسۋ بارىسىندا تاراپتار قازاقستان مەن يران اراسىنداعى قاتىناستاردىڭ قازىرگى جاعدايى مەن دامۋ پەرسپەكتيۆالارىن جان-جاقتى تالقىلادى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
كولىك جانە لوگيستيكا, ونەركاسىپ, اۋىل شارۋاشىلىعى سالالارىنداعى ساۋدا-ەكونوميكالىق ىنتىماقتاستىقتى, سونداي-اق مادەني-گۋمانيتارلىق بايلانىستاردى نىعايتۋعا ەرەكشە نازار اۋداردى.
قاسىم-جومارت توقاەۆ يران دەلەگاتسياسىنا ءىلتيپات بىلدىرە وتىرىپ, بيىل ەكى ەل اراسىنداعى ديپلوماتيالىق قاتىناسقا 30 جىل تولعانىن اتاپ ءوتتى. ونىڭ ايتۋىنشا, وسى مەرزىم ىشىندە ەلدەرىمىز تىعىز مەملەكەتارالىق ىنتىماقتاستىق ورناتتى.
– ءبىز تاتۋ كورشىلىك پەن بەرىك دوستىققا نەگىزدەلگەن سىندارلى ساياسي ديالوگ قۇردىق. ەكى ەل اراسىندا اۋقىمدى شارتتىق-قۇقىقتىق بازا قالىپتاستى. 60-تان استام كەلىسىم جاسالدى. ۇكىمەتارالىق ەكونوميكالىق كوميسسيا بەلسەندى جۇمىس اتقارۋدا. ءبىز ەندى بىرلەسكەن ساۋدا پالاتاسىن قۇرۋدى جوسپارلاپ وتىرمىز. پارلامەنتارالىق بايلانىستار جولعا قويىلدى. وڭىرارالىق كووپەراتسيا نىعايا تۇسۋدە. حالىقارالىق ۇيىمدار اياسىندا تىعىز ارىپتەستىك ورناتتىق, – دەدى قاسىم-جومارت توقاەۆ.
مەملەكەت باسشىسى ەكونوميكالىق ىنتىماقتاستىقتىڭ پەرسپەكتيۆالارى تۋرالى ايتا كەلە, بيىل ءبىرىنشى توقساندا ەكىجاقتى تاۋار اينالىمى قارقىندى دامي تۇسكەنىنە, ەلدەرىمىز اراسىنداعى ءوزارا ساۋدا-ساتتىق كورسەتكىشىن ارتتىرۋ ماڭىزدى ەكەنىنە توقتالدى.
بۇدان بولەك, مەملەكەت باسشىسى كولىك جانە لوگيستيكا سالاسىنىڭ, اتاپ ايتقاندا «قازاقستان – تۇرىكمەنستان – يران» تەمىرجولىنىڭ ۇلكەن الەۋەتى بار ەكەنىنە نازار اۋداردى. سونداي-اق پرەزيدەنت كاسپيدەگى تەڭىز ايلاقتارىنىڭ ترانزيتتىك-ەكسپورتتىق مۇمكىندىگىن تولىق پايدالانۋ كەرەك ەكەنىن اتاپ ءوتتى. اقتاۋ جانە قۇرىق, اميراباد جانە انزالي ايلاقتارىنىڭ الەۋەتى زور.
اۋىل شارۋاشىلىعى – ەكى ەل اراسىنداعى ەكونوميكالىق ىقپالداستىقتىڭ نەگىزگى باعىتتارىنىڭ ءبىرى. بۇل رەتتە, قاسىم-جومارت توقاەۆ يراننىڭ بىرقاتار كومپانياسى ءىرى قارا مال ءوسىرۋ, ەت وڭدەۋ, ءسۇت ونىمدەرىن شىعارۋ جانە كۇرىش ءوسىرۋ باعىتى بويىنشا قازاقستاندا تابىستى جۇمىس ىستەپ جاتقانىن اتاپ ءوتتى. وسىعان بايلانىستى مەملەكەت باسشىسى قازاقستان تاراپىنىڭ يرانعا تاسىمالداناتىن وتاندىق اۋىل شارۋاشىلىعى ونىمدەرىنىڭ نومەنكلاتۋراسىن كەڭەيتۋگە دايىن ەكەنىن مالىمدەدى.
سونىمەن قاتار مەملەكەت باسشىسى جەڭىل ونەركاسىپ, اگروونەركاسىپ كەشەنى سالالارىنداعى بىرلەسكەن جوبالاردى جۇزەگە اسىرۋعا نيەتتى ەكەنىن جەتكىزدى.
قازاق-يران قاتىناستارىن نىعايتۋدا مادەنيەت سالاسىنداعى ىقپالداستىق ەرەكشە ءرول اتقارادى. وسى رەتتە يرانداعى قازاق دياسپوراسى ەكى ەل اراسىن بايلانىستىرۋشى التىن كوپىر بولادى. قاسىم-جومارت توقاەۆ تاريحتى زەرتتەۋ جانە تاريحي دەرەكتەر الماسۋ باعىتىنداعى ىنتىماقتاستىقتى نىعايتۋ پەرسپەكتيۆاسىنا دا توقتالدى.
ءوز كەزەگىندە يبراحيم رايسي قاسىم-جومارت توقاەۆقا جانە قازاقستاندىق دەلەگاتسياعا ءىلتيپات بىلدىرە وتىرىپ, مەملەكەت باسشىسىنىڭ بۇل رەسمي ساپارى ەكىجاقتى ىنتىماقتاستىقتىڭ بارلىق باعىتى بويىنشا قازاق-يران قاتىناستارىن دامىتۋدا جاڭا بەتبۇرىس بولاتىنىن جەتكىزدى.
– ءسىزدىڭ ساپارىڭىز ساۋدا-ەكونوميكالىق ىنتىماقتاستىقتى, سونىڭ ىشىندە كولىك-ترانزيت, زنەرگەتيكا, اۋىل شارۋاشىلىعى جانە تۋريزم سالالارىن دامىتۋعا تىڭ سەرپىن بەرەتىنىنە سەنىمدىمىن, – دەدى يبراحيم رايسي.
كەزدەسۋ سوڭىندا مەملەكەت باسشىسى يران پرەزيدەنتىن قازاقستانعا ساپارمەن كەلۋگە شاقىردى.
كەلىسسوز قورىتىندىسى بويىنشا قاسىم-جومارت توقاەۆ پەن يبراحيم رايسي ەكىجاقتى ىنتىماقتاستىقتى جاڭا دەڭگەيگە كوتەرۋگە باعىتتالعان بىرلەسكەن مالىمدەمەگە قول قويدى.