اتىراۋدا 250 مىڭ تەڭگە مەن 3 كيلو ۋىلدىرىق الىپ جاتقان كەزدە اۋداندىق ىشكى ىستەر ءبولىمىنىڭ باسشىسى ۇستالدى.
اتىراۋدا جىل سايىن براكونەرلىككە قارسى بىتىسپەس كۇرەس باستالادى. بيىل دا سونداي كۇرەس قىزۋ ءجۇرىپ جاتىر. الايدا, زاڭسىز بالىق اۋلاۋشىلارعا تىيىم بولار ءتۇرى كورىنبەيدى. نەگە؟ «باقساق باقا ەكەن» دەگەندەي, براكونەرلەردىڭ جالعاندى جالپاعىنان باسىپ, زاڭسىز بالىق اۋلاۋىنا قامقور قولىن سوزاتىندار پوليتسەيلەر اراسىندا ەكەن, وندا دا كىم دەيسىڭ عوي. سويتسەك, سۋ مارجانىنا سۋىق قولىن باتىرا سوزعان براكونەرلەردى جەلەپ, جەبەپ جۇرگەندەردىڭ ءبىرى يساتاي اۋداندىق ىشكى ىستەر ءبولىمىنىڭ باسشىسى كورىنەدى. مۇنى وبلىستىق ەكونوميكالىق قىلمىسقا جانە سىبايلاس جەمقورلىققا قارسى كۇرەس دەپارتامەنتى انىقتاپ وتىر.
يساتاي اۋداندىق ىشكى ىستەر باسقارماسىنىڭ باسشىسى وسى كەزگە دەيىن زاڭسىز بالىق اۋلاۋشىلارعا «قامقورشى» بولىپ كەلگەن. جەدەل ىزدەستىرۋ شارالارى كەزىندە الگى پوليتسەي باسشى زاڭسىز بالىق اۋلاۋشىعا قامقورشىلىق تانىتۋ جانە بەكىرە تۇقىمداس بالىقتاردى زاڭسىز اۋلاۋعا ارەكەتسىزدىك جاساۋ ءۇشىن ودان 3 كيلو بەكىرە تۇقىمداس بالىقتىڭ ۋىلدىرىعىن جانە 250 مىڭ تەڭگە كولەمىندە پارا العان. ءسويتىپ, قىلمىستىق كودەكستىڭ 311-بابىنىڭ 2-بولىمىنە (پارا الۋ) سايكەس يساتاي اۋداندىق ىشكى ىستەر ءبولىمىنىڭ باسشىسىنا قاتىستى قىلمىستىق ءىس قوزعالدى.
وسىلايشا جۇرتتىڭ ءبارى سەنىم ارتاتىن, زاڭسىزدىقتىڭ جولىن كەسەدى, قۇلقىن قامىن ويلاعاندارعا توقتام سالادى دەپ ءۇمىت ارتاتىن پوليتسەيلەر باسشىسىنىڭ ءوزى وسىنداي جەمقورلىق ارەكەتكە بارىپ جاتسا وزگەلەرىنە نە جورىق. وسىدان كەيىن پوليتسەيلەرگە كىم سەنەدى؟ ولارعا بيلىك نە ءۇشىن بەرىلەدى؟ بۇعان جاۋاپ بەرەتىن ءىىم نە قاراپ وتىر؟
جولداسبەك شوپەعۇل,
«ەگەمەن قازاقستان».
اتىراۋ وبلىسى.