كەشە قازاقستان رەسپۋبليكاسى ۇلتتىق عىلىم اكادەمياسىندا وسى مەكەمەنىڭ ۇيىمداستىرۋىمەن شانحاي ىنتىماقتاستىق ۇيىمىنا (شىۇ) مۇشە ەلدەر عىلىم اكادەميالارى اسسوتسياتسياسىنىڭ IV فورۋمى ءوز جۇمىسىن باستادى. كەڭەستى قازاقستان رەسپۋبليكاسى ۇلتتىق عىلىم اكادەمياسىنىڭ پرەزيدەنتى مۇرات جۇرىنوۆ قىسقاشا كىرىسپە سوزبەن اشىپ, ءبىلىم جانە عىلىم ءمينيسترى ا.ءسارىنجىپوۆتىڭ قۇتتىقتاۋىن وقىپ بەردى.
فورۋم كەڭەسىنە قىتاي عىلىم اكادەمياسىنىڭ ۆيتسە-پرەزيدەنتى جانگ يانينگ, رەسەي عىلىم اكادەمياسىنىڭ ۆيتسە-پرەزيدەنتى ۆالەنتين سەرگيەنكو, تاجىكستان عىلىم اكادەمياسىنىڭ ۆيتسە-پرەزيدەنتى مۋحيبا ياكۋبوۆا, قىرعىزستان عىلىم اكادەمياسىنىڭ ۆيتسە-پرەزيدەنتى الماز الداشەۆ ءوز رەسپۋبليكالارىنىڭ دەلەگاتسيالارىن باسقارىپ كەلدى.
فورۋمدا شانحاي ىنتىماقتاستىق ۇيىمىنا مۇشە ەلدەردىڭ عىلىمي-تەحنيكالىق ىنتىماقتاستىعىن كەڭەيتۋ جانە اتالعان ماسەلەلەر بويىنشا ۇسىنىستار دايىنداۋ جوسپارلانعان. شىۇ بارلىق ەلدەردىڭ عىلىمي-تەحنيكالىق الەۋەتىنە سۇيەنە وتىرىپ, يننوۆاتسيالىق دامۋ مەن باسەكەگە قابىلەتتىلىكتى كوتەرۋدەگى عىلىمي ەكونوميكانى دامىتۋ جولىندا عىلىمي-زەرتتەۋ ناتيجەسىندەگى جوعارى مۇمكىندىكتى پراكتيكالىق ىسكە اسىرۋدىڭ تاماشا مۇمكىندىگىنە يە بولىپ وتىر. وسى ىنتىماقتاستىق ۇيىمىنا مۇشە ەلدەردىڭ عىلىمي جانە عىلىمي-تەحنيكالىق ىنتىماقتاستىعىن كەڭەيتۋ جانە جەتىلدىرۋ – بۇگىنگى كۇننىڭ تالابى.
فورۋمدا قارالاتىن ماسەلەلەر عىلىمنىڭ ءارتۇرلى سالاسى بويىنشا جۇرگىزىلەدى. كەڭەستە 2 پلەنارلىق سەسسيا وتكىزۋ جوسپارلانعان. ءبىرىنشى سەسسيادا دەلەگاتسيا باسشىلارى سويلەپ, فورۋمعا قاتىسۋشىلارعا شانحاي ىنتىماقتاستىق ۇيىمىنىڭ قازىرگى جاي-كۇيى مەن بولاشاعى تۋرالى حابارلايدى. بىرىگىپ وتكىزۋ تۋرالى ناقتى ۇسىنىستار مەن ولاردى جۇزەگە اسىراتىن جوبالار تۇجىرىمدالادى. سونىمەن قاتار, قىتاي عىلىم اكادەمياسىنىڭ, رەسەي عىلىم اكادەمياسىنىڭ, قىرعىزستان عىلىم اكادەمياسىنىڭ, تاجىكستان عىلىم اكادەمياسىنىڭ, رەسەي عىلىم اكادەمياسى ءسىبىر بولىمشەسىنىڭ باياندامالارى تىڭدالادى.
كەڭەس سەسسياسىندا قازاقستان رەسپۋبليكاسى ۇلتتىق عىلىم اكادەمياسى جەتەكشى ينستيتۋتتارىنىڭ ديرەكتورلارى حيميالىق تەحنولوگيالار, نانوتەحنولوگيالار, گەولوگيا, مەتاللۋرگيا سياقتى باسىمدى عىلىمي باعىتتار بويىنشا زەرتتەۋلەردى بىرىگىپ جۇرگىزۋ تۋرالى ناقتى ۇسىنىستارىنان حاباردار ەتەدى. فورۋمعا قاتىسۋشىلار باياندامالار مەن پىكىرتالاستاردىڭ قورىتىندىسى بويىنشا دەكلاراتسيا قابىلدايدى. دەكلاراتسيادا عىلىمي-تەحنيكالىق ىنتىماقتاستىقتى شانحاي ىنتىماقتاستىق ۇيىمىنا مۇشە ەلدەردىڭ عىلىمي-تەحنيكالىق ىنتىماقتاستىعىنىڭ جاي-كۇيىنە باعا بەرىلىپ, باسىم سالالار بويىنشا بىرىگىپ جاسالعان زەرتتەۋلەر مەن ناقتى ۇسىنىستار انىقتالادى جانە شىۇ-عا مۇشە ەلدەردىڭ عىلىمي-تەحنيكالىق ىنتىماقتاستىعىن جاقسارتۋ قاجەتتىگى تۇجىرىمدالادى.
شارافاددين ءامىروۆ,
«ەگەمەن قازاقستان».
الماتى.