مادەنيەت جانە سپورت مينيسترلىگى شىعارماشىل جاندارعا ارنالعان «ايبوز» ۇلتتىق ادەبي سىيلىعىنا بايقاۋ جاريالادى. جاڭا ادەبي سىيلىقتىڭ تانىستىرىلىمى ەل استاناسىندا ءوتىپ, وعان مادەنيەت جانە سپورت ءمينيسترى داۋرەن اباەۆ, دەپۋتاتتار مەن زيالى قاۋىم وكىلدەرى قاتىستى.
ۇلتتىق ادەبي سىيلىق جەتى اتالىم بويىنشا بەرىلەدى. اتاپ ايتساق, «ۇزدىك پروزا», «ۇزدىك پوەزيا», «ۇزدىك دراما», «ۇزدىك كوركەم اۋدارما», «ۇزدىك بالالار ادەبيەتى», «ۇزدىك كوميكس» جانە «كىتاپتىڭ ۇزدىك ديزاينى». بايقاۋ جۇلدەگەرلەرىنە 5 ميلليون تەڭگەدەن قارجىلاي سىيلىق تابىستالادى. سونداي-اق جەڭىمپاز اۆتورلاردىڭ ەڭبەكتەرى 500 دانامەن جارىق كورەدى.
مادەنيەت جانە سپورت ءمينيسترى د.اباەۆ بۇل جوبانىڭ مىندەتى ادەبيەتشىلەردى قولداۋ عانا ەمەس, سونىمەن قاتار جازۋشىلىق ونەردىڭ ايرىقشا الەۋمەتتىك ماڭىزدىلىعىن قوعامعا كورسەتۋ ەكەنىن اتاپ ءوتتى.
«باستى ماقساتىمىز – ءتول ادەبيەتىمىزدى تىڭ دۇنيەلەرمەن تولىقتىرىپ, ونى جاڭاشا بيىككە كوتەرۋ, سونداي-اق ۇلتىمىزدىڭ ادەبي مۇراسىن مولايتىپ, وتاندىق ادەبيەتكە جاڭا سەرپىن بەرۋ. بۇل سىيلىقتىڭ تاعى ءبىر ەرەكشەلىگى – ۇزدىك دەپ تانىلعان شىعارمالار باسىپ شىعارىلىپ, كىتاپحانالارعا تاراتىلادى. قاتىسۋشىلاردىڭ جاسىنا, ەڭبەك جانرىنا, جازۋ تىلىنە شەكتەۋ جوق. ەڭ باستىسى – شىعارما مازمۇندى, وزەكتى بولۋعا ءتيىس. قىسقا بولعانىمەن ەلدىڭ ەسىندە قالىپ, جۇرتشىلىقتىڭ اۋزىنان تۇسپەيتىندەي تۋىندى جازسا, بايگە سوعان بۇيىرادى», دەدى مينيستر.
سونداي-اق ول جاڭا جوبانىڭ وتاندىق كىتاپ شىعارۋ ءىسى مەن ادەبيەتتى قولداۋ باعىتىندا جۇزەگە اسىرىپ جاتقان ءىس-شارالاردىڭ ءبىرى عانا ەكەنىن دە ايتتى.
«ەل پرەزيدەنتى بەلگىلەپ بەرگەندەي, ءبىزدىڭ تۇپكى ماقساتىمىز – وقيتىن ۇلت قالىپتاستىرۋ. ول ءۇشىن ءبىز «جاڭا قازاق ادەبيەتى» سەرياسىن قوسا العاندا, جاس اۆتورلاردى قولداۋدىڭ جاڭاشىل تەتىكتەرىن قۇرىپ, مەملەكەتتىك سۋبسيديالاۋ كولەمىن ۇلعايتىپ جاتىرمىز. گرانتتار مەن سىيلىقتار جاريالاپ, كىتاپ جارمەڭكەلەرىن وتكىزىپ كەلەمىز. بولاشاقتا پروزا, پوەزيا جانە دراماتۋرگياداعى ەڭ مىقتى جاس تالانتتاردى قولداۋ جانە تابيعي قابىلەتىن شىڭداۋعا ارنالعان «ادەبي زەرتحانا» اشۋدى جوسپارلاپ وتىرمىز», دەدى د.اباەۆ.
ايتا كەتەيىك, بيىل باستاۋ الاتىن «جاڭا قازاق ادەبيەتى» سەرياسى بويىنشا بۇرىن ەش جەردە جارىق كورمەگەن جاس اۆتورلاردىڭ تۋىندىلارى ىرىكتەلىپ, 3 مىڭ تيراجبەن باسىلىپ شىعارىلادى.
ءمينيستردىڭ ايتۋىنشا, كەلەر جىلدان باستاپ مادەنيەت جانە سپورت مينيسترلىگى قازاقستاندىق جاس جازۋشىلار مەن اقىندار ءۇشىن پرەزيدەنتتىڭ ارنايى ادەبي سىيلىعىن تاعايىنداۋدى كوزدەپ وتىر.
«ايبوز» ادەبي سىيلىعى تىڭ تۋىندىلاردىڭ ومىرگە كەلۋىنە داڭعىل جول اشادى دەپ سەنەمىز. جالپى, ەۋروپادا بولسىن, امەريكانى الايىق, دامىعان ەلدەردىڭ كوبىندە كوركەم شىعارما ايرىقشا باعالانادى. كەڭەس داۋىرىندە دە اقىن-جازۋشىلارىمىزدىڭ وي ەڭبەكتەرىنە قالاماقى جاقسى تولەندى. جالپى, شىعارماشىل قاۋىمدى ىنتالاندىرۋ ارقىلى ءبىز كوركەم ويلاي الاتىن, رۋحاني دىڭگەگى بەرىك, ايتار ويى تەرەڭ جاس ۇرپاق قالىپتاستىرامىز. ۇلتتىق ادەبيەتكە سالىنعان بۇگىنگى ينۆەستيتسيا – ەرتەڭگى بولاشاق كەپىلى», دەپ اتاپ ءوتتى مينيستر.
سونداي-اق القالى جيىندا تاعى ءبىر تىڭ جوبا – danabala.kz پورتالى ىسكە قوسىلاتىنى دا ايتىلدى. بۇل پورتالدا بالالارعا ارنالعان شىعارمالار جاريالانادى.
ايتا كەتەيىك, ادەبي سىيلىققا وتاندىق قالامگەرلەر قاتىسا الادى. ۇسىنىلاتىن ەڭبەكتەر 15 ماۋسىمنان باستاپ 1 قازانعا دەيىن قابىلدانادى. ال ادەبي سىيلىق جىل سوڭىندا تاپسىرىلادى.