14 ماۋسىمدا ەسىل وزەنىنە 12 جاستاعى قىز باتىپ كەتتى, دەپ حابارلايدى Egemen.kz اقمولا وبلىستىق توتەنشە جاعدايلار دەپارتامەنتىنە سىلتەمە جاساپ.
اقمولا وبلىستىق توتەنشە جاعدايلار دەپارتامەنتىنىڭ مالىمەتىنشە, قايعىلى وقيعا 14 ماۋسىمدا ساعات 19:39-دا ارشالى اۋدانى جىبەك جولى اۋىلىنىڭ Silk Way دەمالىس ايماعىندا بولعان.
«2010 جىلى تۋعان قىز اتا-اناسىنىڭ قاراۋىنسىز قالىپ, سۋعا شومىلۋعا جابدىقتالماعان جەردە باتىپ كەتتى», دەلىنگەن تجد حابارلاماسىندا.
شاقىرتۋ ورنىنا جەتكەن نۇر-سۇلتان قالالىق تجد جەدەل-قۇتقارۋ جاساعىنىڭ قۇتقارۋشىلارى قىزدىڭ دەنەسىن ساعات 20:58-دە تاۋىپ, سۋدان شىعاردى.
ايتا كەتۋ كەرەك, وسى جىلدىڭ 21 مامىرىندا دەمالىس ايماعىنىڭ سۋ قويماسىنا تەكسەرۋ جۇرگىزىلىپ, شومىلۋعا جارامسىزدىعى تۋرالى اكت بەرىلدى. 28 مامىردا ءبولىم قىزمەتكەرلەرى Silk Way دەمالىس ايماعىندا قۇتقارۋ بەكەتىنىڭ سۋ ايدىنىنداعى قاۋىپسىزدىك قاعيدالارىنىڭ نەگىزگى تالاپتارىن ءتۇسىندىرۋ جانە دەمالىس ايماعىن جابدىقتاۋ بويىنشا پروفيلاكتيكالىق جۇمىستار جۇرگىزدى. سۋعا شومىلۋعا جانە بالالاردى سۋ ايدىنىندا قاراۋسىز قالدىرۋعا تىيىم سالۋ تۋرالى اقپاراتتىق ستەند ورناتىلدى.
اقمولا وبلىسىنىڭ تجد سۋداعى قاراپايىم ءتارتىپ ەرەجەلەرىن ساقتاۋدى ەسكە سالدى.
«تەكسەرىلمەگەن جانە جابدىقتالماعان جەرلەردە سۋعا تۇسپەڭىز. جۇزۋگە ارنالماعان زاتتارمەن جۇزبەڭىز, سۋعا الكوگولدىك نەمەسە ەسىرتكىلىك ماس كۇيىندە كىرمەڭىز. ەگەر ءسىز سۋ ايدىنىندا بالالارمەن بىرگە بولساڭىز ولاردى قاراۋسىز قالدىرماڭىز. ءجۇزۋ قۇرالدارىن پايدالانا وتىرىپ بالىق اۋلاۋ كەزىندە مىندەتتى تۇردە قۇتقارۋ كەۋدەشەلەرىن پايدالانىڭىز. سۋداعى قاۋىپسىزدىك ەرەجەلەرىن ساقتاماۋ قايعىلى ناتيجەلەرگە اكەپ سوقتىرۋى مۇمكىن ەكەندىگىن ۇمىتپاڭىز», دەدى تجد وكىلدەرى.