گەرمانيانىڭ Transfermarkt پورتالى قازاقستان پرەمەر-ليگاسىندا ونەر كورسەتىپ جۇرگەن فۋتبولشىلاردىڭ ترانسفەرلىك قۇنىن جاريالادى. بۇل تىزىمدە قوستانايدىڭ «توبىل» كلۋبىنىڭ شابۋىلشىسى يگور سەرگەەۆ كوش باستاپ تۇر. بۇگىنگى تاڭدا ول 1,7 ميلليون ەۋروعا باعالانىپ وتىر.
يگور سەرگەەۆ 1990 جىلدىڭ 30 ساۋىرىندە وزبەكستان استاناسى – تاشكەنتتە دۇنيەگە كەلدى. ءوزىنىڭ سپورتتىق كارەراسىن جەرگىلىكتى «پاحتاكوردا» باستادى. كەيىننەن قىتايدىڭ «بەيتسزين سينوبو گوان», ءباا-ءنىڭ ء«ال-زافرا» جانە قازاقستاننىڭ «اقتوبە» كلۋبتارىندا وينادى. بىلتىر «توبىلدىڭ» جەيدەسىن كيدى. وزبەكستاننىڭ جاسوسپىرىمدەر مەن جاستار قۇراماسىندا ونەر كورسەتىپ, 2013 جىلدان بەرى ۇلتتىق كوماندانىڭ نامىسىن قورعاۋدا. سول ارالىقتا 59 رەت جاسىل الاڭعا شىعىپ, 17 مارتە قارسىلاستار قاقپاسىن ءدال كوزدەدى. «پاحتاكورمەن» بىرگە ءتورت دۇركىن وزبەكستاننىڭ چەمپيونى, ەكى مارتە ەل كۋبوگىنىڭ يەگەرى اتاندى. جاستار اراسىنداعى ازيا كۋبوگىنىڭ ەڭ ۇزدىك سۇرمەگەنىنە تيەسىلى ارنايى سىيلىقتى يەلەندى. «توبىلدىڭ» ساپىندا بىلتىرعى ماۋسىمدا قازاقستان پرەمەر-ليگاسىندا توپ جاردى.
ەكىنشى ورىندى ياتسەك گۋرالسكي يەلەندى. 29 جاستاعى الماتىنىڭ «كايرات» كومانداسى ساپىنداعى پولشالىق لەگيونەر 1,6 ميلليون ەۋروعا باعالاندى. «قايراتتىڭ» شابۋىلشىسى حوسە كانتە مەن «استانانىڭ» سۇرمەرگەنى موحاممەد كامارا ءۇشىنشى جانە ءتورتىنشى ورىنداردى ءوزارا بولىسكەن. ولاردىڭ قۇنى – 1,4 ملن ەۋرو. سونداي-اق توپ-10-دىقتىڭ قاتارىندا مىنا ويىنشىلار بار: ماكس ەبونگ («استانا») – 1,2 ملن, كامو وگانەسيان («استانا») – 1 ملن, ايبول ابىكەن («اقسۋ») – 1 ملن, الەكسا امانوۆيچ («توبىل») – 1 ملن, سەرگەي مالىي («توبىل») – 900 مىڭ ەۋرو جانە ماكي بانياك («قايرات») – 800 مىڭ ەۋرو.