الەمگە ايگىلى بالالار ورتوپەدى مارك ەيدەلمان نۇر-سۇلتانعا العاش رەت كەلدى. پروفەسسور №2 كوپبەيىندى قالالىق بالالار اۋرۋحاناسى بازاسىندا بالالار اراسىنداعى تۋا بىتكەن جامباس بۋىنىنىڭ شىعۋى بويىنشا شەبەرلىك ساعاتىن وتكىزدى. ترەنينگ اياسىندا وتاندىق جانە شەتەلدىك دارىگەرلەر 12 وتا جاسادى, دەپ حابارلايدى Egemen.kz ەلوردا اكىمدىگىنىڭ رەسمي سايتىنا سىلتەمە جاساپ.
ەلوردالىق كلينيكادا مارك ەيدەلمان ەكى جامباسى دا شىعىپ كەتكەن پەتروپاۆلدىق ءۇش جاسار قىزعا وتا جاسادى.
ء«بىزدىڭ بولىمشەدە تىرەك-قيمىل اپپاراتىنىڭ تۋا بىتكەن جانە جۇرە پايدا بولعان پاتولوگيالارى بار بالالار ەم الادى. ءبىز جاڭا تۋعاننان 18 جاسقا دەيىنگى بالالاردى ەمدەۋمەن اينالىسامىز. تاجىريبە الماسۋ بىزگە بالالار تراۆماتولوگياسىن ۇيلەستىرۋگە كومەكتەسەدى», - دەپ اتاپ ءوتتى №2 كوپبەيىندى قالالىق بالالار اۋرۋحاناسىنىڭ بالالار ورتوپەدياسى ءبولىمىنىڭ مەڭگەرۋشىسى اعابەك چيكيناەۆ.
مارك ەيدەلمان «Technion» يزرايل تەحنولوگيالىق ۋنيۆەرسيتەتىنىڭ پروفەسسورى بولىپ جۇمىس ىستەيدى. سونداي-اق ول مەديتسينا عىلىمدارىنىڭ دوكتورى.
«يزرايلدە مەن مۇنداي جاعدايلار بويىنشا وتالار جاسامايمىن. سەبەبى ءبىزدىڭ ەلدە بۇل سيرەك كەزدەسەدى. شەبەرلىك ساعاتىندا ءوز ءبىلىمىمدى ارىپتەستەرىممەن ءبولىسىپ, شەتەلدە قولدانىلاتىن تەحنولوگيانى كورسەتكىم كەلدى», - دەدى پروفەسسور.
شەبەرلىك ساعاتى 6-8 ماۋسىم ارالىعىندا ءوتتى. مارك ەيدەلمان قازاقستاندىق اتا-انالاردى ورتوپەدتەرگە ۋاقىتىلى جۇگىنىپ, ولاردىڭ ۇسىنىستارىن بۇلجىتپاي ورىنداۋعا شاقىردى.