فۋتبولدان قازاقستان پرەمەر-ليگاسىندا ونەر كورسەتەتىن الماتىنىڭ «قايرات» كلۋبىنىڭ باس باپكەرى بولىپ كيريلل كەكەر تاعايىندالدى.
تاياۋ كۇندەرى 42 جاسقا تولعالى وتىرعان كەكەر بىشكەكتە دۇنيەگە كەلدى. العاشىندا ءوز ەلى مەن ءۇندىستاندا وينادى. توقسانىنشى جىلداردىڭ اياعىندا قازاقستاننىڭ «ەسىل-بوگاتىر», «وقجەتپەس», «قىزىلجار», «سۇڭقار» جانە «ۆوستوك» سياقتى بىرقاتار كلۋبتىڭ نامىسىن قورعادى. امپلۋاسى – قورعاۋشى. سپورتتىق كارەراسىن اياقتاعاننان كەيىن باپكەرلىكتىڭ قامىتىن كيدى. 2016 جىلدان بەرى ءتۇرلى جاس ەرەكشەلىكتەرى بويىنشا «قايرات» كلۋبىن جاتتىقتىردى. 2021 جىلى الەكسەي شپيلەۆسكي كەتكەن سوڭ الماتىلىق كوماندانىڭ باس باپكەرى مىندەتىن اتقاردى. سودان كەيىن رەسەي بىرىنشىلىگىندە باق سىناپ جۇرگەن «قايرات-موسكۆانىڭ» تىزگىنىن ۇستادى.
قازىرگى كەزدە «قايراتتىڭ» جاعدايى ءماز ەمەس. سول سەبەپتى دە بيىلعى ماۋسىمدا كەكەرگە ۇلكەن سەنىم ارتىلىپ وتىر.