ايگىلى vRINGe.com سايتى الەمدەگى ەڭ ۇزدىك كاسىپقوي بوكسشىلاردىڭ رەيتينگىن جاريالادى. وكىنىشكە قاراي, مىقتىلاردىڭ تىزىمىندە قازاقستاننىڭ بىردە-ءبىر وكىلى جوق.
الەمدىك رەيتينگتە الەكساندر ۋسيك كوش باستاپ تۇر. وليمپيا ويىندارىنىڭ جەڭىمپازى, الەم جانە ەۋروپا چەمپيونى دەگەن اتاقتارى بار 35 جاستاعى ۋكراينانىڭ ماقتانىشى 2013 جىلدان بەرى كاسىپقوي رينگتە كۇش سىناسىپ ءجۇر. سول ارالىقتا 19 كەزدەسۋ وتكىزىپ, بارلىعىندا جەڭىسكە جەتتى. 13 باسەكەدە ايقىن باسىمدىق تانىتتى. اۋەلى ءبىرىنشى اۋىر سالماقتا ونەر كورسەتكەن الەكساندر سودان كەيىن الىپتارمەن ايقاسۋعا تاۋەكەل ەتتى. ونىڭ ەكەۋىندە دە ول تەڭدەسسىز دەپ تانىلدى. كازىرگى كەزدە ۋسيك WBA نۇسقاسىنىڭ سۋپەرچەمپيونى رەتىندە مويىندالسا, IBF پەن WBO-نىڭ چەمپيوندىق بەلبەۋلەرىنىڭ يەگەرى اتانىپ وتىر.
سونداي-اق توپ-10 بوكسشىنىڭ قاتارىنا ساۋل الۆارەس (57-2-2, 39 KO), ەررول سپەنس (28-0, 22 KO), تايسون فيۋري (32-0-1, 23 KO), تەرەنس كروۋفورد (38-0, 29 KO), ناويا ينوۋە (23-0, 20 KO), دميتري بيۆول (20-0, 11 كو), دجوش تەيلور (19-0, 13 KO), دجەرمەلل چارلو (35-1-1, 19 كو) جانە دەۆين حەيني (28-0, 15 كو) سىندى ساڭلاقتار ەندى.