بۇگىن پرەزيدەنتتىڭ توراعالىعىمەن شەتەلدىك ينۆەستورلار كەڭەسىنىڭ 34-ءشى پلەنارلىق وتىرىسى ءوتتى. جيىنعا ءىرى ترانسۇلتتىق كومپانيالاردىڭ, مەملەكەتتىك ورگانداردىڭ باسشىلارى مەن حالىقارالىق ۇيىمداردىڭ وكىلدەرى قاتىستى, دەپ حابارلايدى Egemen.kz اقوردانىڭ رەسمي سايتىنا سىلتەمە جاساپ.
وتىرىستىڭ كۇن تارتىبىندە ەكونوميكانى كومىرتەگىنەن ارىلتۋ ءىسىن دامىتۋ جانە كومىرتەگىن از پايدالانۋ تەحنولوگيالارىن ەنگىزۋ ماسەلەلەرى قاراستىرىلدى.
مەملەكەت باسشىسى بۇگىنگى وتىرىس حالىقارالىق احۋالدىڭ شيەلەنىسكەن جاعدايىندا ءوتىپ جاتقانىن اتاپ ءوتتى.
«جاھاندىق لوگيستيكا جۇيەسىنىڭ بۇزىلۋى, ساۋدا سوعىستارى, بۇرىن-سوڭدى بولماعان ينفلياتسيالىق قىسىم – مۇنىڭ ءبارى بۇگىنگى كۇننىڭ شىنايى كورىنىسى. مۇنداي جاعدايدا مەملەكەت پەن بيزنەس جاڭا ويىن ەرەجەلەرىنە تەز بەيىمدەلۋى كەرەك. ءبىز تەك وسىلاي عانا باسەكەگە قابىلەتتىلىگىمىزدى ساقتاي الامىز», دەدى پرەزيدەنت.
قازاقستان پرەزيدەنتى ينۆەستيتسيالىق احۋالدى ودان ءارى جاقسارتۋ جانە ينۆەستورلاردىڭ زاڭدى قۇقىعىن قورعاۋ جۇيەسىن جەتىلدىرۋ مەملەكەتىمىزدىڭ ستراتەگيالىق مىندەتى ەكەنىن اتاپ ءوتتى.
«بىلتىر شەتەلدىك سەرىكتەستەر ءبىزدىڭ ەكونوميكامىزعا شامامەن 24 ميلليارد دوللار ينۆەستيتسيا سالدى. بۇل ونىڭ الدىنداعى جىلمەن سالىستىرعاندا 38 پايىزعا كوپ. ءبىر ايتا كەتەرلىگى, شەتەلدىك ينۆەستيتسيانىڭ 60 پايىزدان استامى قازىردىڭ وزىندە ەكونوميكانىڭ شيكىزاتتىق ەمەس سەكتورىنا تيەسىلى. ءبىز بۇل ينۆەستيتسيالاردى جوعارى باعالايمىز جانە شەتەلدىك سەرىكتەستەر الدىنداعى بارلىق مىندەتتەمەمىزدى ءمىنسىز ورىنداۋعا بار كۇشىمىزدى سالامىز. قازاقستان ينۆەستورلار ءۇشىن اشىق ەسىك ساياساتىن كۇشەيتە تۇسەدى», دەدى مەملەكەت باسشىسى.
قاسىم-جومارت توقاەۆ ەل ەكونوميكاسىنداعى كومىرتەگىن پايدالانۋ كولەمىن تومەندەتۋ جانە ەكونوميكالىق شىعىنداردىڭ الدىن الۋ ءۇشىن اتقارىلىپ جاتقان شارالارعا ەگجەي-تەگجەيلى توقتالدى. اتاپ ايتقاندا, قالدىقتاردى ساۋدالاۋعا قاتىستى ۇلتتىق جۇيەنى ەۋروپالىق جۇيەگە جاقىنداتۋ جونىندە ۇكىمەتتىڭ اتقارىپ جاتقان جۇمىسى تۋرالى مالىمدەدى.
«پارنيكتىك گاز قالدىقتارىنىڭ ۇلەستىك كوەففيتسيەنتتەرىنىڭ ەسەپتەۋ ادىستەمەسىن كۇشەيتۋ باعىتىندا قايتا قاراۋدى جەدەلدەتۋ قاجەت. ەسەپتەۋ ءتاسىلى ەۋروپالىق ادىسكە سايكەس, ياعني سالاداعى ەڭ وزىق 10 ءوندىرىس نەگىزىندە جاسالۋعا ءتيىس. وسى رەتتە ءوندىرىستىڭ نەگىزگى عانا ەمەس, قوسالقى تۇرلەرىن دە ەسكەرۋ كەرەك. سونداي-اق ەۋروپا وداعىنىڭ قالدىقتاردى ساتۋ جۇيەسى سياقتى ەكونوميكا سەكتورلارىن كەڭىنەن قامتۋ قاجەت. كەڭەس مۇشەلەرى ءىس جۇزىندە كومەك كورسەتۋگە ءتيىس. بۇل جۇمىستى كەلەسى جىلى اياقتاۋ قاجەت», دەدى پرەزيدەنت.
قازاقستان باسشىسى اتاپ وتكەن تاعى ءبىر ماڭىزدى مىندەت – اۋماقتاردى كوگالداندىرۋ جانە جاڭا القاپتارعا اعاش وتىرعىزۋ.
«مەنىڭ تاپسىرماممەن 2025 جىلعا دەيىن ەلىمىز بويىنشا ەكى ميلليارد اعاش وتىرعىزۋ جوسپارلانىپ وتىر. وتكەن جىلى 138 ميلليون, ال بيىل 280 ميلليون اعاش ەگىلدى. الايدا بۇل قارقىن جەتكىلىكسىز, ونى جىلدامداتۋ قاجەت. كەڭەس مۇشەلەرىن اتالعان باستامانى قولداپ, وسى ىسكە ەلەۋلى ۇلەس قوسۋعا شاقىرامىن», دەدى مەملەكەت باسشىسى.
پرەزيدەنت ەلىمىزدە گاز تۇتىنۋعا سۇرانىستىڭ ارتقانىن اتاپ ءوتىپ, كومىردى پايدالانۋدى ازايتۋ ىسىندە گاز سالاسىنىڭ ماڭىزدى ءرول اتقاراتىنىن ايتتى.
«گاز ەكسپورتىنا قاراعاندا ىشكى قاجەتتىلىكتەردى قامتاماسىز ەتۋ ماڭىزدى ەكەنىن قاداپ ايتقىم كەلەدى. ۇكىمەتكە تەڭىز كەن ورنىنىڭ اكتسيونەرلەرىمەن بىرلەسە وتىرىپ, ەكسپورتتالاتىن ەكى ميلليارد تەكشە مەتر گازدى ىشكى نارىققا قايتا باعىتتاۋدى تاپسىرامىن», دەدى قاسىم-جومارت توقاەۆ.
مەملەكەت باسشىسى جاڭارتىلاتىن جانە بالامالى ەنەرگيا كوزىن دامىتۋ الەۋەتىنىڭ ارتىپ كەلە جاتقانىنا توقتالدى. 2030 جىلعا قاراي ەلىمىزدىڭ ەنەرگيا تەڭگەرىمىندەگى جاڭارتىلاتىن ەنەرگيا كوزىن كەمىندە 15 پايىزعا دەيىن ارتتىرۋ مىندەتى قويىلدى.
سونىمەن قاتار پرەزيدەنت اتوم ەنەرگياسىن پايدالانۋدىڭ ماڭىزدى ەكەنىن اتاپ ءوتتى. ونىڭ پىكىرىنشە, جاڭارتىلاتىن ەنەرگيانىڭ تۇراقسىز جانە گاز تاراتۋ ءىسى شەكتەۋلى بولعان جاعدايدا «زالالسىز» اتوم ۇزدىكسىز ەنەرگيا بەرۋدىڭ جالعىز كوزى بولادى.
ايانا توعانبەك