اقتوبە. 22 ءساۋىر. اقتوبە وبلىسى, حرومتاۋ قالاسىندا 16 جانە 17 جاستاعى ەكى بوزبالا كولىگىمەن ادام تاسىپ, ناپاقاسىن ايىرىپ جۇرگەن ايەلدى ۇرىپ-سوعىپ, الىمجەتتىكپەن استىنداعى «ۆاز» ماركالى ماشيناسىن تارتىپ الىپ كەتكەن. بۇل تۋرالى «قازاقپارات» حابارلادى.
وبلىستىق ىشكى ىستەر دەپارتامەنتى تاراتقان دەرەككە قاراعاندا, جاپا شەككەن 30 جاستاعى ايەل حرومتاۋداعى «ۋيۋت» قوناق ءۇيى ماڭىنان تابىلعان. جەدەل تۇردە اۋرۋحاناعا جەتكىزىلىپ, ءتيىستى ەم-دومىن العان جۇرگىزۋشى كەلىنشەك ەسىن جيعان سوڭ وزىنە شابۋىل جاساعان كۇدىكتىلەردىڭ ءتۇر-ءتۇسىن پوليتسەيلەرگە اينىتپاي ايتىپ بەردى. ىلە الگى جاس جىگىتتەر ءتارتىپ ساقشىلارىنىڭ قولىنا ءتۇستى.
اقتوبە وبلىستىق ىشكى ىستەر دەپارتامەنتى ءباسپاسوز قىزمەتىنىڭ وكىلى ارداگەر ءۋايديننىڭ ايتۋىنشا, 16 جانە 17 جاستاعى ەكى جىگىت ۋاقىتشا ۇستاۋ اباقتىسىنا قامالدى. قازىر ولاردىڭ ۇستىنەن قىلمىستىق ءىس قوزعالۋدا. ال ايەلدىڭ كولىگى قالا سىرتىنان تابىلعان.
جولدىباي بازار.
دەرەككوز: «قازاقپارات».
فوتو: Idrive.kz.