گەرمانيانىڭ شتۋتگارت قالاسىندا تەننيستەن اتر ءتۋرنيرىنىڭ شىمىلدىعى ءتۇرىلدى. بۇل جارىستا قازاقستاننىڭ ءبىرىنشى راكەتكاسى الەكساندر بۋبليك تە كۇش سىناسىپ جاتىر.
تۇساۋكەسەر كەزدەسۋىن جەرلەسىمىز دەنيس كۋدلاعا قارسى وتكىزدى. ۋكراينادا تۋىپ-ءوسىپ, كەيىننەن اقش-قا قونىس اۋدارعان 29 جاستاعى ويىنشى بۇل كۇندەرى الەمدىك رەيتينگتە 77-ورىندا. وتە شيەلەنىستى وتكەن بۇل باسەكە 7:6, 7:5 ەسەبىمەن بۋبليكتىڭ پايداسىنا شەشىلدى. ەندى ەكىنشى كەزەڭدە قازاقستاندىق تەننيسشىنى وتە اۋىر سىناق كۇتىپ تۇر. ول ۇلىبريتانيالىق ەندي ماررەيمەن كۇش سىناسادى. 35 جاستاعى تۇماندى البيون ەلىنىڭ وكىلى كەزىندە اۋستراليانىڭ اشىق بىرىنشىلىگىن – بەس, ۋيمبلدوندى – ەكى جانە اقش-تىڭ اشىق بىرىنشىلىگىن ءبىر رەت ۇتىپ, الەمنىڭ ءبىرىنشى راكەتكاسى اتانعان. ودان بولەك ماررەي اتر دودالارىندا 46 مارتە جەڭىس تويىن تويلادى. قازىرگى كەزدە ۇزدىكتەر تىزىمىندە 68-ورىندا تۇرعان ول العاشقى اينالىمدا اۋستراليالىق كريستوفەر و’كوننەلدى 6:4, 6:3 ەسەبىمەن قاپى قالدىردى.
ال نيدەرلاندتىڭ حەرتوگەنبوس قالاسىنداعى WTA ءتۋرنيرىن ەلەنا رىباكينا ءساتتى باستادى. ول ەكى سەتتىك سايىستا امەريكالىق دجەيمي لوبتان ايلاسىن اسىردى. ەسەپ – 6:4, 7:5. ەكىنشى كەزەڭدە وتانداسىمىز اقش-تىڭ تاعى ءبىر وكىلى شەلبي رودجەرسپەن شەبەرلىك بايقاسادى.