شىعارماشىلىق ادام عۇمىرىن اڭىزعا اينالدىرادى دەگەنگە سەنۋ قيىن. دەسەك تە ونەر اسپانىندا جارقىلداي كورىنگەن ءار تالانتتىڭ ەسىمىنە تەرەڭدەپ ۇڭىلسەڭ, ءتۇرلى تراگەديا مەن دراماعا جولىعاسىڭ. سوندا جۇلدىزدى عۇمىر جاقسى ءومىر مە, الدە ء«تاتتى تامۇقتاي» سەزىلەتىن ازاپتى ءومىر مە دەيسىڭ. القيسسا.
پيكاسسو تۋرالى مىڭ سان اڭىز ايتىلادى. تالانتتى سۋرەتشىنىڭ عۇمىرى مەن شىعارماشىلىعى كوپتەگەن مادەني اڭگىمەگە تاقىرىپ بولدى. ول تۋرالى جازىلعان ماتەريالداردىڭ سانىندا شەك جوق. ءوزىنىڭ ءومىرىن دە سۋرەتكە اينالدىرا بىلگەن جيىرماسىنشى ءجۇز جىلدىقتىڭ تالانتى مەن اتاعى جارىسقان سۋرەتشىسى پيكاسسو, ونەردە وزگەشە كوركەمدىك وبراز بەن فورما جاسادى. سۋرەت الەمىنە ءبىر نازىك سەزىممەن كەلدى. ءتىپتى ونىڭ شىعارماشىلىعىنا انىقتاما بەرۋ دە ءبىرتۇرلى ورىنسىز سەكىلدى. پيكاسسوعا پيكاسسودان ارتىق ءسوز ايتۋ مۇمكىن بە ءوزى؟..
ونەرتانۋشىلار پابلو شىعارماشىلىعىن بىرنەشە كەزەڭگە بولەدى: كۋبيزممەن اۋەستەنۋى, سيۋررەاليزم ستيلىندە دە جازدى, سونىمەن قاتار پوستيمپرەسسيونيزم, «كوگىلدىر» جانە «قىزعىلت» تۇستەرمەن بايلانىستى جۇمباققا تولى كوركەمدىك كەزەڭدەرى.
ال مىنا كارتينا سۋرەتشىنىڭ «كوگىلدىر» ءتۇستى شىعارماشىلىق كەزەڭىندە سالىنعان. تۋىندىدا داستارقان باسىنداعى وتباسى بەينەلەنگەن. ونى قالاي اتاساڭىز دا, ءوز ەركىڭىز. «وتباسى», «وتباسىمەن بىرگە», «داستارقان باسىندا» نەمەسە ءجاي عانا ء«ومىر» دەسەڭىز دە بولادى.
ايتا كەتەيىك, پيكاسسونىڭ 1902-1905 جىلدار ارالىعىنداعى تۋىندىلارى كوك ءتۇستىڭ سۋىق ءارى قاراڭعى رەڭدەرىنە قانىق. بۇل ءتۇستىڭ استارىنان قارتايۋ, كەدەيلىك, قاسىرەت سىندى ءومىردىڭ قاتىگەز تۇستارى سەزىلۋى مۇمكىن. ونەرتانۋشىلاردىڭ ايتۋىنشا, پابلونىڭ جاقىن دوسى بۇل فانيدەن كەتۋى جۇرەككە اۋىر مۇڭ سالىپ, كۇڭگىرت سارىنداعى كارتينالار جازۋىنا سەبەپ بولعان دەسەدى.
قاسىرەت شەككەن قىلقالام شەبەرىنىڭ كوڭىلىنە, تەك شىعارماشىلىق مەدەۋ بولدى. پيكاسسوعا بۇرىننان قالىڭ جۇرتتان ءتۇرلى ۇسىنىستار تۇسەتىن-ءدى. ءدال وسى كۇيزەلىس ۋاقىتىندا سۋرەتشى سۇراعان جانداردىڭ ۇيىنە بارىپ, سۋرەتتەرىن سالدى. ءسىز كورىپ وتىرعان مىنا كارتينا دا سونداي ۇسىنىستاردىڭ جەمىسى.
1903 جىلى سولەر دەگەن بارسەلونالىق تىگىنشى ءوزى مەن ايەلىنىڭ پورترەتىن, وعان قوسا وتباسىلىق سۋرەتىن سالۋدى وتىنگەن ەدى. الايدا اۆتور ونىڭ ءۇشىنشى تىلەگىن ورىنداپ, وتباسىلىق كارتيناسىن جازدى.
بۇل تۋىندى مانەنىڭ «كوگالداعى تاڭعى اس» سۋرەتى سەكىلدى فرانتسۋز يمپرەسسيونيستەرىنىڭ اراسىندا كەڭ تاراعان جانردا جاسالعان. كارتيناداعى كەيىپكەرلەر – وتاعاسى مەن جۇبايى, ولاردىڭ ءتورت بالاسى جانە يت. ارقايسىسىنىڭ بەت-بەينەسى وزىندىك ەرەكشەلىكتەردى كورسەتكەنىمەن, ولاردىڭ جالپى سحەماتيكاسىنداعى پيكاسسوعا ءتان بىرتەكتىلىكتى بايقاماۋ مۇمكىن ەمەس. دەتالدارعا كەلەر بولساق, كەنەپتىڭ ورتاسىندا – اق داستارقان, ونىڭ ۇستىندە جەمىستەر, بوس ىدىس, بوتەلكە مەن قوياننىڭ ۇشاسى (تۋشا), ال قاسىندا – اڭشى مىلتىعى.
جوعارىدا ايتىپ وتكەنىمىزدەي, كارتينا شەبەردىڭ تۇنەك تۇنعان «كوگىلدىر» تۇسپەن اۋەستەنگەن كەزەڭىندە جازىلسا دا, تراگيزمنەن اۋلاق. مۇنداعى كوك ءتۇس, كەرىسىنشە, جىلى كورىنەدى, وتباسىلىق ىستىق ىقىلاستىڭ لەبى سەزىلەتىندەي.
پيكاسسونىڭ باسقا جۇمىستارى سىندى اتالعان كارتينا دا الەمدى مويىنداتتى. «سولەر وتباسى» دەگەن اتپەن دە تانىمال تۋىندى قازىر بەلگيانىڭ لەجە قالاسىنداعى زاماناۋي ونەر مۇراجايىندا ساقتاۋلى تۇر.