بوس جۇمىس ورىندارىنىڭ ونلاين جارمەڭكەسى وتەدى

ء«بىرىنشى كەزەكتەگى ماسەلە – جاستاردى جۇمىسقا تارتۋ. بۇل ءۇشىن ءىرى جانە ورتا كاسىپورىندارداعى بوس جۇمىس ورىندارىنا ونلاين جارمەڭكە وتكىزۋ ارقىلى جاستاردى ەڭبەكپەن قامتۋدى قولعا الدىق. بيىل مامىر ايىندا ERG كومپانيالار توبىمەن بىرلەسىپ, ءبىلىم بەرۋ ۇيىمدارىنىڭ تۇلەكتەرىن جانە 35-كە دەيىنگى جاستاردى جۇمىسقا ورنالاستىرۋدىڭ ونلاين-جارمەڭكەسى پيلوتتىق رەجيمدە ءوتتى. كومپانيا 350 جۇمىس ورنىن ۇسىندى. ءبىر اپتا ىشىندە جۇمىس بەرۋشىنىڭ تالاپتارىنا ساي كەلەتىن 159 جاس ىرىكتەۋدەن ءوتىپ, جۇمىسقا قابىلداندى. ولاردىڭ اراسىندا ەلىمىزدىڭ بارلىق ءوڭىرىنىڭ وكىلدەرى بار», دەدى ت. دۇيسەنوۆا ۇكىمەت وتىرىسىندا.

پيلوتتىق جوبانىڭ قورىتىندىسىن ءبىلىم جانە عىلىم, ۇلتتىق ەكونوميكا, تسيفرلىق دامۋ مينيسترلىكتەرى, تاۋ-كەن, مەتاللۋرگيا سالاسىنداعى كاسىپورىندار جانە «سامۇرىق-قازىنا» اكتسيونەرلىك قوعامىنىڭ وكىلدەرى جان-جاقتى زەردەلەگەن.

«سونىڭ ناتيجەسىندە بۇل كومپانيالارمەن «وسى جىل سوڭىنا دەيىن ەلەكتروندى ەڭبەك بيرجاسىنا 20 مىڭ بوس جۇمىس ورنىن ورنالاستىرۋ تۋرالى» كەلىسىمگە كەلدىك. ونىڭ ىشىندە IT سالاسى مەن «اۋىل – ەل بەسىگى» جوباسى دا بار. بوس ورىنداردىڭ العاشقى ونلاين-جارمەڭكەسى 24-30 ماۋسىم ارالىعىندا وتەدى. كەلەشەكتە اي سايىن تۇراقتى تۇردە ۇيىمداستىرۋ كوزدەلىپ وتىرعان جارمەڭكە تەك كاسىپورىن ورنالاسقان ايماق تۇرعىندارىنا عانا ەمەس, بارلىق قازاقستاندىقتارعا بىردەي قولجەتىمدى بولۋىن, جۇمىسقا قابىلداۋ پروتسەسىنىڭ اشىقتىعىن, جۇمىس ىزدەۋشىنىڭ ماقساتتى تاڭداۋىن جانە جۇمىس بەرۋشىلەردىڭ ساپالى ىرىكتەۋ مۇمكىندىگى بولۋىن قامتاماسىز ەتەدى», دەدى تامارا دۇيسەنوۆا.