جاڭا جۇيەگە كوشۋ باياۋ ءجۇرىپ جاتىر

بۇگىندە وبلىس ورتالىعىندا 1 300-گە تاياۋ كوپقاباتتى تۇرعىن ءۇي بار. وسى ايدىڭ سوڭىنا دەيىن كەم دە­گەندە مىڭعا جۋىق ءۇي باسقاراتىن جاڭا بىرلەستىكتەر قۇرىلۋى كەرەك. الايدا قازىر قوستاناي قالاسى بو­يىن­شا نەبارى 84 ميب, 17 جاي سەرىك­تەس­تىك قانا جۇمىس ىستەپ جاتىر.

– ميب-كە ءوتۋدىڭ باياۋ ءجۇرۋىنىڭ سەبەبى بۇرىنعى پاتەر يەلەرى كووپە­راتيۆتەرىنىڭ وكىلدەرى تاراپىنان تەرىس ناسيحات ءجۇرىپ جاتىر. ولار «بىزدەن كەتسەڭدەر ەرتەڭ پاتەر­لە­رىڭدە قۇبىر جارىلىپ, سۋ اعىپ جاتسا ونى جوندەيتىن مامان تاپپاي قالاسىڭدار نەمەسە 2-3 ەسە قىمبات باعاعا جوندەتەتىن بولا­سىڭ­دار» دەپ قورقىتىپ, كەدەرگى كەل­­­تىرىپ وتىر. مىنە, ۇكىمەت بەل­گى­لە­­گەن مەرزىمنىڭ اياقتالۋىنا ءبىر اق اي قال­دى. جۇرت ەندى عانا قي­­مىل­داي باستادى. ال­بەتتە, ءبىز كومەكتەسەمىز. بۇرىنعى جۇيەنىڭ وكىلدەرى ميب قۇرۋدى ءبىر جىلعا كە­يىن شەگەرەدى دەگەن جالعان اق­پا­رات تاراتىپ ءجۇر ەكەن. مۇنىڭ ءبارى بوس ءسوز. وسى سوڭعى ايدىڭ ىشىن­دە ولار تولىق جويىلىپ, ورنىنا ميب كەلۋى كەرەك. ولاي بولماعان جاعدايدا ولاردى زاڭ كۇشىمەن ءماجبۇرلى تۇردە جويۋعا تۋرا كەلەدى. تاياۋ­دا اكىمدىكتە وتكەن جيىنعا پا­تەر يەلەرى كووپەراتيۆتەرىنىڭ تو­راعا­لا­رىن شاقىرىپ, ءبىر اي­دىڭ ىشىندە ءۇي باسقارۋدىڭ جاڭا تۇ­رى­نە كوشۋ مىندەت ەكەنىن تاعى تۇسىن­دىردىك. ولار ۋادە بەردى. قازىر قوس­تا­نايداعى تۇرعىن ۇيلەردە جاپپاي جيىندار ءوتىپ جاتىر. ءبىز ءبارىن باقىلاۋدا ۇستاپ وتىرمىز, – دەدى قالالىق تۇرمىستىق-كوممۋنالدىق شارۋاشىلىق ءبولىمىنىڭ مامانى سايلاۋ اسىلباەۆ.

گاگارين كوشەسىندەگى 144 پاتەر­لى 14-ءشى تۇرعىن ءۇي بىلتىر پاتەر يە­­لەرىنىڭ كووپەراتيۆىنەن كەتىپ, قىر­­كۇيەك ايىندا ءوز الدىنا دەربەس مەنشىك يەلەرىنىڭ بىرلەستىگىن قۇرعان. بىلتىرعا دەيىن «پاتەر مەنىكى, ال كىرەبەرىس پەن اۋلادا, شاتىر مەن سىرتتاعى قوقىستا شارۋام جوق» دەگەن ۇستانىممەن ءومىر ءسۇرىپ كەلگەن بۇل ءۇيدىڭ تۇرعىندارى ەندى كىرەبەرىس ءدالىز دە, شاتىر دا, جەرتولە دە, ءتىپتى اۋلا مەن قوقىس الاڭى دا وزدەرىنىڭ ورتاق مەنشىگى ەكەنىن تۇسىنە باستاعان.

بۇل ۇيدە بۇگىندە ءبىر توراعا, ءۇش ءۇي كەڭەسى, ءبىر رەۆيزيالىق كوميسسيا بار. بىرلەستىك جۇمىس ىستەي باستاعان 8 ايدىڭ ىشىندە تۇرعىنداردان تۇسكەن ورتاق اقشاعا ءبىرسىپىرا جۇمىس اتقارىلدى. ميب ءتورايىمى جارنانى كوتەرگەن جوق. تۇرعىندار, سول بۇرىنعىداي, ءار پاتەردىڭ ءبىر شارشى مەترى ءۇشىن 47 تەڭگەدەن تولەيدى. ءۇيدىڭ كۇتىمىنە وسى قارجى دا جەتەدى. 144 پاتەردەن جينالعان اقشانىڭ 30 پايىزى ميب اكىمشىلىگى مەن كەڭسە تاۋارلارىنا كەتەدى, قالعانى ءۇي شارۋاشىلىعىنا جۇمسالادى. 144-ءشى ءۇيدىڭ ميب-ءى بۇگىنگە دەيىن جەرتولەدەگى بۇكىل قۇبىر جەلىسىن جاڭالاپ, شاتىردىڭ سۋاعارلارىن تولىقتاي اۋىستىرىپ الدى. اۋلا­دا­عى ەسكى تۇنگى جارىق كوزدەرىن الىپ تاستاپ, ورنىنا ۇنەمدى شامدار ورناتتى. ناتيجەسىندە, بۇعان دەيىن ەلەكتر قۋاتىنا شىعىنداپ كەلگەن تولەمنىڭ 50 پايىزى ۇنەمدەلدى. قازىر بۇل ءۇيدىڭ بىرلەستىگى اۋلانى كوگالداندىرۋ, ەسىكتىڭ الدىن سۋارۋ جەلىسىن جاساۋ جۇمىستارىن جۇرگىزىپ جاتىر.

– قوستانايدا «قامقور» جانە «ناش دوم» اتتى ەكى قاۋىمداستىق اشىلعان. بۇلار جاڭا اشىلىپ جاتقان ميب-تەرگە قۇقىقتىق قول­داۋ كورسەتەدى. ءبىز 2021 جىلدىڭ 1 قا­زانىندا قۇرىلدىق. باسىندا الاڭداۋشىلىق بولدى. قازىر ءبارى رەتتەلدى. جۇمىس ءجۇرىپ جاتىر, قار­­جى جەتكىلىكتى. بىراق كەيبىر ما­سە­لەلەردە بۇرىنعى پاتەر يەلەرى كووپەراتيۆى كەدەرگى كەلتىرىپ, كە­زىن­دە وزدەرى تۇرعىنداردان جي­نا­­عان اقشا مەن قۇجاتتاردى بەرمەي اۋرەگە سا­لىپ جاتىر. ءۇيدى ءالى دە بولسا بۇ­رىن­عىشا وزدەرى باسقارا بەرگىسى كەلەدى. وسىعان قا­را­ماستان, ميب باعدارلاماسىن ىلگەرىلەتە بەرۋ كەرەك. بۇعان قاجەت جاعدايدىڭ ءبارى بار. قازىر تۇرعىن ۇيگە قىزمەت كور­سەتەتىن كومپانيالار كوپ. مەن شتات­تا جالعىز ءوزىم جۇمىس ىستەيمىن. جۇ­مىسشى العان جوقپىن. ەگەر ءبىر شارۋانى ىستەۋ كەرەك بولسا, قىزمەت كور­سەتەتىن فيرمالاردان كاسىبي ما­­مان شا­قىر­تامىن. ول مىندەتىن اتقارىپ, جۇمىسىن بىتىرگەن سوڭ, قولىنا كە­لى­سىمدى اقشاسىن ۇستاتامىن. قا­زىر «كاسپي بانكپەن» جۇمىس ىس­تەپ جا­تىرمىز, وتە قولايلى. كىم­­­­­­نىڭ اقشا تاپسىرعانىن كۇن سا­يىن كورىپ وتىرامىن, – دەيدى «گا­گا­رين-14» ميب-ءىنىڭ ءتورايىمى ناتاليا مەدۆەدەۆا.

ونىڭ ايتۋىنشا, ميب-ءتىڭ ەڭ باس­تى ارتىقشىلىعى – تۇرعىندار ءوز ءۇيىن ءوزى باسقارىپ, وزدەرى جيناعان ورتاق اقشانىڭ قايدا جۇمسالىپ جاتقانىن باقىلاۋدا ۇستاپ وتىرادى. ءۇيدىڭ توزىڭقىراپ تۇرعان جەرىن جوندەۋدى دە كوپ بولىپ كەڭەسىپ شەشەدى. قىسقاسى, ءبىر تيىن ارتىق اقشا سىراپ بولمايدى.

زاڭ بويىنشا پاتەر يەلەرى كووپە­را­تيۆى ءوزىنىڭ ورنىنا قۇ­رىل­عان جاڭا بىرلەستىككە بۇكىل قۇ­جاتتاردى وتكى­زىپ, سوڭعى ءۇش جىل­دىڭ قارجىسى قانداي ماقساتقا جۇم­سالعانى تۋرالى ەسەپ بەرۋى كەرەك. بۇلاي بولماعان جاعدايدا ميب زاڭدى تۇلعا رەتىندە سوتقا شاعىمدانادى. سوڭعى كەزدەرى مۇنداي داۋلار جيىلەپ كەتكەنىمەن, سوتتا قارالىپ جاتقان ءىستىڭ ءبارى ميب-تەردىڭ پايداسىنا شەشىلىپ جاتىر.

قوستاناي وبلىسى