ەل تاعدىرىنا قاتىستى ماڭىزدى وقيعادان ۇلتتىق ۇلان اسكەري قىزمەتشىلەرى دە قالىس قالماي, ءوز داۋىستارىن بەردى. وسى ۋاقىتتا ۇلتتىق ۇلاننىڭ 100 پايىز جەكە قۇرامى ءوز داۋىستارىن بەردى. بۇل جونىندە اسكەري ۆەدومستۆونىڭ ءباسپاسوز قىزمەتى حابارلادى.
تاڭعى ساعات 6:00-دە 5573 اسكەري بولىمىندەگى №226 داۋىس بەرۋ ۋچاسكەسىنە العاشقىلاردىڭ ءبىرى بولىپ ۇلتتىق ۇلان باس قولباسشىسى, گەنەرال-مايور ەركىن بوتاقانوۆ كەلىپ, كونستيتۋتسيالىق رەفەرەندۋمگە داۋىس بەردى. وسىلايشا باس قولباسشى ءبىرىنشى بولىپ جەكە قۇرامدى وڭ وزگەرىستەرگە داۋىس بەرۋگە باستادى.
«ۇلتتىق ۇلان اسكەرى ەلىمىزدىڭ تىنىشتىعى مەن تۇراقتىلىعىنا جاۋاپتى. قانداي دا ءبىر جاعداي بولماسىن قۇقىقتىق ءتارتىپ اسكەرىنىڭ جاۋىنگەرلەرى جوعارى ازاماتتىق جاۋاپكەرشىلىك پەن بيىك پاتريوتتىق رۋحتى كورسەتە بىلگەن. رەفەرەندۋم ارقىلى ءبىز ەلىمىزدىڭ وڭ وزگەرىستەرى ءۇشىن داۋىس بەرەمىز. بۇگىن ءار اسكەري قىزمەتشى جوعارى باس قولباسشىمىز قاسىم-جومارت توقاەۆ ۇسىنعان وزگەرىستەرگە بەلسەندى قاتىسىپ, قولداۋ كورسەتەتىنىنە كامىل سەنەمىن», دەدى گەنەرال-مايور ەركىن بوتاقانوۆ.
ۇلتتىق ۇلان باس قولباسشىسىنىڭ تاربيە جانە الەۋمەتتىك-قۇقىقتىق جۇمىستار بويىنشا ورىنباسارى, حالىق قاھارمانى, پولكوۆنيك قايرات ۇمبەتوۆتىڭ ايتۋىنشا, اسكەري بولىمدەردە اشىلعان رەفەرەندۋم ۋچاسكەلەرىندە داۋىس بەرۋشىلەردىڭ بەلسەندىلىگى وتە جوعارى بولعان. اسكەري قىزمەتكەرلەردىڭ جەكە قۇرامى عانا ەمەس, ولاردىڭ وتباسى دا ساياسي ناۋقانعا تۇگەل قاتىسقان.
داۋىس بەرۋ زاڭ بويىنشا تاڭعى ساعات 6:00-دە باستالدى. رەفەرەندۋمعا قاتىسۋشىلاردىڭ باسىم بولىگى – 18-گە ەندى تولعان, تۇڭعىش رەت داۋىس بەرۋ قۇقىعىنا يە بولعان جاس ساربازدار.
ەلوردا قۇراماسى 5573 اسكەري بولىمىندە وتان الدىنداعى بورىشىن اتقارىپ جاتقان قاتارداعى جاۋىنگەر رايىمبەك بەكەجانوۆ تا وسىنداي تۇڭعىش داۋىس بەرۋشىلەردىڭ ءبىرى. «مەن تاۋەلسىز قازاقستاننىڭ ازاماتى رەتىندە ەلىمىزدە وڭ وزگەرىستەردىڭ بولعانىن قالايمىن. سول ءۇشىن بۇگىن ازاماتتىق پارىزىمدى اتقارىپ, داۋىسىمدى بەردىم», دەيدى جاس سارباز.
تاراز قالاسىنان شاقىرىلعان قاتارداعى ەراسىل كارىبوز دا العاشقى رەت داۋىس بەرۋدە. اسكەري كيىم كيگەلى وتكەن 7 اي ىشىندە قىزمەتىنىڭ قىر-سىرىن, قوعامدىق ءتارتىپتىڭ ماڭىزىن, تاتۋلىق پەن ىنتىماقتىڭ باعا جەتپەس قۇندىلىق ەكەنىن ۇعىپ قالىپتى. «وتانىمىزدا بەيبىت ءومىر مەن كەلىسىم ورناپ تۇر. سوعان ماقتانامىن!», دەيدى ول.
«ۇيىمشىلدىقپەن وتكەن داۋىس بەرۋدىڭ ناتيجەسىن قورىتىندىلاپ تا ۇلگەردىك. بىزگە قاراستى بارلىق 37 جابىق رەفەرەندۋم ۋچاسكەسىندە تىركەلگەندەر 100 پايىز داۋىس بەردى. زاڭ بۇزۋشىلىقتار تىركەلگەن جوق. ساعات 12-دە تولىعىمەن تاڭداۋىمىزدى جاساپ ۇلگەردىك», دەيدى پولكوۆنيك قايرات ۇمبەتوۆ.
ايتا كەتەيىك, ۇلتتىق ۇلاننىڭ اسكەري بولىمدەردە سايلاۋ قۇقىعى بار 13 مىڭعا اسا ازامات قىزمەت ەتەدى.