تاۋەلسىزدىگىمىزدىڭ تۇمارى سانالاتىن رامىزدەردىڭ قاشاندا قادىرى بيىك, ابىرويى اسقاق بولۋعا ءتيىس. جىل سايىن ماۋسىمنىڭ العاشقى اپتاسىندا اتالىپ وتىلەتىن ايشىقتى مەرەكە بيىل دا ءوز جالعاسىن تاۋىپ, ەلىمىزدىڭ تۇكپىر-تۇكپىرىندە ءتۇرلى ءىس-شارا وتكىزىلدى. وسىعان وراي نۇر-سۇلتان قالاسى اكىمدىگىنىڭ «استانا جاستارى» مەملەكەتتىك كوممۋنالدىق مەكەمەسىنىڭ ۇيىمداستىرۋىمەن اۆتوكولىكتەر شەرۋى ءوتتى.
مەملەكەتتىك رامىزدەر تاۋەلسىزدىك نىشانى رەتىندە ەرەكشە قادىرلەنىپ, ولارعا بيىك مارتەبە بەرىلەدى. سوندىقتان رەسپۋبليكا ازاماتتارىنىڭ مەملەكەتتىك رامىزدەردى قاستەرلەۋى – پارىز.
«بيىلعى كولىكتەر شەرۋى تۇران داڭعىلى, «قازاقستاندىق كۇن» مونۋمەنتىنەن باستاۋ الىپ, تاۋەلسىزدىك داڭعىلى, «قازاق ەلى» مونۋمەنتىنىڭ الاڭىنا دەيىن جالعاستى. كولىكتەر شەرۋى قالامىزدا 2017 جىلدان بەرى ءداستۇرلى تۇردە ۇيىمداستىرىلىپ كەلەدى. اتالعان ءىس-شارا قالامىزدىڭ تۇرعىندارى مەن قوناقتارىن اتاۋلى مەرەكەمەن ەرەكشە قۇتتىقتاۋعا مۇمكىندىك بەرەدى», دەدى «استانا جاستارى» جاستار رەسۋرستىق ورتالىعىنىڭ جەتەكشىسى شىڭعىس تىلەۋلين.
ۇيىمداستىرۋشىلاردىڭ پىكىرىنشە, ءىس-شارانىڭ باستى ماقساتى – قازاقستاندىق ءپاتريوتيزمدى ناسيحاتتاۋ, جاس ۇرپاقتى تاۋەلسىزدىك نىشاندارىنا قۇرمەتپەن قاراۋعا تاربيەلەۋ.
«مەملەكەتتىك بايراقپەن جابدىقتالعان 30-عا جۋىق جەڭىل كولىك قالا كوشەلەرىمەن ءجۇرىپ ءوتتى. رامىزدەر كۇنى – حالقىمىز ءۇشىن اسا قاستەرلى مەيرامداردىڭ ءبىرى. وسىعان وراي ءداستۇرلى اۆتوكولىكتەر شەرۋىن ۇيىمداستىرۋدىڭ ءمانى زور. كولىكتەر كوك بايراقپەن بەزەندىرىلىپ, شەرۋ ادامدار تىعىز ورنالاسقان قالانىڭ وڭ جاعالاۋىن قامتىدى. قالا تۇرعىندارى مەن جاستاردىڭ پاتريوتتىق سەزىمىن كۇشەيتىپ, مەرەكەلىك كوڭىل كۇي سىيلاۋ – ءبىزدىڭ باستى ماقساتىمىز. وتكەن جىلى ەلوردانىڭ سول جاعالاۋىنا اۆتوشەرۋ جاساساق, بيىل وڭ جاعالاۋدى تاڭداپ وتىرمىز. تاعى ءبىر ماقساتىمىز – قالامىزدا استانا اۆتوكلۋبتار وداعى بار ەكەنىن كورسەتۋ. اتالعان كلۋبتار ەلوردامىزدا وتەتىن ءارتۇرلى مەرەكەگە بەلسەندى قاتىسىپ, وزدەرىنىڭ قولۇشىن سوزادى. بارلىق قاتىسۋشىعا العىسىمىزدى ءبىلدىرىپ, ساتتىلىك تىلەيمىز», دەدى «استانا جاستارى» جاستار رەسۋرستىق ورتالىعىنىڭ مامانى امانگەلدى ولجاس.
اۆتوكلۋب مۇشەلەرى دە رامىزدەر كۇنىنىڭ ماڭىزى جوعارى ەكەنىن ايتىپ, جىل سايىن ۇيىمداستىرىلىپ كەلە جاتقان كولىكتەر شەرۋى اۋقىمدى ءىس-شارالاردىڭ ءبىرى ەكەنىن جەتكىزدى.
«نۇر-سۇلتان قالاسىنىڭ جاستار ساياساتى ماسەلەلەرى باسقارماسى جىل سايىن ءداستۇرلى تۇردە رامىزدەر كۇنىنە وراي وتكىزەتىن كولىكتەر شەرۋىنە استانا اۆتوكلۋبتار وداعى تۇراقتى تۇردە قاتىسىپ كەلەدى. كولىكتەرىمىزدە كوك تۋىمىز جەلبىرەپ تۇرسا, ول قالا تۇرعىندارى مەن قوناقتارىنا مەرەكەلىك كوڭىل كۇي سىيلاپ قانا قويماي, ولاردىڭ پاتريوتتىق سەزىمىن وياتىپ, ەلىمىزدىڭ نەگىزگى نىشاندارى سانالاتىن رامىزدەرىنە دەگەن قۇرمەتىن ارتتىراتىنى انىق. بۇگىندە اتالعان شەرۋ ءوز جالعاسىن تاپتى. ءبىزدىڭ كولىكتەر تۇران داڭعىلىنان باستاپ, قالانىڭ وڭ جاعالاۋىنا قاراي 20 شاقىرىمنان اسا جول جۇرەدى. كولىگىمىزدەگى كوك بايراقتار كورىكتى قالامىزدىڭ ءسانىن ودان سايىن ارتتىرا تۇسەدى», دەدى Skoda club Astanا وكىلى.
كوك تۋىمىزدى جەلبىرەتىپ كوشە بويلاي جۇرگەن كولىكتەر كورگەن جاننىڭ كوڭىلىنە ماقتانىش سەزىمىن ۇيالاتاتىنى ءسوزسىز.
«ەلىمىزدىڭ ەلتاڭباسى, كوك تۋى, ءانۇرانى وسىدان تۋرا 30 جىل بۇرىن بەكىتىلىپ, قابىلدانعان بولاتىن. بۇگىندە, مىنە, تاۋەلسىز قازاقستاننىڭ ۇرپاعى بايراقتى بيىك ۇستاپ, ءانۇراندى اسقاقتاتا شىرقاپ, ايتۋلى مەرەكەنى اتاپ وتۋدە. ءبىز دە ەلوردامىزداعى ەلەۋلى ءىس-شارانىڭ كۋاگەرى بولعانىمىزعا قۋانىشتىمىز. كولىكتەردەگى جەلبىرەگەن كوك بايراقتار كوزدىڭ جاۋىن الادى. بويىمىزدى ەرەكشە سەزىم بيلەپ, بولاشاققا دەگەن سەنىمىمىزدى ارتتىرعانداي ايرىقشا قۋات بەرەدى. ءوزىمنىڭ, وتباسىمنىڭ اسىعا كۇتەتىن مەرەيلى مەرەكەلەرىنىڭ ءبىرى – وسى رامىزدەر كۇنى. جىل وتكەن سايىن مەملەكەتتىك ناقىشتارعا دەگەن قۇرمەتىمىز ارتا تۇسكەندەي. وعان سەبەپ, وسىنداي پاتريوتتىق باعىتتاعى ءىس-شارالاردىڭ ارتا تۇسكەنى دەر ەدىم. كەلەر جىلى دا كەرەمەت كولىكتەر شەرۋىنىڭ كۋاگەرى بولاتىنىمىز انىق», دەدى قالا قوناعى, اتىراۋلىق راۋشان وتەعالي.