جىل سوڭىنا دەيىن سۇيىتىلعان گازدىڭ باعاسى قىمباتتاۋى مۇمكىن. بۇل تۋرالى ەنەرگەتيكا ءمينيسترى بولات اقشولاقوۆ ماجىلىستە وتكەن ۇكىمەت ساعاتىنان كەيىن باق وكىلدەرىنە بەرگەن جاۋابىندا ايتتى, دەپ حابارلايدى Egemen.kz.
«وزدەرىڭىز بىلەسىزدەر, تابيعي گازدىڭ باعاسىن بىرلەسكەن بۇيرىقپەن بەكىتىپ قويدىق. ورتاشا دەڭگەيدە 8 پايىز وسەدى. ال, سۇيىتىلعان گازعا كەلسەك, جىل سوڭىنا دەيىن زاڭدى تۇردە بەكىتۋگە مۇمكىندىك جوق. ءبىز ونى باقىلاۋعا الۋدى ماقسات ەتىپ وتىرمىز. ۇكىمەت ءبىزدىڭ مينيسترلىككە, باسەكەلەستىكتى قورعاۋ جانە دامىتۋ اگەنتتىگىنە, ۇلتتىق ەكونوميكا مينيسترلىگىنە وسىنداي مىندەت جۇكتەپ وتىر», دەدى ب.اقشولاقوۆ.
ءمينيستردىڭ ايتۋىنشا, بۇل ماسەلەدە گاز ءوندىرىپ وتىرعان زاۋىتتاردىڭ دا جاعدايىن ويلاۋ قاجەت.
«قازىر سۇيىتىلعان گازدىڭ ورتاشا باعاسى ءبىر تونناسىنا 28 مىڭ تەڭگە. بۇل, ارينە, وزىندىك قۇنىن اقتامايدى. بەكىتىلگەن باعا 28 مىڭ تەڭگە بولسا, وزىندىك قۇنى 60-90 مىڭ تەڭگەنىڭ اراسىندا قۇبىلادى, ءار زاۋىتتا ارقالاي. سوندىقتان ءبىز ونى شامامەن كوتەرۋىمىز كەرەك. كەلەسى 180 كۇندىككە سۇيىتىلعان گازدىڭ باعاسى ءسال ءوسۋى مۇمكىن. ول 20 پايىزدان ارتىق ەمەس. مىسالى, قازىر ءبىر تونناسى 28 مىڭ تەڭگە بولسا, 36 مىڭ تەڭگە بولادى. باسقاشا ايتقاندا, كوتەرمە باعا 1 ليترگە 27 تەڭگەدەن بولسا, 29 تەڭگە بولادى. جانارماي قۇيۋ ستانسالارىنداعى باعانى بۇكىل قۇزىرەتتى ورگاندار باقىلاۋىنا الادى. باعانى نەگىزسىز كوتەرۋگە جول بەرىلمەيدى. ونداي فاكتىلەر بويىنشا ءتيىستى شارالار قولدانىلادى», دەدى ول.