كونستيتۋتسيالىق تۇزەتۋلەر بويىنشا داۋىس بەرۋ جالپىحالىقتىق سيپاتتا بولدى. بۇل تۋرالى ورتالىق رەفەرەندۋم كوميسسياسىنىڭ توراعاسى نۇرلان ءابدىروۆ ايتتى, دەپ حابارلايدى Egemen.kz.
وسى جىلدىڭ 6 ماۋسىمىندا تاڭعى 08-00-دەگى جاعداي بويىنشا ەلىمىزدىڭ بارلىق وڭىرىندەگى جانە شەتەلدەگى بارلىق 10 012 رەفەرەندۋم ۋچاسكەسىندە داۋىستاردى ساناۋ اياقتالدى. كونستيتۋتسيالىق تۇزەتۋلەر بويىنشا داۋىس بەرۋ جالپىحالىقتىق سيپاتتا بولدى.
«رەسپۋبليكالىق رەفەرەندۋم تۋرالى» كونستيتۋتسيالىق زاڭنىڭ 31-بابىنا سايكەس, ەگەر داۋىس بەرۋگە قۇقىعى بار وسىنداي ازاماتتاردىڭ جارتىسىنان استامى قاتىسسا, رەفەرەندۋم وتكىزىلدى دەپ ەسەپتەلەدى. رەسپۋبليكالىق رەفەرەندۋمعا شىعارىلعان كونستيتۋتسياعا وزگەرتۋلەر مەن تولىقتىرۋلار ەگەر ولار ءۇشىن وبلىستاردىڭ, رەسپۋبليكالىق ماڭىزى بار قالالاردىڭ جانە استانانىڭ كەمىندە ۇشتەن ەكىسىندە داۋىس بەرۋگە قاتىسقان ازاماتتاردىڭ جارتىسىنان استامى داۋىس بەرسە, قابىلداندى دەپ سانالادى», دەدى نۇرلان ءابدىروۆ.
بۇعان دەيىن حابارلاعانىمىزداي, رەفەرەندۋمعا قاتىسۋعا قويىلعان ماسەلەنىڭ وڭ شەشىمىن جاقتاپ داۋىس بەرگەن ازاماتتاردىڭ سانى ەلىمىزدىڭ بارلىق وڭىرلەرىندە داۋىس بەرۋگە قاتىسقانداردىڭ 77,18 پايىزىن قۇرايدى. ال بۇل 6 163 863 ادام.
بۇل 17 ءوڭىردىڭ ارقايسىسىندا ءابسوليۋتتى كوپشىلىكتى قۇراپ وتىر. وسىلايشا وبلىستاردىڭ, رەسپۋبليكالىق ماڭىزى بار قالالاردىڭ, استانانىڭ كەمىندە ۇشتەن ەكىسىندە قولداۋ قاجەتتىگى تۋرالى كونستيتۋتسيالىق زاڭ تالابى ساقتالدى.