جىل باسىنان بەرى كاسپي تەڭىزىنىڭ جاعالاۋىنان 219 يتبالىقتىڭ ولەكسەسى تابىلدى, دەپ حابارلايدى قر ەكولوگيا, گەولوگيا جانە تابيعي رەسۋرستار مينيسترلىگىنە سىلتەمە جاساپ.
«بيىل ءساۋىر مەن مامىردا تابىلعان ءولى يتبالىقتاردىڭ اراسىندا ەشقانداي ايىرماشىلىق جوق. بارلىعىنىڭ دا ولەكسەسى ىدىراپ كەتكەن. ماڭعىستاۋ وبلىسى ەكولوگيا دەپارتامەنتىنىڭ قىزمەتكەرلەرى جەرگىلىكتى اۋا مەن سۋدان سىناما الدى. زەرتتەۋ ناتيجەسى بويىنشا كونتسەنتراتسيانىڭ ارتىق مولشەرى انىقتالعان جوق. يتبالىقتاردىڭ قىرىلۋىنا سەبەپ بولاتىنداي زياندى زاتتار دا تابىلمادى. سونىمەن قاتار گيدروبيولوگيا جانە ەكولوگيا ينستيتۋتى ولگەن يتبالىقتاردىڭ ۇزىندىعى مەن سالماعىن ولشەۋ, جىنىسى مەن جاسىن انىقتاۋ ءۇشىن ولاردىڭ قابىرشاقتارى مەن تىرناعى ارقىلى زەرتتەۋ جۇرگىزدى», دەلىنگەن ۆەدومستۆو حابارلاماسىندا.
ەكولوگيا مينيسترلىگىنىڭ رەسمي اقپاراتىنا سايكەس يتبالىقتار قىرىلۋىنىڭ بولجامدى سەبەبىن ماۋسىمدا جاريالاۋ جوسپارلانىپ وتىر.
قازىرگى ۋاقىتتا زەرتتەۋ جۇمىستارى جالعاسىپ جاتىر.
سونداي-اق, ۆەدومستۆو جىل باسىنان بەرى كاسپي جاعالاۋىنان 219 يتبالىقتىڭ ولەكسەسى تابىلعانىن راستادى.
«بۇعان دەيىن تابىلعان يتبالىقتاردىڭ قاڭقالارى قاتتى ىدىراپ كەتكەنى حابارلاندى. سول سەبەپتى توكسيكولوگيالىق, گيستولوگيالىق جانە ۆيرۋسولوگيالىق زەرتتەۋ جۇرگىزۋ ءۇشىن سىناما الۋ مۇمكىن بولمادى. وسى ورايدا مينيسترلىك يتبالىقتار قىستا ولگەن دەگەن بولجام جاساپ وتىر. تابىلعان يتبالىقتاردىڭ ولەكسەسى جايىق-كاسپي وبلىس ارالىق باسسەيندىك بالىق شارۋاشىلىعى ينسپەكتسياسى جانە جەرگىلىكتى اتقارۋشى ورگانداردىڭ كۇشىمەن سانيتارلىق تالاپتاردى ساقتاي وتىرىپ جويىلادى», دەلىنگەن حابارلامادا.