استانا. 21 ءساۋىر.كولىك جانە كوممۋنيكاتسيا مينيسترلىگى الداعى ۋاقىتتا «انتاليا-الماتى», «انتاليا-استانا» جانە «انتاليا-قاراعاندى» باعىتتارى بويىنشا ەكى جاقتان دا ۇشاتىن 16 رەيس اشىلاتىنىن مالىمدەدى. بۇل تۋرالى كولىك جانە كوممۋنيكاتسيا مينيسترلىگىنىڭ ءباسپاسوز قىزمەتىنە سىلتەمە جاساعان Today.kz حابارلادى.
اتالعان رەيستەر تۋرالى قازاقستان مەن تۇركيا تاراپتارىنىڭ اۆياتسيا ۇيىمدارى كەلىسكەن. جالپى, العاشقىدا تۇركيا جاعىنان تۇسكەن بۇل ۇسىنىستى مينيسترلىكتىڭ ازاماتتىق اۆياتسيا كوميتەتى مۇقيات زەرتتەگەن. ناقتىلاي ايتقاندا, اتالعان كوميتەت قازاقستان-تۇركيا باعىتىنداعى تۋريستىك تاسىمالداۋ نارىعىنىڭ مونيتورينگى ناتيجەسى بويىنشا وسىنداي شەشىم قابىلدادى. بۇل مونيتورينگتى جۇرگىزۋ بارىسىندا قازاقستاندىق تۋروپەراتورلار, كاسىپكەرلەردىڭ ۇلتتىق پالاتاسى, قازاقستان تۋريستىك قاۋىمداستىعى جانە يندۋستريا جانە جاڭا تەحنولوگيالار مينيسترلىگىنىڭ تۋريزم يندۋسترياسى كوميتەتى قاتىستىرىلدى.
ازاماتتىق اۆياتسيا كوميتەتىنىڭ توراعاسى بەكەن سەيداحمەتوۆ: «ءبىز تۇركيالىق ارىپتەستەرىمىزبەن ەكى ەل اراسىنداعى ۇشۋلار مۇمكىندىگىن الدەنەشە رەت تالقىلاعان بولاتىنبىز. بىزدىڭ ازاماتتارىمىزدىڭ اراسىندا اتالعان باعىتتاردىڭ جوعارى سۇرانىسقا يە ەكەندىگىن ەسكەرە وتىرىپ, 2014 جىلدىڭ جازعى كەزەڭىنە تولىقتاي اپتاسىنا قوسىمشا 16 رەيس اشۋ تۋرالى شەشىم قابىلداندى. باستى شارت –رەيستەردىڭ تۇراقتى بولۋى. بۇل اتالعان رەيستەر بەكىتىلگەن كەستە بويىنشا جۇزەگە اسادى», – دەپ اتاپ ءوتتى.
جولدىباي بازار.
دەرەككوز: Today.kz.
فوتو: Inform.kz.