اتىراۋ. 21 ءساۋىر. بۇدان بۇرىن حابارلانعانىنداي, 19 ءساۋىر كۇنى كەشكە اتىراۋ وبلىسىندا №41 «الماتى-اتىراۋ» باعىتىنداعى جولاۋشىلار پويىزى اپاتقا ۇشىراعان ەدى. بۇل تۋرالى «قازاقستان تەمىر جولى» ۇق» اق ءباسپاسوز قىزمەتىنىڭ دەرەگىنەت سىلتەمە جاساعان egemen.kz ءتىلشىسى حابارلادى.
وقيعا سول كۇنى كەشكىلىك 17 ساعات 55 مينوتتە قىزىلقوعا اۋدانىنداعى جانتەرەك-كەنباي تەمىرجول بەكەتتەرىنىڭ ارالىعىندا ورىن العان. سوستاۆ قۇرامىندا 19 ۆاگون, ونىڭ ىشىندە 16 جولاۋشىلار ۆاگونى بولعان. وسى ۆاگوندارمەن 586 جولاۋشى جانە 26 جولسەرىك اتىراۋعا باعىت العان. الدىن الا ايتقىمىز كەلگەنى, 12 ۆاگوننىڭ رەلستەن شىعىپ كەتكەنىنە, سونىڭ ىشىندە 8 ۆاگوننىڭ ءبىر جانىنا قيسايىپ قالعانىنا قاراماستان, جولاۋشىلار اراسىندا ادام شىعىنى بولماسا دا, ءار دەڭگەيدەگى جاراقاتتار العاندار بار.
وسىناۋ سۋىت حابار اتىراۋلىق قۇتقارۋشىلاردى اياعىنان تىك تۇرعىزدى. ويتكەنى, الدىمەن بارىنەن ادام ءومىرى قىمبات ەدى. جولاۋشىلاردى ءبىرىنشى كەزەكتە قۇتقارۋ قاجەت. پويىز اپاتى جونىندەگى سۋىت حاباردان سوڭ وقيعا ورنىنا قۇتقارۋ قىزمەتىنىڭ وكىلدەرىمەن بىرگە شۇعىل جەتكەن وبلىس اكىمىنىڭ ورىنباسارى ءسالىمجان ناقپاەۆ تومەندەگى جايتتاردى ءمالىم ەتتى. ونىڭ ايتۋىنشا, جولاۋشىلاردى قۇتقارۋعا توتەنشە جاعداي مينيسترلىگىنە قاراستى قۇرىلىمدارمەن بىرگە «قاينارمۇنايگاز», «دوسسورمۇنايگاز», «ەمبىمۇنايەنەرگو» جانە «ماقات» ءجوب سەكىلدى كاسىپورىندار جولاۋشىلاردى ماقات اۋدانىنىڭ ورتالىعىنا شۇعىل جەتكىزۋدى ۇيىمداستىرۋعا اتسالىستى. وقيعا ورنىندا 45 مەديتسينا قىزمەتكەرى بار 6 جەدەل جاردەم بريگاداسى جۇمىس جاسادى.
سول كۇنى كەشكىلىك 22 ساعات 30 مينوتتە ەكى تىكۇشاقپەن اتىراۋ قالاسىنا جەدەل جەتكىزىلگەن 8 ادامنىڭ ۇشەۋى اۋرۋحاناعا جاتقىزىلدى. وقيعا ورنىنان 435 ادام اۆتوبۋستارمەن جانە ۆاحتالىق كولىكتەرمەن ماقات ستانساسىنا, ال 169 ادام وقيعا ورنىنان 6-7 شاقىرىمداي قاشىقتاعى كەنباي تەمىرجول بەكەتىنەن ماقاتقا دەيىن پويىزبەن جەتكىزىلگەن. ال ماقات ستانساسىندا اپاتقا ۇشىراعان پويىز جولاۋشىلارعا پسيحولوگيالىق تۇرعىدان قولداۋ كورسەتىلدى.
ماقات اۋداندىق اۋرۋحاناسىنا جەتكىزىلگەن 26 جولاۋشىنىڭ التاۋى ءارتۇرلى جاراقاتتارمەن جاتقىزىلدى. جەكسەنبىگە, ياعني, 20 ساۋىرگە تۇنگى 01 ساعات 15 مينوتتە ماقات ستانساسىنان 6 جولاۋشى ۆاگونى بار ارنايى پويىز جاساقتالدى. وسى جولاۋشى پويىزىمەن جولاۋشىلار 03 ساعات 10 مينوتتە اتىراۋ قالاسىنا جەتكىزىلدى. جولاۋشىلاردى مەكەن-جايلارىنا جەتكىزۋ ءۇشىن 10 اۆتوبۋس ۇيىمداستىرىلدى. مەديتسينالىق جانە پسيحولوگيالىق كومەك بەرۋ ءۇشىن 5 جەدەل جاردەم بريگاداسى, 4 پسيحولوگ كۇتىپ تۇردى.
«الماتى-اتىراۋ» پويىزىندا بولعان جولاۋشىلار اراسىنان اۋرۋحاناعا تۇسكەن 10 ادامنىڭ ەكەۋىنىڭ جاعدايى اۋىر», – دەگەن اتىراۋ وبلىستىق دەنساۋلىق ساقتاۋ باسقارماسىنىڭ باسشىسى مەڭدىحان وتەپقاليەۆتىڭ ايتۋىنا قاراعاندا, قازىرگى كەزدە وبلىستىق اۋرۋحانادا اپات سالدارىنان زارداپ شەككەن 6 ادام جاتىر. اۋىر جاراقات العانداردىڭ ءبىرىنىڭ جاعى سىنعان, بەتى تىلىنگەن. ال ەكىنشىسىنىڭ قابىرعالارى سىنعان. بۇلارعا قوسا ماقات اۋداندىق اۋرۋحاناسىندا ءتورت ادام ەمدەلۋدە.
اتىراۋ تەمىر جول جەلىلىك ءبولىمىنىڭ باس ينجەنەرى جانىبەك جونتۇرباەۆتىڭ ايتۋىنشا, اپاتتىڭ سالدارىن جويۋ جۇمىستارىنا «قازاقستان تەمىر جولى» اق-نان 218 ادام, 22 بىرلىك تەحنيكا, 8 ەلەكتر ستانساسى جانە 2 قالپىنا كەلتىرۋ پويىزى جۇمىلدىرىلعان. جەكسەنبىدە, ناقتىلاي ايتقاندا, 20 cاۋىردە 05 ساعات 57 مينوتتە ب ۇلىنگەن 325 مەتر تەمىر جول بولىگى قالپىنا كەلتىرىلىپ, پويىزدار قوزعالىسى قالپىنا كەلدى. ايتقانداي, ەمىر جولداعى اپات سالدارى تولىق جويىلعانشا, 9 جولاۋشى, 34 جۇك پويىزىنىڭ قوزعالىسى شەكتەلدى.
ماماندار جولاۋشىلار پويىزىنىڭ اپاتقا ۇشىراۋىنا سەبەپ بولار بىرنەشە نۇسقا قاراستىرىلىپ جاتقانىن ايتادى. ارنايى قۇرىلعان كوميسسيا ناقتى نە سەبەپ بولعانىن ءبىر اپتادان سوڭ جاريا ەتپەك. ازىرگە اپاتتىڭ سەبەبى بەلگىسىز, الايدا, مۇنداي اپاتتان ساباق الۋ جاعى تەك ارنايى كوميسسيانى عانا ەمەس, بارشانى, ياعني, قاراپايىم جولاۋشىدان تەمىرجولشىعا دەيىن, ءتىپتى, سالالىق مينيسترلىكتەگىلەردى, ءتىپتى ۇكىمەتتى دە ويلانتۋى ءتيىس.
جولداسبەك شوپەعۇل.
دەرەككوز: egemen.kz.
فوتو: راحىم قويلىباەۆ.