5 ماۋسىمدا كونستيتۋتسياعا وزگەرىستەر مەن تولىقتىرۋلاردى قابىلداۋ ماسەلەسى بويىنشا رەسپۋبليكالىق رەفەرەندۋم وتكىزىلەدى. ەرتەڭ, 4 ماۋسىمدا ساعات 00:00-دە رەفەرەندۋم الدىنداعى ۇگىت جۇرگىزۋ اياقتالادى, دەپ حابارلايدى Egemen.kz باس پروكۋراتۋرا ءباسپاسوز قىزمەتىنە سىلتەمە جاساپ.
«بۇل ۇگىتكە, سونىڭ ىشىندە قوعامدىق پىكىرگە سۇراۋ سالۋ ناتيجەلەرىن نەمەسە رەفەرەندۋم ناتيجەلەرى بولجامدارىن جاريالاۋمەن ۇشتاسقانعا رەفەرەندۋم وتكىزىلەتىن كۇننىڭ الدىنداعى كۇنى جانە ول وتكىزىلەتىن كۇنى, ياعني 4 جانە 5 ماۋسىمدا تىيىم سالىنادى (كونستيتۋتسيالىق زاڭنىڭ 7-بابىنىڭ 4-تارماعى)», دەلىنگەن حابارلامادا.
وسى كۇندەرى ۇگىت جۇرگىزىلگەن جاعدايدا اقبتك-نىڭ 102-بابى بويىنشا جاۋاپقا تارتىلاتىنى ايتىلعان.
«ەكى نەمەسە ودان دا كوپ رەت نە باسقا بىرەۋ ءۇشىن داۋىس بەرۋ نەمەسە ۋچاسكەلىك رەفەرەندۋم كوميسسياسى مۇشەسىنىڭ ازاماتتارعا باسقا ادامدار ءۇشىن داۋىس بەرۋگە مۇمكىندىك بەرۋ ماقساتىندا داۋىس بەرۋگە ارنالعان بيۋللەتەندەردى بەرۋ اقبتك-ءنىڭ 108 جانە 110-باپتارى بويىنشا جاۋاپتىلىققا اكەپ سوعاتىنىنا دا نازار اۋدارامىز. كونستيتۋتسياعا (83-باپ) سايكەس پروكۋراتۋرا ورگاندارى رەفەرەندۋمعا دايىندىق پەن ونى وتكىزۋدىڭ بارلىق ساتىلارىندا زاڭدىلىقتىڭ ساقتالۋىنا جوعارى قاداعالاۋدى قامتاماسىز ەتەدى», دەلىنگەن حابارلامادا.
باس پروكۋراتۋرا زاڭدىلىقتى قامتاماسىز ەتۋ جانە قۇقىق بۇزۋدىڭ الدىن الۋ ماقساتىندا ازاماتتاردى, قوعامدىق بىرلەستىكتەر مەن بۇقارالىق اقپارات قۇرالدارىن قولدانىستاعى زاڭنامانى قاتاڭ ساقتاۋعا شاقىردى.