ەنەرگەتيكا مينيسترلىگى دۇنيەجۇزىلىك بانكتىڭ گرانت كومەگى اياسىندا ەنەرگيا ءوندىرۋشى جانە ەنەرگيا بەرۋشى ۇيىمدارعا تەحنيكالىق اۋديت جۇرگىزۋ بويىنشا جۇمىستى باستادى. بۇل تۋرالى ۆەدومستۆو باسشىسى بولات اقشولاقوۆ ءماجىلىس دەپۋتاتتارىنىڭ ساۋالىنا جولداعان جاۋابىندا ءمالىم ەتتى, دەپ حابارلايدى Egemen.kz.
«مينيسترلىك ەنەرگيا كوزدەرىنە تەحنيكالىق اۋديت جۇرگىزۋ جونىندەگى ءىس-شارالار جوسپارىن ازىرلەدى. جوسپاردا جالپى پاسپورتتاۋ جانە ەلەكتر ەنەرگياسىن گەنەراتسيالاۋ وبەكتىلەرىنىڭ تسيفرلىق كارتاسىن قالىپتاستىرۋ جولىمەن ەنەرگيا كوزدەرىنىڭ كامەرالدىق تەحنيكالىق ءاۋديتىن, ەسەپ جاساي وتىرىپ, ەنەرگيا كوزدەرىنىڭ تەحنيكالىق ءاۋديتىن جۇرگىزۋ كوزدەلەدى. جەلىلەردى جاڭعىرتۋ بويىنشا جۇمىس جىل سايىن جانە جوسپارلى تۇردە اتقارىلادى, بىراق ەنەرگيا بەرۋشى ۇيىمدار قاراجاتىنىڭ شەكتەۋلى بولۋىنا بايلانىستى ەلەكتر جەلىلەرىن قىسقا مەرزىمدە جاڭعىرتۋ مۇمكىن ەمەس», دەپ جازادى مينيستر.
ونىڭ مالىمەتىنە سۇيەنسەك, بۇگىنگى تاڭدا ەلدەگى ەنەرگيا بەرۋشى ۇيىمداردىڭ 70%-دان استامى جەكە مەنشىكتە.
«مينيسترلىك دۇنيەجۇزىلىك بانكتىڭ گرانت كومەگى اياسىندا ەنەرگيا ءوندىرۋشى جانە ەنەرگيا بەرۋشى ۇيىمدارعا تەحنيكالىق اۋديت جۇرگىزۋ بويىنشا جۇمىستى باستادى. بۇل جۇمىس ەكى كەزەڭدە ىسكە اسادى. ءبىرىنشى كەزەڭدە ەلەكتر ستانتسيالارىنىڭ ءاۋديتىن جۇرگىزۋ جانە ەكىنشى كەزەڭدە ەلەكتر جەلىلەرى ۇيىمدارىندا جۇزەگە اسىرۋ بولجانىپ وتىر. دۇنيەجۇزىلىك بانكپەن وسى جۇمىستى جۇرگىزۋگە تەحنيكالىق تاپسىرما كەلىسىلدى. قازىرگى ۋاقىتتا بانك وسى قىزمەتتە حالىقارالىق تاجىريبەسى بار ساراپشىلاردى ىزدەستىرە باستادى. سونداي-اق بۇل جۇمىسقا ەلەكتر ەنەرگەتيكاسى سالاسىندا وندىرىستىك تاجىريبەسى مول جەرگىلىكتى تاۋەلسىز ساراپشىلار تارتىلادى. وسى جۇمىستىڭ قورىتىندىلارى ەنەرگيا كاسىپورىندارىنىڭ نەگىزگى جابدىعىنىڭ ناقتى تەحنيكالىق جاي-كۇيىن ايقىندايدى», دەپ جازىلعان ءمينيستردىڭ جاۋابىندا.