مەملەكەتىمىزدىڭ تۇراقتى دامۋى ۇلتتىق عىلىم جۇيەسىنىڭ دۇرىس قۇرىلىمدانۋىمەن تىعىز بايلانىستى. سوڭعى جىلدارى ەلىمىزدىڭ ءبىلىم جانە عىلىم جۇيەسىندە قوردالانىپ قالعان وزەكتى ماسەلەلەر قوعامدا ءجيى تالقىلانىپ, كەڭ كولەمدە ايتىلىپ جۇرگەنى بەلگىلى.
وسى ورايدا مەملەكەت باسشىسى قاسىم-جومارت توقاەۆتىڭ ۇلتتىق عىلىم اكادەمياسىنىڭ سالتاناتتى سەسسياسىنىڭ جۇمىسىنا قاتىسۋى عىلىمي قاۋىمداستىقتى ءبىر سەرپىلتىپ تاستادى دەۋگە نەگىز بار. ويتكەنى كوپتەن كۇتكەن كەزدەسۋ عالىمداردى تولعاندىرعان كوپتەگەن تۇيتكىلدى ماسەلەنىڭ شەشىمىن تابۋىنا مۇمكىندىك بەردى.
ۇلتتىق عىلىم اكادەمياسى مەملەكەتتىك مارتەبەسىنەن ايىرىلىپ, قوعامدىق ۇيىم دەڭگەيىنە تومەندەپ كەتكەننەن كەيىن, عىلىمدى دامىتۋدىڭ بۇرىنعى قالىپتاسقان جۇيەسىنەن مۇلدە اۋىتقىپ كەتتى. سالدارىنان عىلىمدى قارجىلاندىرۋ, باسەكەلەستىك, عىلىمدى جاريالاۋ, ءوندىرىستى تاجىريبە جۇزىندە ىسكە اسىرۋ جاعىنىڭ السىرەپ كەتكەنى جاسىرىن ەمەس. وسى ورايدا عىلىمي كادرلار الەۋەتىنىڭ جوعارى ەكەنىن نازارعا الاتىن بولساق, پرەزيدەنتتىڭ اكادەمياعا مەملەكەتتىك مارتەبە بەرىپ, بيۋدجەت ەسەبىنەن قارجىلاندىرۋ ماسەلەسىن كوتەرۋى وتاندىق عىلىم سالاسىنىڭ الدىندا ۇلكەن بەلەستەر تۇرعاندىعىن كورسەتەدى.
ايتا كەتەتىن ماڭىزدى ءبىر ماسەلە, پرەزيدەنتتىڭ ءبىلىم جانە عىلىم مينيسترلىگىن ەكى ۆەدومستۆوعا ءبولۋ تۋرالى ۇسىنىسى عىلىمدى كەشەندى دامىتۋعا, ونىڭ باسەكەگە قابىلەتتىلىگىن قامتاماسىز ەتۋگە بارىنشا كوڭىل بولگەندىگىنىڭ ايعاعى. بۇل سالالىق ۆەدومستۆولاردىڭ جەكە-جەكە قارجىلاندىرىلۋىنا, بۇدان ءارى قاراي كادر دايىنداۋ, الەمدىك عىلىم سالاسىنىڭ بازاسىنا ەنۋ سياقتى كەشەندى مىندەتتەردىڭ ىسكە اسۋىنا ىقپال ەتەتىن بولادى.
مەملەكەت باسشىسى سونىمەن بىرگە عىلىمي-زەرتتەۋ جۇمىستارىنىڭ ساپاسىن ارتتىرۋعا توقتالىپ, ۇلتتىق دايەكسوز الۋ جۇيەسىن قۇرۋ قاجەتتىگىن العا تارتتى. مۇنداي قادام وتاندىق عىلىمي جۋرنالداردىڭ الەۋەتىن ارتتىرۋعا, الەمدىك يندەكستەرگە تىركەلۋ جاعىنا كوڭىل بولۋگە مۇمكىندىك بەرەتىنى ءسوزسىز. وسىعان قاراعاندا, ۇلتتىق عىلىمدى دامىتۋ ءوزىنىڭ كلاسسيكالىق جۇيەسىنە جاقىنداي تۇسەتىنى انىق. قوعامدىق-گۋمانيتارلىق عىلىمداردى, ياعني قازاق ادەبيەتى, ولكەتانۋ, تاريحتى, ءتىلدى دامىتۋ ماسەلەسىندەگى اسقارالى مىندەتتەر وتاندىق عىلىمدى دامىتىپ, ۇلتتىق مۇددەگە قىزمەت ەتۋگە, باسەكەگە قابىلەتتىلىككە جول اشادى دەگەن سەنىم زور.
كەنجەحان ماتىجانوۆ,
م.اۋەزوۆ اتىنداعى ادەبيەت جانە ونەر ينستيتۋتىنىڭ ديرەكتورى,
فيلولوگيا عىلىمدارىنىڭ دوكتورى, ۇعا كوررەسپوندەنت-مۇشەسى