پرەمەر-ءمينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردىنىڭ ريم قالاسىندا يتاليانىڭ سىرتقى ىستەر جانە حالىقارالىق ىنتىماقتاستىق ءمينيسترى لۋيدجي دي مايومەن كەزدەسۋىندە اپتاسىنا 2 رەت قاتىنايتىن «الماتى – ميلان» اۋە رەيسىن ورىنداۋ ماڭىزدىلىعىن اتاپ ءوتتى, دەپ حابارلايدى Egemen.kz.
تاراپتار قازاقستان مەن يتاليانىڭ جوعارى باسشىلىعى اراسىنداعى بايلانىستاردىڭ قارقىندى دامىپ كەلە جاتقانىن جانە ەكىجاقتى ءوزارا ءىس-قيمىلدى نىعايتۋعا دەگەن ءوزارا قىزىعۋشىلىقتىڭ ارتىپ وتىرعانىن اتاپ ءوتتى. سونىمەن قاتار سىرتقى ساياسي ۆەدومستۆولاردىڭ باسشىلارى ساياسي, ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى ودان ءارى دامىتۋ مەن تەرەڭدەتۋدى جانە ستراتەگيالىق ارىپتەستىك رۋحىندا شارت-قۇقىقتىق بازانى نىعايتۋدى تالقىلادى. ۇكىمەتارالىق جانە پارلامەنتارالىق بايلانىستاردى دامىتۋعا بارىنشا جاردەمدەسۋ جونىندە ۋاعدالاستىققا قول جەتكىزىلدى. قازاقستان ءسىم باسشىسى يتاليامەن ءوزارا ءىس-قيمىل سپەكترىن كەڭەيتۋ ماڭىزدىلىعىن اتاپ ءوتتى.
«يتاليا قازاقستاننىڭ ەۋروپاداعى باستى ساۋدا سەرىكتەستەرىنىڭ ءبىرى. ءبىز ءسىزدىڭ ەلىڭىزبەن ىنتىماقتاستىققا ۇلكەن ءمان بەرەمىز. ديپلوماتيالىق قاتىناستاردىڭ 30 جىلى ىشىندە ءبىز جاقسى ناتيجەلەرگە قول جەتكىزدىك», دەدى م.تىلەۋبەردى.
ءوز كەزەگىندە مينيستر ل. دي مايو يتاليالىق تاراپ ءوزارا ءتيىمدى ىنتىماقتاستىقتى كەڭەيتۋگە جانە جوعارى دەڭگەيدەگى ساپارلارمەن الماسۋعا مۇددەلى ەكەنىنە سەندىردى.
«قازاقستان ەۋروپالىق وداقپەن كەڭەيتىلگەن ارىپتەستىك پەن ىنتىماقتاستىق تۋرالى كەلىسىمگە قول قويعان ورتالىق ازياداعى جالعىز ەل. ءبىز ورتالىق ازيا وڭىرىندەگى سەنىمدى سەرىكتەسىمىزبەن الداعى ۋاقىتتا دا ءوزارا ءىس-قيمىل جاساۋعا دايىنبىز», دەپ اتاپ ءوتتى يتالياندىق مينيستر.
ايتا كەتەيىك, جوعارى دەڭگەيدەگى كەزدەسۋ يتاليانىڭ ۇلتتىق كۇنى قارساڭىندا ءوتتى. وسىعان وراي, قر ءسىم باسشىسى قازاقستان پرەزيدەنتى قاسىم-جومارت توقاەۆتىڭ يتاليا پرەزيدەنتى سەردجو ماتتارەللاعا جولداعان قۇتتىقتاۋىن جەتكىزدى. ەكىجاقتى ىنتىماقتاستىقتىڭ ماڭىزدى ەلەمەنتى ساۋدا-ينۆەستيتسيالىق ءوزارا ءىس-قيمىل ەكەنى بەلگىلى. وسىعان بايلانىستى يتاليانىڭ ىسكەر توپتار وكىلدەرىمەن «دوڭگەلەك ۇستەل» وتكىزىلدى. ءىس-شاراعا يتالياندىق تاراپتان يتاليا سىرتقى ىستەر جانە حالىقارالىق ىنتىماقتاستىق ءمينيسترىنىڭ ورىنباسارى, قازاقستان-يتاليا ونەركاسىپ جانە ەكونوميكالىق ىنتىماقتاستىق جانە الماسۋ جونىندەگى ۇكىمەتارالىق جۇمىس توبىنىڭ تەڭ توراعاسى مانليو دي ستەفانو قاتىستى.
ءىس-شارا بارىسىندا ەكى ەل اراسىنداعى ساۋدا جانە ينۆەستيتسيالىق بايلانىستاردى كەڭەيتۋ بويىنشا بىرلەسكەن جۇمىس جولدارى تالقىلاندى. يتاليالىق بيزنەسمەندەر قازاقستاندا وڭدەۋ ونەركاسىبى, قۇرىلىس, كولىك جانە لوگيستيكا, اۋىل شارۋاشىلىعى, ماشينا جاساۋ جانە جاسىل ەنەرگەتيكا سالالارىندا ءوزارا ءتيىمدى جوبالاردى ىسكە اسىرۋعا قىزىعۋشىلىق تانىتتى.
«الماتى – ميلان» باعىتى بويىنشا اپتاسىنا 2 رەت جيىلىكپەن تىكەلەي اۋە قاتىناسىن اشۋدىڭ ماڭىزدىلىعى اتاپ ءوتىلدى, بۇل ەكى ەلدىڭ ساۋدا-ەكونوميكالىق بايلانىسىن دامىتۋعا ىقپال ەتەتىن بولادى. يتاليا قازاقستان ەكونوميكاسىنىڭ ءىرى ينۆەستورلارىنىڭ ءبىرى. قر ۇلتتىق بانكىنىڭ دەرەكتەرى بويىنشا 2021 جىلى يتاليادان تىكەلەي شەتەلدىك ينۆەستيتسيا كولەمى 122,8 ملن اقش دوللارىن قۇرادى.
ەلدەر اراسىنداعى ءوزارا تاۋار اينالىمىنىڭ كولەمى 2021 جىلى 9,6 ملرد دوللار (ەكسپورت - 8,8 ملرد جانە يمپورت - 0,8 ملرد) قۇرادى.