«جازعى كينو» – جان جادىراتار جوبا

«قازاقكونتسەرت» مەملەكەتتىك كون­تسەرت­تىك ۇيىمىنىڭ «قازاقفيلم» اق جانە ۇلتتىق كينونى قولداۋ مەم­لەكەتتىك ورتالىعىمەن بىرلەسە ۇيىم­داستىرعان جوباسىنىڭ نەگىزگى ماقساتى – بالالارعا ونەردىڭ ۇزدىك تۋىندىلارىن قولجەتىمدى ەتۋ, ولاردىڭ بو­يىنا مادەني قۇندىلىقتاردى ءسىڭىرۋ, ادامگەرشىلىك ءھام رۋحاني تۇرعىدا دامۋىنا وڭ ىقپالىن تيگىزۋ. سونىڭ ىشىندە اسىرەسە كوپبالالى, الەۋمەتتىك تۇرعىدان از قامتىلعان وتباسىلاردان شىققان, ەرەكشە كومەككە مۇقتاج بالالار مەن جاسوسپىرىمدەر, جەتىمدەر ءۇيىنىڭ تاربيەلەنۋشىلەرىنە بارىنشا ونەر مەرەكەسىن سىيلاۋدى مۇرات تۇتىپ وتىر.

–  وسكەلەڭ ۇرپاق – ءبىزدىڭ بولاشاعى­مىز. سوندىقتان بالدىرعانداردىڭ ءتالىم-تاربيەسىنە, رۋحاني بىلىمىنە باسا ءمان بەرىپ, بار جاقسىلىعىمىزدى بالا­لارعا ارناۋىمىز كەرەك. مەملەكەت باسشىسى قاسىم-جومارت كەمەل ۇلى 2022 جىلدى «بالالار جىلى» دەپ جاريالاپ, وسكەلەڭ ۇرپاقتىڭ باقىتتى بالالىق شاعى – ءبىز­دىڭ جالپىۇلتتىق مىندەتىمىز دەپ اتاپ وتكەن بولاتىن. ءبىز دە وسى ۇندەۋگە ۇلەسى­مىزدى قوسىپ, وسىنداي اۋ­قىم­دى جوبانى قولعا الدىق. جوبا جاز بويى جالعاسادى. بۇدان بولەك, بالالارعا ارنالعان ءىس-شارالار الداعى ۋاقىتتا قازاقكونتسەرت ۇسىناتىن «بالالار فيلارمونياسى» دەگەن كوپسالالى جوباعا ۇلاسادى, دەپ اتاپ ءوتتى «قازاقكونتسەرت» مەملەكەتتىك كونتسەرتتىك ۇيىمىنىڭ باسشىسى اقتوتى رايىمقۇلوۆا.

اقتوتى راحمەتوللاقىزى ايتىپ وت­كەن­دەي, جان جادىراتار «جازعى كي­نو» الەۋمەتتىك جوباسى اياسىندا بالا­لارعا «كۇلتەگىن», «مۇزبالاق», «ەر توستىك جانە ايداھار», «كەنجە قىز» اني­ماتسيالىق تۋىندىلارمەن بىرگە سونداي-اق «پاراليمپيەتس», «ۆرەميا پاتريوتوۆ», «بوكسەر», «كانيكۋلى وففلاين» جانە تاعى دا باسقا وتاندىق وزىق تۋىندىلار, كوركەم, تاريحي كينو فيلمدەر تەگىن كورسەتىلەدى. اۋقىمدى ءىس-شارا ەلىمىزدىڭ ەڭ ۇلكەن «قازاقستان» كينو-كونتسەرتتىك زالىندا وتەدى. بالدىرعاندار جاز بويى ونەردىڭ وزىق تۋىندىلارىمەن سۋسىنداپ, رۋحاني ءبىلىمىن بايىتاتىن بولادى.

«جازعى كينو» جارقىن جوباسى­نىڭ سالتاناتتى اشىلۋ ءراسىمى بالدىرعان­داردىڭ ەسىندە ۇزاق ۋاقىت ساقتالارى ءسوزسىز. ويتكەنى بۇل كۇنى بالالارعا بار قازاقتىڭ ولجاسىنا اينالعان اتاقتى رەجيسسەر ابدوللا قارساقباەۆتىڭ «مەنىڭ اتىم – قوجا» كينوتۋىندىسى كورسەتىلدى. ءىس-شاراعا كەلگەن بالدىرعاندار فيلم­دە باستى ءرولدى سومداعان اكتەر, قا­زاقستاننىڭ ەڭبەك سىڭىرگەن قايرات­كەرى نۇرلان سانجارمەن جۇزدەسىپ, سۇحبات­تاسۋ مۇمكىندىگىنە يە بولدى. بۇ­عان قوسا, كىشكەنتاي كورەرمەندەر ارنايى مەرەكەلىك كونتسەرتتى تاماشالاپ, «قازاقستان» ورتالىق كونتسەرت زالى بويىن­شا ەكسكۋرسياعا قاتىستى.

سونىمەن قاتار بالالاردى ونەرگە باۋلۋ ماقساتىندا بۇل كۇنى سۋرەت ونەرى مەن گيپەررەاليستىك ءمۇسىن جاساۋ با­عىتى بويىنشا بەلگىلى سۋرەتشى, قازاق­ستاننىڭ ەڭبەك سىڭىرگەن قايراتكەرى گۇلميرا تەلعوزيەۆا مەن تانىمال ءمۇ­سىن­شى ايدوس ەسماعامبەتوۆ شەبەرلىك ساباقتارىن وتكىزىپ, ايتۋلى جوبا اياسىندا جاس سۋرەتشى مەيىرىم شىمىربەكتىڭ «عاجاپ الەم» اتتى ەرەكشە كورمەسى دە مەرەكەدە باس قوسقان بالعىنداردىڭ مەيرامىنا ۇسىنىلعان تاماشا تارتۋ بولدى.

سۋرەتشى, گيپەررەاليست-ءمۇسىنشى, «100 جاڭا ەسىم» جوباسىنىڭ جەڭىمپا­زى, «مادەنيەت سالاسىنىڭ ۇزدىگى» ايدوس ەسماعامبەتوۆتىڭ جۇمىستارى دا كورمە تورىنەن ورىن الىپ, ءمۇسىنشى وتكىزگەن شەبەرلىك ساباقتارى بالدىرعانداردىڭ تاعى ءبىر تىنىسىن اشقانداي. ايدوس جان بىتىرگەن ابىلاي حان, اباي قۇنانباي ۇلى, باراك وباما, نۇرسۇلتان نازارباەۆ, روزا باعلانوۆا سىندى ەل مەن الەم تاري­حىن­داعى كورنەكتى تۇلعالاردىڭ اينىتپاي جاسالعان سيليكوندى بوداندىق مۇسىندەرى ونەرگە قىزىعاتىن تالاي بالعىن جاستىڭ كوكەيىن­دەگى كوپ سۇراققا جاۋاپ بەرىپ, ارمانىنا ءبىر تابان جاقىنداتا تۇسكەنى انىق.

– ارينە, بۇگىنگى شەبەرلىك ساباعىما قاتىسۋشىلار ەرەكشە توپ. ولار – الەمى كىرشىكسىز تاپ-تازا بالالار. سۇراقتارى دا سونداي شىنايى. ەلىمىزدە اسا كەڭ قانات جايا قويماعان ايتۋلى ونەر تۇرىنە دەگەن قىزىعۋشىلىقتارى دا ايرىقشا. بالالارمەن اڭگىمەلەسىپ, ولاردىڭ اڭعال دا ادال, بىراق سونشالىقتى شىنايى سۇراقتارىنا جاۋاپ بەرىپ ءوزىم دە ءبىر جاساپ قالدىم. ال شەبەرلىك ساباققا كەل­سەك, البەتتە ساناۋلى عانا مينۋتتا ءمۇسىن جاساۋدىڭ قىر-سىرىنا تولىقتاي قانىقتىرۋ مۇمكىن ەمەس. بىراق بارىنشا بۇل تاماشا ونەردىڭ الىپپەسىن ۇعىندىرۋعا تىرىستىم, شىعارماشىلىق قۇپيالارىممەن ءبولىسىپ, بالالاردىڭ وزدەرىنە تاجىريبە دە جاساپ كوردىم. ولاردىڭ ەرەكشە ەموتسيالارىن كورىپ شەبەرلىك ساباعىم بالالار كوڭىلىنەن شىقتى عوي دەپ ءتۇيدىم, دەپ اسەرىمەن ءبولىستى تاريحي تۇلعالارعا جان ءبىتىرىپ جۇرگەن جاس تالانت ايدوس ەسماعامبەتوۆ.

ءدال قازىر جىر الىبى – جامبىل جا­باەۆ­تىڭ ءمۇسىنىن جاساپ جاتقان ايدوستىڭ بولاشاققا باعىتتالعان جوسپارلارى دا اۋقىمدى. سونىڭ ءبىرى – ءمۇسىن ونەرىنە قىزىعاتىن تالانتتى بالالاردىڭ باسىن قوسىپ, ءوزىنىڭ جەكە شەبەرحاناسىن اشىپ, ونەردىڭ وسى ءبىر ەرەكشە ءتۇرىن ەلىمىزدە كەڭىنەن ناسيحاتتاپ, جان-جاقتى دامىتۋ ەكەن. «ول قۋانىشتى كۇننىڭ دە اۋىلى الىس ەمەس» دەيدى ءوزى نىق سەنىممەن. ايدوس سىندى تالانتتى تالاي جانعا تىڭ يدەيا سىيلاپ, تالاي جاس ورەننىڭ تانىمىنا توڭكەرىس جاساعان ايتۋلى جوبانىڭ بولاشاعى لايىم جارقىن بولسىن دەيىك, ەندەشە. «جازعى كينونىڭ» بالالارعا بەرەرى مەن بولاشاققا سەبەر ءدانى جەمىستى بولعاي.