مەكتەپ ليگاسى مارەگە جەتتى

ءتۋرنيردى ۇيىمداستىرۋشىلاردىڭ ءبىرى مارات ءداۋىتوۆتىڭ ايتۋىنشا, بالالار اراسىندا ءۇش ايعا دەيىن سوزىلعان مۇنداي ءىرى جارىستار وڭىردە 2005 جىلدان كەيىن وتپەگەن كورىنەدى. سوندىقتان بيىل ءبىرىنشى رەت جالاۋىن كوتەرگەن مەكتەپ باسكەتبول ليگاسى وبلىستاعى ايتۋلى وقيعالاردىڭ ءبىرى ەكەنى ءسوزسىز.

سپورت جاناشىرلارى كەلەشەكتە اتالعان باس­كەتبول ليگاسىنىڭ اۋقىمى بۇدان دا كەڭەيە ءتۇسىپ, بۇكىل وبلىس مەكتەپتەرىن قامتيتىنىن ايتادى. جارىسقا بيىل باسكەتبول سپورتى جاقسى دامىپ كەلە جاتقان قوستاناي مەن رۋدنىي مەكتەپتەرىنىڭ وقۋشىلارى عانا قاتىسىپ وتىر. جاس باسكەتبولشىلار الدىمەن ىشكى قالالىق جارىستاردا ىرىكتەۋ جارىستارىندا باق سىناستى. ودان سۇرىنبەي وتكەن ۇزدىك كوماندالار سۋپەرفينالدا كەزدەستى.

– ءتۋرنيردى ەكى كەزەڭگە ءبولىپ وتكىزۋگە تۋرا كەلدى. الدىمەن رۋدنىيدا, ودان كەيىن وبلىس ورتا­لىعىندا ويىندار ءوتتى. بيىل تۇڭعىش رەت ۇيىم­داستىرىلىپ وتىرعان مەكتەپ باسكەتبول ليگا­سىنىڭ قاناتقاقتى جوبا ەكەنىن ايتا كەتۋ كەرەك. بۇل جوبا اياسىنداعى جارىستاردى كەلەسى وقۋ جىلى ەرتەرەك قولعا الامىز. قازان ايىنىڭ ەكىنشى جارتىسىنان باستاپ, 2023 جىلعى ءساۋىردىڭ ورتاسىنا دەيىن اياقتاۋدى جوسپارلاپ وتىرمىز. مەكتەپ باسكەتبول ليگاسىنىڭ باستى ماقساتى – بالالار اراسىنداعى جارىستاردىڭ جۇيەلى ءوتىپ تۇرۋىن قامتاماسىز ەتە وتىرىپ, ەندى عانا ءوسىپ كەلە جات­قان تالاپكەر باسكەتبولشىلار اراسىنداعى ىشكى باسەكەنى ارتتىرۋ. ويتكەنى سپورتشىنىڭ شەبەرلىگى جوعارى باسەكە جاعدايىندا عانا شىڭ­دالادى, – دەيدى مارات ءداۋىتوۆ.

وبلىستىق سپورت باسقارماسىنداعىلاردىڭ سوزىنشە, جارىس وتە باستاعان ءۇش ايدىڭ ىشىندە وقۋ­شىلاردىڭ شەبەرلىك دەڭگەيىنىڭ ەداۋىر وسكەنى باي­قالادى, كوماندالاردىڭ ويىن ورنەگى دە ايشىق­تالا تۇسكەن. بۇل ورايدا ماماندار دەنەشىنىق­تىرۋ مۇعالىمدەرىنىڭ ەڭبەگى وراسان زور دەيدى. ال ءتۋرنيردى باستان-اياق باقىلاپ شىققان ساراپشىلار جارىس بارىسىندا بالالاردىڭ جاقسى ويىن تەحنيكاسىن, كەيبىر كوماندالاردىڭ كەزدەسۋدە ءابجىل قيمىلداپ, شاپشاڭ شابۋىلداپ, تاكتيكالىق ويىننىڭ وزىق ۇلگىسىن كورسەتە بىلگەنىن اتاپ ءوتتى.

– الدىمەن مەكتەپ باسكەتبول ليگاسىن ءتيىستى دەڭگەيدە ۇيىمداستىرۋعا قولداۋ كورسەتكەن قوستا­ناي جانە رۋدنىي قالالارىنداعى ءبىلىم بولىم­دەرىنە شىنايى ريزاشىلىق بىلدىرگىم كەلەدى. تۋر­نيرگە قاتىسۋشىلارعا ەستەلىك سىيلىقتار, ديپلوم­دار مەن كۋبوكتار ساتىپ الىپ, قارجىلاي كومەك كورسەتكەن دەمەۋشىلەرىمىزگە دە راحمەت. ول كىسىلەردىڭ ورنى قاشاندا بولەك. بيىل جارىسقا قاتىسا الماعان كوپتەگەن ءبىلىم مەكەمەسى ەندى بۇل تۋرنيرگە ۇلكەن قىزىعۋشىلىق تانىتىپ وتىر. سوندىقتان الداعى جىلى جارىسقا قاتىساتىن كوماندالاردىڭ سانى ەداۋىر كوپ بولادى, – دەدى مارات ءداۋىتوۆ.

مەكتەپ باسكەتبول ليگاسىنىڭ سۋپەرفينالىندا 4-6 سىنىپتار بويىنشا قىزدار اراسىندا قوس­تاناي قالاسىنداعى №4 ورتا مەكتەپتىڭ كومان­داسى, ال ۇلدار اراسىندا قوستانايداعى №1 مەكتەپ-ليتسەيدىڭ وقۋشىلارى جەڭىمپاز اتاندى. 7-8 سىنىپتار اراسىندا رۋدنىيدىڭ №5 گيمنا­زياسى ءبىرىنشى ورىندى جەڭىپ الدى. ال 9-11 سىنىپ­تار اراسىندا ەشبىر كومانداعا دەس بەرمەگەن №5 قوستا­ناي قالالىق ورتا مەكتەبىنىڭ ۇلدارى مەن №29 ورتا مەكتەپتىڭ قىزدارى جەڭىس تۇعىرىنان كورىندى.

قوستاناي وبلىسى