قوستانايداعى ماشينا جاساۋ زاۋىتىندا الاش كوسەمى ءاليحان بوكەيحان ۇلىنىڭ مۇراسىن زەردەلەپ, ناسيحاتتاۋ ماقساتىندا «بوكەيحان ۇلى وقۋلارى» اتتى ءىس-شارا ءوتتى. جيىنعا تاريحشى عالىمدار, قوعام بەلسەندىلەرى, مۇعالىمدەر مەن ستۋدەنتتەر, سونداي-اق زاۋىت باسشىلارى مەن اۆتوكولىك قۇراستىرۋ تسەحىنىڭ ماماندارى قاتىستى.
ادەتتە, ۇلت پەن رۋحانيات تاريحى توڭىرەگىندە اڭگىمە ءوربيتىن مۇنداي كەلەلى جيىنداردى ونەركاسىپ ورىندارىنىڭ ۇيىمداستىرۋى سيرەك كەزدەسەدى. زاۋىت جانىنان جۇمىس ىستەپ جاتقان كورپوراتيۆتىك ۋنيۆەرسيتەتتىڭ اتالعان جيىندى الاش كوسەمىنە ارناپ وتىرعانى دا كەزدەيسوق ەمەس. باسقوسۋ بارىسىندا ءاليحان بوكەيحان ۇلىنىڭ قازاق جاستارىن تەحنيكا ءتىلىن مەڭگەرۋگە ۇندەگەن سوزدەرى قازىرگى تاڭداعى وتاندىق اۆتوونەركاسىپتىڭ الدىندا تۇرعان مىندەتتەرمەن ساباقتاستىرىلا سارالاندى. قايراتكەردىڭ «قازاق دالاسىز, سوقا مەن ماشيناسىز قازاق بولا المايدى. ءبىز بىرىگىپ, ءوندىرىستى بىرگە اشۋىمىز كەرەك. ول ءۇشىن بىزگە زاماناۋي جابدىقتاردى پايدالانۋ قاجەت», دەپ قىردا قامسىز جاتقان قازاقتى بىرلىك پەن تىرلىككە, تەحنيكاعا ۇيرەنىپ, ءوندىرىستى يگەرۋگە شاقىرعان زامان اۋانىن اڭداعىش سۇڭعىلا دانالىعى تۋراسىندا ايتىلدى. جيىنعا قاتىسۋشىلار, سونىمەن قاتار جاڭا قازاقستان يدەياسىن جۇزەگە اسىرۋداعى ءاليحان بوكەيحان ۇلى مۇراسىنىڭ ءمانى مەن ماڭىزى تالقىلاندى.
ءىس-شارا اياسىندا «سارىارقااۆتوپروم» اۆتوموبيل زاۋىتىنىڭ وندىرىستىك الاڭىنا ەكسكۋرسيا ۇيىمداستىرىلىپ, ينجەنەرلىك-تەحنيكالىق قىزمەتكەرلەرمەن جانە زاۋىتتا جۇمىس ىستەيتىن جاستارمەن كەزدەسۋ ءوتتى.
ۇيىمداستىرۋشىلاردىڭ ايتۋىنشا, «بوكەيحان ۇلى وقۋلارىنا» كەلىپ تۇسكەن عىلىمي ماقالالار نەگىزىندە ء«اليحان بوكەيحان ۇلى: ونەركاسىپتى دامىتۋ – تاۋەلسىز ەكونوميكانىڭ نەگىزى» اتتى جيناق جارىق كورەتىن بولادى.
قوستاناي