مەكسيكانىڭ تىنىق مۇحيتى جاعالاۋىنا قاراي بەت العان «اگاتا» داۋىلى ساففير-سيمپسون شكالاسى بويىنشا ەكىنشى ساناتقا جەتتى, دەپ حابارلايدى Egemen.kz
مەكسيكانىڭ وڭتۇستىگىنە ۇيىتقىپ سوققان داۋىلدىڭ ەكپىنى ساعاتىنا 160 شاقىرىمنان اسادى. وسىنىڭ اسەرىنەن بىرقاتار شتاتتا دۇلەي جەلمەن كەلگەن جاۋىننان كەي ەلدى مەكەندى سۋ باسىپ جاتىر. ازىرگە جاپا شەككەندەر تۋرالى اقپارات جوق. ەلدە 200-دەن اسا ارنايى پانالاۋ ورنى اشىلعان.
مەتەورولوگتار داۋىل ءۇشىنشى كاتەگورياعا دەيىن كۇشەيۋى مۇمكىن دەپ وتىر. تسيكلوننىڭ جاقىنداۋىنا بايلانىستى مەكسيكانىڭ التى ايماعىنىڭ 967 مۋنيتسيپاليتەتىندە دابىلدى ەسكەرتۋ جاريالانىپ, واحاكاداعى مەكتەپتەر ۋاقىتشا جابىلدى. بولجام بويىنشا جاعالاۋداعى كەيبىر اۋدانداردا 150 مم-گە دەيىن جاۋىن-شاشىن كۇتىلەدى. ونىڭ سالدارى سۋ تاسقىنىنا, كوشكىنگە جانە سەلگە اكەلۋى مۇمكىن. بيلىك ايماق تۇرعىندارىن قاجەتتى ساقتىق شارالارىن قابىلداۋعا جانە ازاماتتىق قورعانىس كۇشتەرىنىڭ ەسكەرتۋلەرىن ورىنداۋعا شاقىردى.
اقش-تىڭ داۋىلداردى باقىلاۋ جونىندەگى ۇلتتىق ورتالىعى بۇل مەكسيكانىڭ تىنىق مۇحيتى جاعالاۋىنا 1949 جىلدان بەرى سوعىپ تۇرعان الاپات داۋىل دەپ باعا بەرىپ وتىر.
سالتانات كەنجەباي