الماتى وبلىسىندا يگەرىلمەگەن 61 مىڭ گەكتار جەر مەملەكەتكە قايتارىلدى. بۇل جونىندە ءوڭىر اكىمى قانات بوزىمباەۆ ۇيعىر اۋدانى تۇرعىندارىمەن كەزدەسۋ بارىسىندا ايتتى, دەپ حابارلايدى Egemen.kz.
وبلىس اكىمىنىڭ ايتۋىنشا, جەر ماسەلەسىمەن ارنايى وبلىستىق كوميسسيا اينالىسىپ جاتىر.
قابىلدانعان شارالاردىڭ ناتيجەسىندە جالپى 61 مىڭ گەكتار جەر مەملەكەت مەنشىگىنە قايتارىلىپ, 167 مىڭ گەكتارعا قاتىستى ماتەريالدار قارالىپ جاتىر.
كەزدەسۋ بارىسىندا اۋدان تۇرعىندارى ەگىستىك, جايلىم جەرلەردىڭ جوقتىعىنا قاتىستى سۇراقتار قويدى.
«وبلىس اكىمى قىزمەتىنە كىرىسكەلى بەرى 12 اۋدان مەن قالا تۇرعىندارىمەن كەزدەسۋ وتكىزدىم. وسى كەزدەسۋلەردە الەۋمەتتىك سيپاتتاعى 200-دەن استام پروبلەمالىق ماسەلە كوتەرىلدى. بۇل رەتتە ءاربىر اۋداندا پايدالانىلمايتىن جەر ۋچاسكەلەرى, جەكە مال جاياتىن جايىلىمنىڭ جوقتىعى تۋرالى ايتىلدى. سوڭعى جىلدارى ۇيعىر اۋدانىنىڭ تۇرعىندارى جايىلىمدىق جانە تۇرعىن ءۇي قۇرىلىسى ءۇشىن جەردىڭ جەتىسپەۋى, اۋىل شارۋاشىلىعى جەرلەرىن كونكۋرس بويىنشا الۋ, ءىرى شارۋاشىلىقتاردىڭ پايدالانۋسىز قالعان جەرلەرىن قايتارۋ ماسەلەلەرىن ءجيى كوتەرىپ ءجۇر. سۋارۋ جۇيەلەرىن جوندەۋدە اۋدان باسشىلىعىنىڭ ناقتى شارالار قابىلداماۋى دا نارازىلىق تۋدىرىپ وتىر», دەدى قانات بوزىمباەۆ.
كەزدەسۋ قورىتىندىسى بويىنشا اۋدان باسشىلىعىنا ءتيىستى تاپسىرمالار جۇكتەلدى.