الماتى تۇرعىندارى ساياسي قۋعىن-سۇرگىن قۇرباندارىن ەسكە الدى. قالا باسشىسى ەربولات دوساەۆ تا 1931-33 جىلدارداعى اشارشىلىق قۇرباندارىنا ارنالعان ەسكەرتكىشكە گۇل شوقتارىن قويۋ راسىمىنە قاتىستى, دەپ حابارلايدى Egemen.kz.
ءىس-شاراعا ساياسي قۋعىن-سۇرگىن جانە اشارشىلىق قۇرباندارىنىڭ تۋىستارى مەن جاقىندارى, مادەنيەت قايراتكەرلەرى, قوعام وكىلدەرى قاتىستى. نوسەر جاڭبىرعا قاراماستان, ەسكە الۋ كۇنى راسىمىنە قالانىڭ 100-دەن استام تۇرعىنى جينالدى. ولار قازا بولعانداردى ءبىر مينۋت ۇنسىزدىكپەن ەسكە الىپ, ەسكەرتكىشكە گۇل شوقتارىن قويدى.
ەسكە الۋ شاراسى بارىسىندا جازۋشى سماعۇل ەلۋباي, قر ۇلتتىق عىلىم اكادەمياسىنىڭ اكادەميگى, ساياسي قۋعىن-سۇرگىن قۇرباندارىن تولىق وڭالتۋ جونىندەگى مەملەكەتتىك كوميسسيانىڭ مۇشەسى حانگەلدى ءابجانوۆ, كينورەجيسسەر گەننادي زەمەل ءسوز سويلەدى. ەسكە الۋ شاراسىنا قاتىسۋشىلار قايعىلى وقيعالاردى ەستە ساقتاپ, ساياسي قۋعىن-سۇرگىن قۇرباندارىن اقتاۋ بويىنشا جۇمىستى جالعاستىرۋ قاجەتتىگىن اتاپ ءوتتى.
ايتا كەتەيىك, بۇل كۇندەرى الماتىدا ءتۇرلى ەستەلىك ءىس-شارالار, سونىڭ ىشىندە دوڭگەلەك ۇستەل فورماتىنداعى كونفەرەنتسيالار, تاريحي-اعارتۋشىلىق دارىستەر, تەاترلاندىرىلعان قويىلىمدار, كىتاپحانالاردا فوتو جانە كىتاپ كورمەلەرى, جاستاردىڭ زيالى قاۋىم وكىلدەرىمەن كەزدەسۋلەرى جانە ت. ب. وتۋدە.