بۇل كۇندەرى فرانتسيا استاناسى – پاريجدە تەننيستەن «ۇلكەن دۋلىعا» ساناتىنداعى «رولان گارروس» ءتۋرنيرى ءوتىپ جاتىر. فرانتسيا اشىق چەمپيوناتىنىڭ العاشقى اپتاسى اياقتالىپ, تەننيسشىلەر باسەكەسى ەندى قىزعان شاعىندا, وكىنىشكە قاراي, قازاقستاندىق سپورتشىلار جارىس جولىنان شىعىپ قالدى.
بيىلعى دوداعا قاتىسقان تەننيسشىلەرىمىزدىڭ ءبارى دە «ۇلكەن دۋلىعا» ساناتىنداعى جىلدىڭ ەكىنشى ءىرى تۋرنيرىندە ۇزدىكتەر ساناتىنان كورىنبەسە دە, ءبىرشاما ماتەريالدىق جاعدايىن جاقسارتىپ الدى. ماسەلەن, ەلىمىزدىڭ ايەلدەر اراسىنداعى ءبىرىنشى راكەتكاسى ەلەنا رىباكينا جارىستىڭ ءۇشىنشى اينالىمىنا جەتكەنى ءۇشىن 133,5 مىڭ ەۋرو (62,3 ميلليون تەڭگە) كولەمىندە سىياقى الدى. الايدا ول بىلتىرعى جەتىستىگىن قايتالاي الماعاندىقتان, الداعى اپتادا جاڭاراتىن الەمدىك رەيتينگتە توپ-20 تەننيسشىنىڭ قاتارىنان شىعىپ قالايىن دەپ وتىر. 2021 جىلعى دودادا ول شيرەك فينالعا دەيىن جەتكەن بولاتىن.
سونداي-اق ە.رىباكينا جۇپتىق سىندا دا بىلتىرعى جەتىستىگى مەن يەلەنگەن ۇپايىن قورعاي المادى. بىلتىر جۇپتىق باسەكەدە دە شيرەك فينالعا دەيىن جەتكەن وتانداسىمىز بيىل العاشقى اينالىمدا ءسۇرىندى. «رولان گارروسقا» دەيىن جۇپتىق رەيتينگتە 48-ورىندا تۇرعان ەلەنا ەندى توپ-60 تەننيسشىنىڭ قاتارىنا جايعاسۋى مۇمكىن.
فرانتسيا اشىق چەمپيوناتىنىڭ ىرىكتەۋ جارىسىنا قاتىسقان زارينا دياس ءبىرىنشى اينالىمدا جەڭىلىپ, رەيتينگتەگى جاعدايىن ودان ءارى ناشارلاتىپ الدى. جارىسقا دەيىن 128-ورىندا تۇرعان جەرلەسىمىز جاڭارعان رەيتينگتە 20-30 ساتى تومەن سىرعيتىن بولدى. دەگەنمەن ول تۋرنيرگە قاتىسقانى ءۇشىن 14 مىڭ ەۋرو (6,5 ميلليون تەڭگە) كولەمىندە تابىس تاپتى.
يۋليا پۋتينتسەۆا نەگىزگى كەزەڭنىڭ ەكىنشى اينالىمىندا ۇتىلسا دا, رەيتينگتىك ۇپايىنا قول جەتكىزدى. سەبەبى ول بىلتىرعى تۋرنيردە العاشقى اينالىمدا جارىستى اياقتاعان بولاتىن. يۋ.پۋتينتسەۆا ەكىنشى اينالىمعا شىققانى ءۇشىن ۇيىمداستىرۋشىلار تاراپىنان 93,75 مىڭ ەۋرو (43,7 ميلليون تەڭگە) سىياقى الدى.
جۇپتىق باسەكەدە قازاقستاننىڭ ءبىرىنشى راكەتكاسى اننا دانيلينا دا جۋىردا جاڭاراتىن رەيتينگتە توپ-10 تەننيسشىنىڭ قاتارىنا جاقىنداي تۇسپەك. جۇپتىق باسەكەدە سىنعا تۇسەتىن جەرلەسىمىز «رولان گارروس» ءتۋرنيرىنىڭ ەكىنشى اينالىمىندا سۇرىنسە دە, نەگىزگى كەزەڭگە بيىل العاش رەت قاتىسقاندىقتان, ول ءۇشىن بۇل جوعارى ناتيجە بولىپ ەسەپتەلەدى. ا.دانيلينا وسى جەتىستىگىنىڭ ارقاسىندا 15 مىڭ ەۋروعا (7 ميلليون تەڭگە) قول جەتكىزدى.
ەرلەر باسەكەسىندەگى قازاقستاندىق تەننيسشىلەردىڭ ناتيجەسىنە توقتالار بولساق, جىگىتتەرىمىز رەيتينگتە ءوز ورىندارىن ساقتاپ قالادى. سەبەبى الەكساندر بۋبليك بىلتىرعىداي ەكىنشى اينالىمنان كەرى قايتتى. ناتيجەسى تۇراقتى بولعاندىقتان, ودان ۇپاي الىنبايدى جانە ۇپاي بەرىلمەيدى. جۇپتىق سىندا ءساتسىز ونەر كورسەتىپ, بىلتىرعى جەتىستىگىن قايتالاي الماعاندىقتان, ا.بۋبليك پەن اندرەي گولۋبەۆ جۇپتىق رەيتينگتە تومەندەيتىن بولدى. بۋبليك ءبىر اپتالىق ويىنى ءۇشىن 109,5 مىڭ ەۋرو (51,1 ميلليون تەڭگە) تابىس تاپسا, گولۋبەۆ 15 مىڭ ەۋرو (7 ميلليون تەڭگە) سىياقىعا يە بولدى.
ىرىكتەۋ سايىستارىنا قاتىسقان تيموفەي سكاتوۆ (20 مىڭ ەۋرو نەمەسە 9,3 ميلليون تەڭگە) پەن دميتري پوپكو 14 مىڭ ەۋرو (6,5 ميلليون تەڭگە) ولجالادى. سونداي-اق الەكساندر نەدوۆەسوۆ 7,75 مىڭ ەۋرونى (3,6 ميلليون تەڭگە) قالتاسىنا باستى. ءسويتىپ, بيىلعى دوداعا قاتىسقان قازاقستاندىق تەننيسشىلەر جالپى سوماسى – 422,5 مىڭ ەۋرو (197,2 ميلليون تەڭگە) سىياقىعا يە بولدى.
ايتا كەتەيىك, بيىلعى «رولان گارروس» ءتۋرنيرىنىڭ جالپى جۇلدە قورى – 43,6 ملن ەۋرونى (23 ميلليارد تەڭگە) قۇرايدى. بۇل – ازىرگە وسى ءتۋرنيردىڭ رەكوردتىق اقشالاي جۇلدەسى. الداعى جەكسەنبى كۇنى مارەسىنە جەتەتىن جارىستا توپ جارعان تەننيسشى 2,2 ملن ەۋرو مەن 2 000 رەيتينگتىك ۇپايىنا يە بولادى.