بۇل تۋرالى سەناتتا «حالىقتىڭ تابىسىن ارتتىرۋدىڭ 2025 جىلعا دەيىنگى باعدارلاماسى» كەشەندى جوسپارىن ىسكە اسىرۋدى تالقىلاۋ كەزىندە پرەمەر-ءمينيستردىڭ ورىنباسارى ەرالى توعجانوۆ ءمالىم ەتتى, دەپ حابارلايدى Egemen.kz.
«2025 جىلعا دەيىن حالىقتىڭ تاۋار ساتىپ الۋ مۇمكىندىگىن قورعاۋ ماقساتىندا قانتتان باسقا ازىق-ت ۇلىك تاۋارلارى بويىنشا 100% يمپورتتى الماستىرۋ شارالارى ىسكە اسىرىلادى. بۇل ءىرى 87 ءسۇت-تاۋار فەرماسىن, 14 ەت كومبيناتىن, 17 قۇس فابريكاسىن ىسكە قوسۋ جانە 6,6 مىڭ گەكتار باق پەن ءبىر قانت زاۋىتىن (پاۆلودار) سالۋ ارقىلى جۇزەگە اسىرىلادى», دەدى توعجانوۆ.
سونىمەن قاتار ول باقشا, ءسۇت, بال ونىمدەرىن وندىرەتىن 9 مىڭنان اسا وتباسىلىق قوسالقى شارۋاشىلىقتى بىرىكتىرەتىن 280 اۋىل شارۋاشىلىعى كووپەراتيۆىن قۇرۋ جوسپارلانىپ وتىرعانىن ايتتى.
«جالپى جوعارىدا اتاپ وتكەنىمدەي, 2025 جىلعا دەيىن 450 مىڭنان اسا جۇمىس ورىندارىن قۇرۋ جوسپارلانعان اگروونەركاسىپ سالاسىن دامىتۋ «اۋىل اماناتى» جوباسى اياسىندا ىسكە اسىرىلادى. بۇل رەتتە وتباسىلىق شارۋاشىلىقتى دامىتۋ بويىنشا جامبىل وبلىسىندا ءتيىمدى ىسكە اسىرىلعان پيلوتتى جوبانى ەلىمىزدىڭ باسقا ايماقتارىنا تاراتۋ جۇمىستارى جۇرگىزىلىپ جاتىر. قاناتقاقتى جوبا 2019 جىلدان بەرى 11 اۋىلدىق وكرۋگتە ىسكە اسىرىلدى. ناتيجەسىندە, جوباعا قاتىسقان 2,5 مىڭ وتباسىنىڭ تابىسى 4 ەسەگە ارتقان. بۇل اۋىلدارداعى اتاۋلى الەۋمەتتىك كومەك الۋشىلار سانى 65%-عا ازايعان. كاسىپكەرلەر سانى 966-دان 3248-گە دەيىن وسكەن, ياعني ءاربىر ءۇشىنشى وتباسى كاسىپكەرلىكپەن اينالىسىپ وتىر. قازىر 11 اۋىلدان تۇسەتىن جىل سايىنعى سالىق تۇسىمدەرىنىڭ كولەمى 125 ملن تەڭگەگە جەتتى», دەدى ۇكىمەت باسشىسىنىڭ ورىنباسارى.