بيىل سولتۇستىك قازاقستان وبلىسىندا 338 جاسقا ءوز ءىسىن اشۋعا جالپى سوماسى 430 ملن تەڭگە گرانت بەرىلەدى. بۇگىنگى كۇنى 30 جاس كاسىپكەر اتالعان گرانتقا ىلىكتى, دەپ حابارلايدى Egemen.kz.
سقو جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنشە, كاسىپكەرلىك سالاسىندا باعىن سىناپ, بيزنەس-يدەياسىن جۇزەگە اسىرىپ كورگىسى كەلەتىن جانە ءوزىن-ءوزى جۇمىسپەن قامتىپ وتىرعان جاستارعا 400 اەك مولشەرىندە گرانت بەرىلەدى.
«بۇل قاراجاتقا ەڭبەك قۇرالىن, ياعني, قۇرال-جابدىقتى, تەحنولوگيالىق قوندىرعىلاردى, ءتورت ت ۇلىك, قۇس ساتىپ الۋعا بولادى. بيىل ءوز ءىسىن اشۋشىلارعا 430 ملن تەڭگەنىڭ 338 گرانتى ءبولىندى. ازىرگە تەك 30 ادام عانا بۇل مۇمكىندىكتى پايدالاندى», دەدى باسقارما باسشىسىنىڭ مىندەتىن اتقارۋشى رينات ەلجاسوۆ.
2017-2021 جىلدارى «ەڭبەك» باعدارلاماسى اياسىندا سقو-دا 34 مىڭنان استام جاس جۇمىسپەن قامتىلدى. بيىل بۇل شارا 2021-2025 جىلدارعا ارنالعان كاسىپكەرلىكتى دامىتۋ ۇلتتىق جوباسى اياسىندا جالعاسادى. ۋنيۆەرسيتەت, كوللەدج جانە 11-سىنىپ تۇلەكتەرىنە باسىمدىق بەرىلەدى.
«جوبا اياسىندا جاستار كاسىبي ءبىلىم الۋعا, الەۋمەتتىك جۇمىس ورىندارىندا تاجىريبە جيناۋ ءۇشىن ەڭبەكتەنۋگە, جاستار تاجىريبەسىنە قاتىسۋعا, باسقا وڭىرلەردەن قونىس اۋدارۋعا جانە ءوز ءىسىن اشۋ ءۇشىن گرانت الۋعا مۇمكىندىكتەرى بار. جىل باسىنان جوباعا 1 300-دەن استام جاس قاتىستى, ونىڭ 63%-ى – اۋىل تۇرعىندارى», دەيدى رينات ەلجاسوۆ.
بيىل جۇمىسسىز جۇرگەن 500 ادام العاشقى كاسىپتى تەگىن مەڭگەرە الادى.
«الەۋمەتتىك جۇمىس ورنىنا 46 ادام ورنالاستىرىلدى. بۇل كومەكتى ۋنيۆەرسيتەت پەن كوللەدجدى بىتىرگەنىنە 3 جىل تولا قويماعان جاستار الا الادى. جاستارى 29-دان اسپاۋى كەرەك. ولار ءبىر جىلعا قابىلدانادى, ەڭبەكاقىسى 30 اەك-تەن تومەن بولمايدى. العاشقى جۇمىس ورنى جوباسىنا 188 ادام قابىلداندى. مۇندا دا ءوز تالاپتارى بار, جاسى 29-دان اسپاۋى ءتيىس, بۇعان دەيىن ەش جەردە جۇمىس ىستەمەگەن, تاجىريبەسى جوق ماماندار 1,5 جىلعا جۇمىسقا الىنادى. ەڭبەكاقىسى 30 اەك كەم بولمايدى, جۇمىسپەن قامتۋ ورتالىعى ونىڭ العاشقى جىلىنىڭ ەڭبەكاقىسىنا سۋبسيديا بولەدى. ال, «ۇرپاقتار كەلىسىمشارتى» اياسىندا 28 جاس جۇمىسقا ورنالاستى», دەپ ءتۇسىندىردى ول.