«بولاشاق» حالىقارالىق ستيپەندياسىنا قۇجات قابىلداۋدىڭ العاشقى كۇنىندە Egov.kz پورتالى ارقىلى 55 ءوتىنىم تۇسكەن, دەپ حابارلايدى Egemen.kz.
«كەشە «بولاشاق» حالىقارالىق ستيپەندياسىمەن جەتەكشى شەتەلدىك جوعارى وقۋ ورىندارىنا ماگيستراتۋرا, دوكتورانتۋرا جانە رەزيدەنتۋراعا ءتۇسۋ ءۇشىن قۇجاتتاردى قابىلداۋ باستالدى.
قۇجات قابىلداۋدىڭ العاشقى كۇنى Egov.kz پورتالى ارقىلى 55 ءوتىنىم بەرىلدى. قۇجات قابىلداۋ جانە كونكۋرستىق ىرىكتەۋ ۇردىستەرى تولىعىمەن اۆتوماتتاندىرىلدى. ۇمىتكەرلەر ەلىمىزدىڭ كەز كەلگەن اۋماعىنان قۇجات تاپسىرا الادى», دەپ جازدى «حالىقارالىق باعدارلامالار ورتالىعى» اق باسقارما توراعاسى ءانۋار جانعوزين جەلىدەگى پاراقشاسىندا.
وتىنىشتەر 2022 جىلعى 14 قازانعا دەيىن قابىلدانادى. تاعىلىمدامادان وتۋگە قۇجاتتاردى قابىلداۋ 2022 جىلعى 5 قىركۇيەكتە باستالىپ, 14 قازانعا دەيىن جالعاسادى.
بيىل ماگيستراتۋرا مەن رەزيدەنتۋراعا 385, دوكتورانتۋراعا 60 ستيپەنديا ءبولىندى.
سونىمەن قاتار تەحنيكالىق ماماندىقتارعا «بولاشاق» بويىنشا بەرىلەتىن گرانت سانى 60 پايىزعا ءوستى.